Jenesis 23 - An Bibel Kernewek 20234 (Kernewek Kemmyn)

Mernans Sara

¹ Ha Sara o seyth bloedh ha hwegh-ugens hy bloedh – bloedh bewnans Sara.

² Ha Sara a verwis yn Kiryath-arba, yw Hebron yn pow Kanan, hag Abraham a dheuth dhe gyni rag Sara hag oela rygdhi.

³ Hag Abraham a sevis yn-bann dhiworth an korf ha kewsel orth mebyon Heth ow leverel,

⁴ ‘My yw alyon ha godriger yn agas mysk; grontyewgh dhymm perghennogeth rag ynkleudhva genowgh, may hylliv ynkleudhyas an korf mes a'm golok.’

⁵ Mebyon Heth a worthybis Abraham ow leverel dhodho,

⁶ ‘Goslow orthyn, ow arloedh; pryns Duw osta yn agan mysk. Ynkleudh an korf y'th tewis a'gan ynkleudhvaow. Denvyth ahanan ny vynn nagha dhis y ynkleudhva dhe ynkleudhyas an korf.’

⁷ Hag Abraham a sevis hag omblegya dhe dus an pow, dhe vebyon Heth,

⁸ ha kewsel orta ow leverel, ‘Mars yw bodh agas brys my dhe ynkleudhyas an korf mes a'm golok, goslowewgh orthiv ha pled gans Efron mab Sohar ragov,

⁹ may rollo dhymm kav Makpela usi dhodho, orth penn y bark. Re wrello y ri dhymm orth pris leun yn agas mysk, avel perghennogeth rag ynkleudhva.’

¹⁰ Yth esa Efron owth esedha yn mysk mebyon Heth, hag Efron an Hittyas a worthybis Abraham yn klewans mebyon Heth, a beub esa ow tremena dre yet an sita, ow leverel,

¹¹ ‘Nansi, ow arloedh, goslow orthiv. My a re dhis an park ha'n kav usi ynno; yn golok mebyon ow fobel my a'n re dhis. Gwra ynkleudhyas an korf usi genes.’

¹² Hag Abraham a omblegyas dherag pobel an pow.

¹³ Hag ev a gewsis orth Efron, yn klewans pobel an pow, ow leverel, ‘Mes mar mynnydh, klew vy my a'th pys. My a re an mona rag an park. Kemmer e dhiworthiv, ha my a vynn ynkleudhyas ena an korf usi dhymm.’

¹⁴ Hag Efron a worthybis Abraham, ow leverel dhodho,

¹⁵ ‘Ow arloedh, goslow orthiv. An tir a dal peswar kans shekel arghans. Pyth yw henna yntra ty ha my? Gwra ynkleudhyas an korf usi genes.’

¹⁶ Hag Abraham a woslowas orth Efron, hag Abraham a boesas dhe Efron an arghans re lavarsa yn klewans mebyon Heth, peswar shekel a arghans war-lergh usadow an varchons.

¹⁷ Ytho park Efron a veu statyes, esa yn Makpela a-dal Mamre: an park ha'n kav esa ynno hag oll an gwydh esa y'n park yn oll an emlow a-dro,

¹⁸ dhe Abraham avel posseshyon dherag mebyon Heth, dherag peub esa owth entra dre yet y sita.

¹⁹ Wosa hemma, Abraham a ynkleudhyas Sara y wreg y'n kav a bark Makpela a-dal Mamre, yw Hebron yn pow Kanan.

²⁰ Ha'n park ha'n kav usi ynno a veu statyes dhe Abraham gans mebyon Heth avel perghennogeth rag ynkleudhva.