Jenesis 21 - An Bibel Kernewek 20234 (Kernewek Kemmyn)

Dineythyans Ysak

¹ Ha'n Arloedh eth dhe weles Sara dell wrussa leverel, ha'n Arloedh a wrug dhe Sara kepar dell lavarsa.

² Rag Sara a gonsevyas ha dineythi mab rag Abraham yn y henys, y'n termyn may hwrussa Duw kewsel anodho.

³ Hag Abraham a elwis hanow y vab re wrussa Sara dineythi dhodho, Ysak.

⁴ Hag Abraham a drodroghas y vab Ysak pan veu eth dydh y oes, dell wrussa Duw erghi dhodho.

⁵ Hag Abraham o kans bloedh y oes pan veu y vab Ysak genys dhodho.

⁶ Hag yn-medh Sara, ‘Duw re wrug dhymm hwerthin, ha peub a'm klew a hwerth genev vy.’

⁷ Hag yn-medh hi, ‘Piw a wrussa leverel dhe Abraham Sara dhe ri an vronn dhe vebyon? Rag my re dhineythis mab dhodho yn y henys.’

⁸ Ha'n flogh a devis hag a veu didhenys; hag Abraham a wrug kevewi bras an keth jydh may feu Ysak didhenys.

⁹ Ha Sara a welas mab Hagar an Ejyptyanes a wrussa dineythi dhe Abraham, ow kul ges.

¹⁰ Ytho, yn-medh hi dhe Abraham, ‘Tewl yn-mes an gethes ma ha'y mab, rag ny vydh mab an gethes ma her gans ow mab, gans Ysak.’

¹¹ Ha pur dhrog o an dra yn golok Abraham drefenn y vab.

¹² Hag yn-medh Duw dhe Abraham, ‘Na vedhes drog y'th wolok drefenn an maw, na drefenn dha gethes. Goslow orth lev Sara yn pup-tra re leveris dhis rag der Ysak y fydh dha has henwys.

¹³ Hag a has mab an gethes my a vynn gul kenedhel ynwedh rag yth yw dha has jy.’

¹⁴ Hag Abraham a sevis yn-bann ternos vyttin a-varr ha kemmeres bara ha kroghen dowr ha'ga ri dhe Hagar orth aga gorra war hy diwskoedh, ha'n flogh, ha'y dannvon dhe-ves, ha hi eth yn-kerdh ha gwandra yn difeythtir Beer-sheba.

¹⁵ Ha gyllys o an dowr y'n groghen ha hi a dewlis an flogh yn-dann onan an bosow.

¹⁶ Ha hi eth hag esedha a-dal dhodho, pell lowr, a-dro dhe denn gwarak, rag hi a leveris, ‘Na as vy dhe weles mernans an flogh.’ Ha hi a esedhas a-dal dhodho, ha drehevel hy lev hag oela.

¹⁷ Ha Duw a glewas lev an maw, hag el Duw a elwis dhe Hagar mes a nev ha leverel dhedhi, ‘Pandr'a hwer dhis, Hagar? Na gemmer own rag Duw re glewas lev an maw le may ma.

¹⁸ Sav yn-bann, drehav an maw yn-bann, syns e er dha dhorn, rag my a vynn y wul kenedhel vras.’

¹⁹ Ha Duw a igoras hy dhewlagas ha hi a welas puth dowr; hi eth, ha lenwel an groghen a dhowr ha'y ri dhe'n maw dhe eva.

²⁰ Hag yth esa Duw gans an maw hag ev a devis ha triga y'n difeythtir ha dos ha bos sether.

²¹ Yth esa trigys yn difeythtir Paran; ha'y vamm a gemmeras gwreg ragdho mes a bow Ejyp.

Kevambos Kres yn Beer-sheba

²² Hag y'n termyn na, Abimelek, ha Fikol pennhembrenkyas y lu, a leveris dhe Abraham, ‘Yma Duw genes yn pup-tra a wre'ta.

²³ Lemmyn, to dhymmo omma re Dhuw na wre'ta ow thoella vy na hwath ow henedh nag ow linyeth, mes dyghtya vy ha'n tir may feus trigys ynno, war-lergh an tregeredh a wrug vy dhiso jy.’

²⁴ Hag yn-medh Abraham, ‘My a'n te.’

²⁵ Hag Abraham a reprevas Abimelek drefenn puth dowr re wrussa gwesyon Abimelek settya dalghenn ynno gans nerth.

²⁶ Hag yn-medh Abimelek, ‘Ny wonn piw re wrug hemma. Ny wrussys ty dha honan y dherivas dhymm, na ny wrug vy klewes anodho kyns hedhyw.’

²⁷ Hag Abraham a gemmeras deves hag oghen ha'ga ri dhe Abimelek, ha'ga dew a wrug kevambos.

²⁸ Hag Abraham a worras a-denewen seyth oenes a'n flokk.

²⁹ Hag Abimelek a leveris dhe Abraham. ‘Pyth yw an seyth oenes ma re wruss'ta aga gorra aga honan?’

³⁰ Hag yn-medh ev, ‘Ty a dhegemmer an seyth oenes ma a'm leuv vy dhe vos dustuni ragov, my dhe balas an puth ma.’

³¹ Rag hemma ev a elwis an tyller ma Beer-sheba drefenn i dhe di ena, aga dew.

³² Ytho i a wrug kevambos yn Beer-sheba. Ena Abimelek a sevis yn-bann, ha Fikol pennhembrenkyas y lu, hag i a dhehwelis dhe bow an Filistysi.

³³ Hag Abraham a blansas tamariskenn yn Beer-sheba ha gelwel ena war hanow an Arloedh, Duw heb diwedh.

³⁴ Hag yth esa Abraham trigys avel alyon yn pow an Filistysi lies dydh.