Jenesis 12 - An Bibel Kernewek 20234 (Kernewek Kemmyn)

Galow Abram

¹ An Arloedh a leveris dhe Abram, ‘Ke jy mes a'th pow ha dhiworth dha gerens ha dhiworth chi dha das bys y'n wlas a vynnav hy diskwedhes dhis.

² Ha my a vynn dha wul kenedhel vras, ha my a'th vennik ha gul dha hanow meur y vri, ha ty a vydh bennath:

³ Ha my a vennik an re a wra dha venniga jy; ha neb a'th villik a wrav vy y villiga. Ynnos jy y fydh benniges oll teyluyow an nor.’

⁴ Ytho, Abram eth dell wrussa an Arloedh leverel dhodho, ha Lot eth ganso. Abram o pymthek bloedh ha tri-ugens pan eth yn-mes a Haran.

⁵ Hag Abram a gemmeras Saray y wreg ha Lot, mab y vroder hag oll aga fyth re wrussens kuntelles, ha'n enevow re wrussens kavoes yn Haran, hag i eth yn-kerdh rag mos dhe bow Kanan; ha dhe bow Kanan y teuthons i.

⁶ Hag Abram a dremenas der an tir bys y'n tyller Shekem, bys yn derwenn More. Hag yth esa an Kananysi y'n pow y'n termyn na.

⁷ Ha'n Arloedh a omdhiskwedhas dhe Abram ha leverel dhodho, ‘My a vynn ri an tir ma dhe'th has jy.’ Ytho ev a dhrehevis alter dhe'n Arloedh neb a omdhiskwedhas dhodho.

⁸ Ena ev eth alena bys yn menydh a'n est dhe Bethel ha settya y dylda yn-bann yntra Bethel y'n howlsedhes hag Ay y'n est, ha drehevel ena alter dhe'n Arloedh ha gelwel war hanow an Arloedh.

⁹ Hag Abram a omdennas hag eth yn-rag troha'n Negeb.

Abram ha Saray yn Ejyp

¹⁰ Mes yth esa divoetter y'n pow; ytho Abram eth yn-nans dhe Ejyp dhe driga ena, rag bos an divoetter poes y'n pow.

¹¹ Pan dheuth nes rag entra yn Ejyp, yn-medh ev dhe Saray y wreg, ‘Otta, my a woer dha vos benyn teg dhe weles.

¹² Ytho, pan wrello an Ejyptianys dha weles, i a lever, “Homm yw y wreg”; hag i a wra ow ladha vy, mes i a wra dha asa jy yn few.

¹³ Lavar, my a'th pys, dha vos ow hwoer, may fo dhe well genev a-barth dhis, ha'm enev a vew a'th wovis jy.’

¹⁴ Pan dheuth Abram dhe Ejyp, an Ejyptianys a welas an venyn, hi dhe vos pur deg.

¹⁵ Pennsevigyon Faro a's gwelas ynwedh ha'y gormel a-dherag Faro; ha'n venyn a veu kemmerys a-berth yn chi Faro.

¹⁶ Ev a dhyghtyas Abram yn ta a'y govis hi, hag y feu dhodho deves, oghen, asenes, gwesyon, maghtethyon, kasegi-asen ha kowrvergh.

¹⁷ Mes an Arloedh a blagyas Faro ha'y ji gans plagys bras drefenn Saray, gwreg Abram.

¹⁸ Ha Faro a elwis Abram ha leverel, ‘Pyth yw hemma a wruss'ta gul dhymmo? Prag na wruss'ta leverel dhymm hi dhe vos dha wreg?

¹⁹ Prag y hwruss'ta leverel, “Ow hwoer yw hi”, may hwrugavy hy hemmeres avel gwreg? Ytho, otta dha wreg. Kemmer hi, ha ke yn-kerdh.’

²⁰ Ha Faro a erghis dh'y wer yn y gever hag i a'n dannvonas yn-kerdh, ha'y wreg ha pup-tra esa dhodho.