Jenesis 30 - An Bibel Kernewek 20234 (Kernewek Kemmyn)

¹ Pan welas Raghel na wrussa hi dineythi flogh dhe Yakob, Raghel a borthas avi orth hy hwoer ha leverel dhe Yakob, ‘Ro dhymmo mebyon, ken my a verow.’

² Sorr Yakob a dhewis erbynn Raghel hag yn-medh ev, ‘Esov vy yn le Duw a naghas dhis frut an dorr?’

³ Hag yn-medh hi, ‘Otta ow hethes Bilha. Ke a-bervedh dhedhi ha hi a dhineyth war ow dewlin ha my ynwedh a gyv flogh dredhi hi.’

⁴ Ytho hi a ros Bilha hy maghteth dhodho avel gwreg, ha Yakob eth a-bervedh dhedhi hi.

⁵ Ha Bilha a gonsevyas ha dineythi mab dhe Yakob.

⁶ Ena yn-medh Raghel, ‘Duw re'm breusis; ynwedh ev re glewas ow lev, ha ri dhymmo mab.’ Ytho hi a elwis y hanow, Dan.

⁷ Ha Bilha, maghteth Raghel a gonsevyas arta ha dineythi nessa mab dhe Yakob.

⁸ Ena yn-medh Raghel, ‘My re strivyas strif bras gans ow hwoer ha my re dryghis.’ Ytho hi a elwis y hanow Naftali.

⁹ Pan welas Lea hi dhe hedhi dineythi, hi a gemmeras Zilpa hy maghteth ha'y ri dhe Yakob avel gwreg.

¹⁰ Ena Zilpa, maghteth Lea, a dhineythis mab dhe Yakob.

¹¹ Hag yn-medh Lea, ‘Fortun da!’ ytho hi a elwis y hanow Gad.

¹² Ena Zilpa, maghteth Lea a dhineythis nessa mab dhe Yakob.

¹³ Yn-medh Lea, ‘Gwynn ow bys, rag benynes a'm gelow gwynnvys’; ytho hi a elwis y hanow Asher.

¹⁴ Rewben eth yn dydhyow trevas an gwaneth ha kavoes mandragorow y'n gwel ha'ga dri dhe Lea y vamm. Yn-medh Raghel dhe Lea, ‘Ro dhymm, my a'th pys, rann a'n mandragorow a'th vab.’

¹⁵ Yn-medh hi dhedhi, ‘Yw tra vyghan ty dhe gemmeres ow gour, ha ty a vynn kemmeres ynwedh mandragorow ow mab?’ Yn-medh Raghel, ‘Yn attal rag mandragorow dha vab, ev a yll growedha genes haneth.’

¹⁶ Ha Yakob a dheuth dhiworth an gwel y'n gorthugher, ha Lea eth er y bynn ha leverel, ‘Ty a dal dos a-bervedh dhymmo vy, rag my re'th wobrenas gans mandragorow ow mab.’ Ytho ev a wrowedhas gensi an nos na.

¹⁷ Ha Duw a woslowas orth Lea, ha hi a gonsevyas ha dineythi pympes mab dhe Yakob.

¹⁸ Yn-medh Lea, ‘Duw re ros dhymm ow gober, rag my dhe ri ow maghteth dhe'm gour.’ Ytho hi a elwis y hanow Yssakar.

¹⁹ Ha Lea a gonsevyas arta ha dineythi hweghves mab dhe Yakob.

²⁰ Ena Lea a leveris, ‘Duw re ros dhymm argovrow da. An torn ma ow gour a wra ow avonsya, rag my re dhineythis hwegh mab dhodho.’ Ytho hi a elwis y hanow Zebulun.

²¹ Wosa henna hi a dhineythis myrgh ha gelwel hy hanow Dina.

²² Ena Duw a borthas kov a Raghel ha goslowes orti hi hag igeri hy thorr.

²³ Ha hi a gonsevyas ha dineythi mab ha leverel, ‘Duw re gemmeras ow meth dhe-ves.’

