Jenesis 15 - An Bibel Kernewek 20234 (Kernewek Kemmyn)

Kevambos Duw gans Abram

¹ Wosa an taklow ma, ger an Arloedh a dheuth dhe Abram yn gwelesigeth, ow leverel, ‘Na borth own, Abram, my yw dha skoes, dha wober pur vras.’

² Hag yn-medh Abram, ‘Arloedh Duw, pandr'a vynn'ta ri dhymm, rag yth ov prest heb flogh, ha her ow chi a vydh Eliezer a Damaskus?’

³ Hag yn-medh Abram, ‘Awotta, ny wruss'ta ri has dhymm, hag awotta, onan genys y'm chi vy a vydh ow her.’

⁴ Hag awotta, ger an Arloedh a dheuth dhodho ow leverel, ‘Ny vydh hemma dha her, mes neb a dheu yn-mes a'th kolodhyon jy, ev a vydh dha her.’

⁵ Hag ev a'n dros mes a-ji ha leverel, ‘Mir lemmyn troha'n nev ha reken niver an ster, mar kyllydh aga nivera.’ Hag yn-medh ev dhodho, ‘Yndella y fydh dha has.’

⁶ Hag ev a fydhyas y'n Arloedh, hag ev a'n akontyas dhodho avel ewnder.

⁷ Hag ev a leveris dhodho, ‘My yw an Arloedh a'th tros mes a Ur an Kaldeanys dhe ri dhis an pow ma dh'y gavoes yn perghennogeth.’

⁸ Hag yn-medh ev, ‘A Arloedh Duw, fatell allav vy godhvos my dh'y gavoes yn perghennogeth?’

⁹ Hag ev a leveris dhodho, ‘Kemmer ragov lejek tri bloedh ha gaver tri bloedh ha hordh tri bloedh ha turenn, ha kolomm yowynk.’

¹⁰ Ytho ev a gemmeras oll an re ma ragdho ha'ga treghi yn diw rann der an kres, ha gorra pub hanter an eyl a-dal y gila; mes ny droghas an ydhyn yn diw rann.

¹¹ Ha pan dheuth an ydhyn-preydh yn-nans war an korfow, Abram a's chasyas dhe-ves.

¹² Ha pan esa an howl ow sedhi, kosk down a goedhas war Abram, hag awotta, euth, tewolgow bras, a goedhas warnodho.

¹³ Ena ev a leveris dhe Abram, ‘Godhvydh yn sur y fydh dha has alyons yn pow nag yw dhedha i, hag i a wra aga servya; hag i a wra aga arwaska peswar kans blydhen.

¹⁴ Ha'n genedhel ynwedh a wrons i servya, my a wra hy breusi; ha wosa henna i a dheu yn-mes gans rychys meur.

¹⁵ Ha ty a wra mos dhe'th tasow yn kres, ha bos ynkleudhys yn kothni dha.

¹⁶ Y'n peswora henedh i a dhehwel omma; rag ny vydh kowlwrys na hwath kammweyth an Amorysi.’

¹⁷ Hag y hwarva, pan sedhis an howl hag yth o tewl, awotta, forn ow megi ha faglenn ow leski a dremenas ynter an rannow na.

¹⁸ An keth jydh na an Arloedh a wrug kevambos gans Abram, ow leverel, ‘My re ros an tir ma dhe'th has, dhiworth avon Ejyp bys y'n avon vras, an avon Ewfrates,

¹⁹ tir an Kenysi, an Kenizzysi an Kadmonysi,

²⁰ an Hittysi, an Perizzysi, an Refaim,

²¹ an Amorysi, an Kananysi, an Girgashysi ha'n Yebusysi.’