Jenesis 14 - An Bibel Kernewek 20234 (Kernewek Kemmyn)

Lot Sawys gans Abram

¹ Hag y hwarva yn dydhyow Amrafel myghtern Shinar, Aryok myghtern Ellasar, Kedorlaomer myghtern Elam, ha Tidal myghtern Goyim,

² y hwrug an re ma gwerrya erbynn Bera myghtern Sodom hag erbynn Birsha myghtern Gomorra, Shinab myghtern Adma ha Shemeber myghtern Seboyim, ha myghtern Bela (henn yw Soar).

³ Oll an re ma a veu kuntellys war-barth yn nans Siddim (henn yw Mor an Hoelan).

⁴ Dewdhek blydhen i a servyas Kedorlaomer hag y'n trydhegves blydhen i a rebellyas.

⁵ Hag y'n peswardhegves blydhen, Kedorlaomer ha'n vyghternedh esa ganso a dheuth ha fetha an Refaim yn Ashteroth-karnaym ha'n Zuzim yn Ham ha'n Emim yn Shave-kiryathaym,

⁶ Ha'n Horysi yn aga menydh Seir bys yn El-paran, usi ryb an difeythtir.

⁷ Hag i a dhehwelis ha dos dhe En-mishpat (henn yw Kadesh) ha fetha gwlas oll an Amalekysi ha'n Amorysi ynwedh esa trigys yn Haseson-tamar.

⁸ Ha myghtern Sodom eth yn-mes, ha myghtern Gomorra ha myghtern Adma ha myghtern Seboyim ha myghtern Bela (henn yw Soar), hag araya rag kas er aga fynn yn nans Siddim,

⁹ erbynn Kedorlaomer myghtern Elam, Tidal myghtern Goyim, Amrafel myghtern Shinar, hag Aryok myghtern Ellasar: peswar myghtern erbynn pymp.

¹⁰ Nans Siddim o leun a bollow pyg. Myghternedh Sodom ha Gomorra a fias, ha koedha ena, ha'n remenant a fias dhe'n menydh.

¹¹ Ena i a gemmeras oll an pythow a Sodom ha Gomorra hag oll aga boes ha mos yn-kerdh.

¹² Hag i a gemmeras Lot, mab broder Abram, esa trigys yn Sodom, ha'y bythow, ha mos yn-kerdh.

¹³ Ena y teuth unn dianker ha leverel hemma dhe Abram an Ebrow, esa trigys ryb derow Mamre; Amoryas o ev, broder Eshkol ha broder Aner, hag yth ens i keffrysysi Abram.

¹⁴ Ha pan glewas Abram bos y vroder kemmerys prisner, ev a guntellas y dus dyskys yn arvow, genys yn y ji ev, trihans hag etek aga niver ha'ga helghya bys yn Dan.

¹⁵ Hag yn nos ev a rannas y lu er aga fynn, ev ha'y wesyon, ha'ga fetha, ha'ga chasya bys yn Hoba usi a'n barth kledh dhe Damaskus.

¹⁶ Hag ev a dhaskavas oll y bythow hag ynwedh y vroder Lot ha'y bythow ev, ha'n benynes ynwedh ha'n bobel.

Abram Bennigys gans Melkisedek

¹⁷ Ha myghtern Sodom eth yn-mes dh'y vetya wosa ev dhe dhehweles dhiworth gweskel Kedorlaomer ha'n vyghternedh esa ganso yn nans Shave (henn yw Nans an Myghtern).

¹⁸ Ha Melkisedek myghtern Salem a dhros yn-mes bara ha gwin, hag ev o oferyas Duw Ughella.

¹⁹ Hag ev a'n bennigas ha leverel, ‘Benniges re bo Abram gans Duw Ughella, Gwrier nev ha nor.

²⁰ Ha benniges re bo Duw Ughella neb a dhaskorras dha eskerens a-berth yn dha dhorn.’ Hag ev a ros dhodho dega a bup-tra.

²¹ Ena myghtern Sodom a leveris dhe Abram, ‘Ro dhymm an dus ha kemmer an pythow dhiso jy dha honan.’

²² Mes Abram a leveris dhe vyghtern Sodom, ‘My re dhrehevis ow leuv dhe'n Arloedh, Duw Ughella, Gwrier nev ha nor,

²³ na wrav kemmeres naneyl neusenn na hwath kroen-sandal dhiworth pup-tra eus dhis, rag own ty dhe leverel, “My re wrug Abram rych”:

²⁴ travyth saw an pyth re dhybris an dus yowynk, ha'n rann a dhegoedh dhe'n wer eth genev, Aner, Eshkol ha Mamre. Kemmerens i aga rann.’