Jenesis 31 - An Bibel Kernewek 20234 (Kernewek Kemmyn)

Yakob a Fi dhiworth Laban

¹ Lemmyn ev a glewas geryow mebyon Laban ow leverel, ‘Yakob re gemmeras pup-tra eus dh'agan tas; ha dhiworth pythow agan tas ev a wrug oll an rychys ma.’

² Ha Yakob a welas fas Laban, hag awotta, nyns o trohag ev kepar dell via kyns.

³ Ena yn-medh an Arloedh dhe Yakob, ‘Dehwel dhe wlas dha dasow ha dhe'th kerens, ha my a vydh genes.’

⁴ Ytho Yakob a dhannvonas ha gelwel Raghel ha Lea dhe dhos dhe'n gwel, dh'y flokk,

⁵ ha leverel dhedha, ‘My a wel nag yw fas dha das troha my avel kyns, mes re beu Duw ow thas genev vy.

⁶ Ha hwi a woer my dhe servya agas tas gans oll ow galloes.

⁷ Agas tas re'm toellas ha chanjya ow gober dekkweyth, mes ny wrug Duw y asa dhe'm aperya.

⁸ Mar leveris ev, “An re brygh a vydh dha wober jy”, ena oll an flokk a dhineythis brygh, ha mar leveris, “An re labol a vydh dha wober”, ena oll an flokk a dhineythis labol.

⁹ Ha Duw a gemmeras dhe-ves chatel agas tas ha'ga ri dhymmo vy.

¹⁰ ‘Y'n termyn pan esa an flokk ow konsevya my a dhrehevis yn-bann ow dewlagas ha gweles yn hunros an boghes esa ow mos yn-bann war an flokk dhe vos labol, brygh ha brithek.

¹¹ Hag el Duw a leveris dhymm yn hunros, “Yakob”, ha my a leveris, “Ottavy.”

¹² Hag yn-medh ev, “Drehav dha dhewlagas ha mir: oll an boghes usi owth yskynna war an flokk yw labol, brygh ha brithek. Rag my re welas pup-tra eus Laban ow kul dhis.

¹³ Duw Bethel ov vy, le may hwruss'ta untya peulven, le mayth ambossys ambos dhymm. Sav yn-bann lemmyn. Ke yn-mes a'n pow ma ha dehweles dhe bow dha enesigeth.” ’

¹⁴ Raghel ha Lea a worthybis ha leverel dhodho, ‘Eus dhyn hwath rann po ertach yn chi agan tas?

¹⁵ A nyns on ni reknys estrenyon dhodho? Ev re'gan gwerthas hag ev re dhevoryas oll agan mona.

¹⁶ Oll an rychys re wrug Duw kemmeres dhiworth agan tas, yma dhyn ni ha dh'agan fleghes; ytho lemmyn, pup-tra re wrug Duw leverel dhis, henna gwra.’

¹⁷ Ytho Yakob a sevis yn-bann ha gorra y vebyon ha'y wragedh war an kowrvergh;

¹⁸ hag ev a ledyas dhe-ves oll y jatel hag oll y daklow re gavsa, an chatel re wrussa gwaynya yn Padan-aram, rag mos dhe Ysak y das, dhe bow Kanan.

¹⁹ Ha Laban eth dhe gnyvyas y dheves; ha Raghel a ladras an terafim a bewo hy thas,

²⁰ Ha Yakob a doellas Laban a Aram, rag ni wrussa leverel dhodho ev dhe vos ow fia.

²¹ Ytho ev a fias, ev ha pup-tra esa dhodho. Ev a sevis ha tremena an avon, ha lavurya troha menydh Gilead.

²² Wosa trydydh y feu derivys dhe Laban bos Yakob fiys.

²³ Ena ev a gemmeras ganso y vreder ha siwya war y lergh seyth dydh, ha'y dremena orth menydh Gilead

²⁴ Mes Duw a dheuth dhe Laban a Aram yn hunros y'n nos ha leverel dhodho, ‘Bydh war na wrylli leverel travyth dhe Yakob, na da na drog.’

Yakob ha Laban yn Gilead

²⁵ Ha Laban a dheuth dhe Yakob. Lemmyn Yakob re wrussa settya y dylda war an menydh, ha Laban gans y vreder a settyas aga thyldow yn menydh Gilead.

²⁶ Hag yn-medh Laban dhe Yakob, ‘Pandr'a wruss'ta? Ty re'm toellas ha kibya ow myrghes kepar ha pan vens prisnoryon kemmerys gans an kledha.

²⁷ Prag y hwruss'ta fia yn-dann gel ha'm toella, ha ny wruss'ta y dherivas dhymm, may hwrellen dha dhannvon yn-kerdh gans lowena ha gans kanow, gans tabourik ha gans sowtri,

²⁸ ha ny essys my dhe amma dhe'm mebyon ha'm myrghes? Lemmyn, tra wokki a wrussys.

²⁹ Yma yn galloes ow leuv gul drog dhywgh; mes nyhewer an Duw a'gas tas a gewsis genev ow leverel, “Bydh war na wrylli leverel travyth dhe Yakob, na da na drog.”

³⁰ Ha lemmyn ty res eth yn-kerdh, rag ty dhe vos ow yeuni yn fur war-lergh chi dha das. Mes prag y hwruss'ta ladra ow duwow?’

