Jenesis 25 - An Bibel Kernewek 20234 (Kernewek Kemmyn)

¹ Ena Abraham a gemmeras gwreg arall, Ketura hy hanow,

² ha hi a dhineythis dhodho Zimran ha Yokshan ha Medan ha Midyan hag Yshbak ha Shuah.

³ Ha Yoksham a dhineythis Sheba ha Dedan. Mebyon Dedan a veu Asshurim, ha Letushim, ha Leummim.

⁴ Mebyon Midyan a veu Efa, hag Efer ha Hanok hag Abida hag Eldaa. Oll an re ma a veu mebyon Ketura.

⁵ Hag Abraham a ros pup-tra esa ganso dhe Ysak.

⁶ Ha dhe vebyon y iswragedh, Abraham a ros rohow ha'ga dannvon dhe-ves dhiworth y vab Ysak, hag ev hwath yn few, dhe'n est, troha pow an est.

Mernans Abraham

⁷ An re ma yw blydhynyow bewnans Abraham, a vewas ev: pymthek bloedh hag eth-ugens.

⁸ Ena Abraham a dremenas hag a verwis yn kothni dha, den koth, leun a vlydhynyow, hag y feu kuntellys dh'y bobel.

⁹ Y vebyon Ysak hag Yshmael a'n ynkleudhyas y'n kav Makpela orth park Efron mab Soar an Hittyas, usi a-dal Mamre,

¹⁰ an park a brenas Abraham dhiworth mebyon Heth. Abraham a veu ynkleudhys ena gans y wreg Sara.

¹¹ Wosa mernans Abraham, Duw a vennigas Ysak y vab hag Ysak esa trigys orth Beer-lahay-roi.

¹² An re ma yw henedhow Yshmael mab Abraham, a dhineythis Hagar an Ejyptyanes, maghteth Sara, dhe Abraham.

¹³ An re ma yw henwyn mebyon Yshmael, war-lergh aga henwyn, war-lergh aga henedhow: kynsa-genys Yshmael, Nebayoth; ha Kedar, Adbeel, Mibsam,

¹⁴ Mishma, Duma, Massa,

¹⁵ Hadad, Tema, Yetur, Nafish ha Kadema.

¹⁶ An re ma yw mebyon Yshmael, ha'n re ma yw aga henwyn orth aga godrevow ha'ga hampow, dewdhek pryns orth aga loethow.

¹⁷ Ha'n re ma yw blydhynyow bewnans Yshmael: seytek bloedh ha hwegh-ugens. Ev a dremenas hag a verwis hag a veu kuntellys dh'y bobel,

¹⁸ Trigys esens dhiworth Havila dhe Shur, usi a-dal Ejyp war an fordh dhe Assyria. Ev a goedhas dherag y vreder oll.

Dineythyans Esaw ha Yakob

¹⁹ An re ma yw henedhow Ysak mab Abraham. Abraham a dhineythis Ysak.

²⁰ Hag Ysak o dew-ugens bloedh pan gemmeras Rebeka avel gwreg, myrgh Bethuel a Aram, dhiworth Padan-aram, hwoer Laban a Aram.

²¹ Hag Ysak a bysis war an Arloedh rag y wreg, rag anvap o hi, ha'n Arloedh a glewas y bysadow ha Rebeka y wreg a gonsevyas,

²² ha'n fleghes a strivyas war-barth ynni hi hag yn-medh hi, ‘Mars yw an kas yndella, prag yth ov vy bew?’ Hag yth eth hi dhe wovynn orth an Arloedh.

²³ Hag yn-medh an Arloedh dhedhi, ‘Yma diw genedhel y'th torr ha diw bobel a vydh rynnys a'th kolodhyon; unn bobel a vydh kreffa es an bobel arall, ha'n kottha a wra servya an yowynka.’

²⁴ Pan veu hy dydhyow kollenwys rag dineythi, awotta, yth esa gevellyon yn hy thorr.

²⁵ An kynsa a dheuth yn-mes, rudhik o, oll anodho kepar ha mantell vlewek; ytho i a elwis y hanow Esaw,

²⁶ Wosa henna y vroder a dheuth yn-mes ha'y dhorn a synsis gwewenn Esaw; ytho y hanow a veu gelwys Yakob. Ysak o tri-ugens bloedh pan wrug hi aga dineythi.

²⁷ An vebyon a devis, hag Esaw a dheuth ha bos gour ha dhodho godhvos a helghya, gour a'n gwel; mes gour hebask o Yakob, trigys yn tyldow.

²⁸ Ysak a gara Esaw drefenn y helgik a dhybri; mes Rebeka a gara Yakob.

²⁹ Yth esa Yakob ow pryjyon kowl, hag Esaw a dheuth a-bervedh a'n gwel, pur skwith,

³⁰ Yn-medh Esaw dhe Yakob, ‘Gas vy dhe eva lemmik a'n kowl rudh ma, my a'th pys, rag skwith ov vy.’ Rag henna y hanow a veu gelwys Edom.

³¹ Hag yn-medh Yakob, ‘Gwerth dhymm hedhyw dha wir genesik.’

³² Yn-medh Esaw, ‘Otta, yth esov yn eneworres; ytho pandr'a amont an gwir genesik dhymm?’

³³ Yn-medh Yakob, ‘To dhymmo hedhyw’, hag ev a dos dhodho, ha gwertha y wir genesik dhe Yakob.

³⁴ Ena Yakob a ros bara ha kowl lentilow dhe Esaw hag ev a dhybris hag eva ha sevel ha mos yn-kerdh, hag Esaw a skornyas y wir genesik.