²⁴ Ytho hi a elwis y hanow Yosep, ow leverel, ‘Re rollo Arloedh dhymm mab arall.’

Flokkys Yakob owth Ynkressya

²⁵ Pan dhineythis Raghel Yosep, yn-medh Yakob dhe Laban, ‘Gas vy dhe vos yn-kerdh, may hallav mos dhe'm tyller vy ha dhe'm pow vy.

²⁶ Roy dhymm ow gwragedh ha'm fleghes may hwrug vy dha servya ragdha, may hallav mos. Ty a woer an gonis re wrug ragos.’

²⁷ Yn-medh Laban dhodho, ‘Mar kwrug vy kavoes gras y'th wolok, my re dhyskas dre dhewinieth an Arloedh dhe'm benniga a'th wovis.’

²⁸ Hag yn-medh ev, ‘Ervir dha wober a dalav, ha my a'n ri.’

²⁹ Yn-medh ev dhodho, ‘Ty a woer fatell wrug vy dha servya, ha fatell veu dha warthek genev vy,

³⁰ rag yth esa boghes genes kyns my dhe dhos, mes ynkressys yw yn feur, ha'n Arloedh re wrug dha venniga plepynag y feuv. Mes lemmyn, p'eur hwrav vy provia rag ow chi ow honan ynwedh?’

³¹ Yn-medh ev, ‘Pandr'a rov dhiso?’ Hag yn-medh Yakob, ‘Ny wre'ta ri dhymm travyth. Mar mynnydh gul hemma ragov, my a wra bugelya dha flokk arta ha'y witha.

³² My a vynn tremena der oll dha flokk hedhyw ha treylya a-denewen alena pubonan brygh ha brith, ha pubonan du yn mysk an oen, ha pubonan brith ha brygh yn mysk an gever. Hemma a vydh ow gober.

³³ Ha'm lenduri a dhest ragov y'n dydhyow ow tos, pan dheudh dhe jekkya ow gober genes. Pubonan nag yw brygh na brith yn mysk an gever, na du yn mysk an oen, a vydh reknys avel ledrys genev.’

³⁴ Hag yn-medh Laban, ‘Da lowr; bedhes dell leversys.’

³⁵ Mes an jydh na Laban a gemmeras yn-mes an boghes o labol ha brith, hag oll an gever-benow brygh ha brith, pubonan gans gwynn warnodho, ha pubonan du yn mysk an oen, hag a's ros yntra diwleuv y vebyon,

³⁶ ha gorra kerdh trydydh yntredho ev ha Yakob; ha Yakob a vugelyas remenant flokk Laban.

³⁷ Ena Yakob a gemmeras gwelynni fresk a edhel gwynn hag alamand ha platanwydh ha pilya ribinow gwynn ynna, ow lommhe an rann wynn usi war an gwelynni.

³⁸ Ena ev a worras a-dherag an flokk an gwelynni pilys y'n newyow, y'n dowrvaow may teu an flokk dhe eva; may hwrellens konsevya hag i ow tos dhe eva.

³⁹ Ha'n flokk a gonsevyas a-dherag an gwelynni; ha'n flokk a dhineythis eyn labol, brygh ha brith.

⁴⁰ Ha Yakob a separatyas an oen ha gorra fas an flokk troha'n re labol, hag oll an re du yn flokk Laban; hag ev a worras y flokk ev a'n eyl tu, ha ny wrug aga gorra gans flokk Laban.

⁴¹ Hag y hwarva, pan wre an re krev a'n flokk konsevya, Yakob a worra an gwelynni y'n newyow dherag lagasow an flokk, may hwrellens konsevya ryb an gwelynni.

⁴² Ha pan o an deves gwann, ny worras an gwelynni; ytho an re gwann esa dhe Laban ha'n re krev dhe Yakob.

⁴³ Ha rychys an gour a gressyas dres eghenn, hag yth esa dhodho flokkys bras, ha maghtethyon ha kethyon, ha kowrvergh hag asenes.