³¹ Ha Yakob a worthybis ha leverel dhe Laban, ‘Rag yth esen ow perthi own, ow prederi, martesen ty a vynn sesya dha vyrghes dhiworthiv.

³² Piwpynag may kyffi dha dhuwow ganso, ny wra ev bewa. Dherag agan breder gwra hwithra pandra eus genev, ha gwra y gemmeres ragos.’ Mes ny wodhya Yakob y hwrug Raghel aga ladra.

³³ Ytho Laban eth a-berth yn tylda Yakob ha tylda Lea ha tylda an dhiw vaghteth heb kavoes travyth. Ena ev eth yn-mes a dylda Lea ha mos a-bervedh yn tylda Raghel.

³⁴ Mes Raghel re gemmersa an terafim ha'ga gorra yn sagh-diber an kowrvargh hag esedha warnodho. Laban a davas oll a-dro y'n tylda heb aga havoes.

³⁵ Hag yn-medh hi dh'y thas, ‘Na vedhes ow arloedh serrys na allav sevel a'm sav dheragos. Yma an vaner a venynes warnav.’ Hag ev a hwilas heb kavoes an terafim.

³⁶ Ena serrys veu Yakob, hag ev a grodhvolas war Laban; ena Yakob a worthybis ha leverel dhe Laban, ‘Pyth yw ow threuspass, pyth yw ow feghes may hwrussys ow helghya?

³⁷ Rag ty re davas oll ow lestri. Pandr'a wruss'ta kavoes a'n lestri oll a'th chi? Gorr e omma dherag ow breder vy ha'th vreder jy may hallons breusi yntredhon.

³⁸ My re beu genes an ugens blydhen ma; ny wrug dha dheves na'th hever kammdhegi. Ny dhybris vy hordhes a'th flokk.

³⁹ Ny wrug vy dri dhis preydh skwardys gans bestes: my a borthas an koll ow honan. Ty a wovynnas hemma a'm leuv vy, an re ledrys y'n jydh ha'n re ledrys y'n nos.

⁴⁰ Dybrys en y'n jydh der an toemmder hag y'n nos der an rew, ha hun a fias dhiworth ow dewlagas.

⁴¹ My a spenas ugens blydhen y'th chi. My a'th servyas peswardhek blydhen rag dha dhiw vyrgh, ha hwegh blydhen rag dha flokk, ha ty a janjyas ow gober dekkweyth.

⁴² Na ve genev vy Duw ow thas, Duw Abraham, hag Own Ysak, sur yw y hwruss'ta lemmyn ow dannvon gwag yn-kerdh. Duw a welas ow galarow ha lavur ow dorn, hag ev a'th rebukyas nyhewer.’

⁴³ Ena Laban a worthybis ha leverel dhe Yakob, ‘An myrghes yw ow myrghes vy, ha'n mebyon ow mebyon vy, ha'n flokk ow flokk vy, ha pup-tra a welydh, my a'n pew. Ha'm myrghes, pandr'a allav y wul hedhyw orth an re ma po rag aga mebyon re wrussons aga dineythi?

⁴⁴ Ytho deun lemmyn, gwren ni kevambos, ty ha my, ha bedhes yn tustuni yntra my ha ty.’

⁴⁵ Ytho Yakob a gemmeras men ha'y dhrehevel avel peulven.

⁴⁶ Hag yn-medh Yakob dh'y vreder, ‘Kuntellewgh meyn’, hag i a gemmeras meyn ha gul karn, hag i a dhybris ena war an karn.

⁴⁷ Laban a'n gelwis Yegar-sahadutha, ha Yakob a'n gelwis Galeed.

⁴⁸ Hag yn-medh Laban, ‘An karn ma yw dustuni hedhyw yntra ty ha my.’ Ytho ev a elwis y hanow Galeed,

⁴⁹ ha Mispa ynwedh, rag yn-medh ev, ‘Re woellyo an Arloedh yntra my ha ty, ha ni kelys an eyl a'y gila.

⁵⁰ Mar mynnydh tebeldhyghtya ow myrghes, ha mar kemmerydh gwragedh erell ryb ow myrghes, kyn na vo denvyth genen, mir, Duw yw dustuni yntra my ha ty.’

⁵¹ Ena yn-medh Laban dhe Yakob, ‘Awotta, an karn ma, hag awotta, an peulven re worris yntra ty ha my.

⁵² An karn ma yw dustuni ha'n peulven yw dustuni na wrav tremena dres an karn ma bys dhiso jy, ha na wredh tremena dres an karn ma ha'n peulven ma bys dhymmo vy rag drog.

⁵³ Re bo Duw Abraham ha Duw Nahor, Duw aga thas, breus yntredhon’; ha Yakob a dos re Own y das Ysak.

⁵⁴ Ena Yakob a wrug sakrifis war an menydh ha gelwel y vreder dhe dhybri bara, hag i a dhybris bara ha gortos dres nos war an menydh.

⁵⁵ Ha Laban a sevis myttin a-varr hag amma dh'y vebyon ha'y vyrghes ha'ga benniga; ha Laban eth yn-kerdh ha dehweles dh'y dyller ev.