Jenesis 11 - An Bibel Kernewek 20234 (Kernewek Kemmyn)

Tour Babel

¹ Hag yth esa dhe oll an bys unn taves, ha'n keth geryow.

² Hag y hwarva hag i ow mos yn-rag dhiworth an howldrevel, i a gavas stras yn pow Shinar ha triga ena.

³ Hag i a leveris, an eyl dh'y gila, ‘Dewgh, gwren ni gul brykkys ha'ga fobas yn tan.’ Hag yth esa brykkys dhedha yn le meyn ha pyg yn le pri.

⁴ Hag yn-medhons i, ‘Dewgh, gwren ni drehevel sita ha tour, ha'y benn y'n nevow; ha gwren gul hanow ragon, rag own ni dhe vos skattrys a-les war enep oll an nor.’

⁵ Ha'n Arloedh a dhiyskynnas dhe weles an sita ha'n tour esa mebyon den orth aga drehevel.

⁶ Hag yn-medh an Arloedh, ‘Awotta, unn bobel yns i, hag yma unn taves dhedha i oll; ha hemm yw an dalleth a'ga ober; lemmyn ny vydh travyth na allons i y wul mar mynnons.

⁷ Dewgh, gwren ni diyskynna ha kemmyska aga yeth ma na wodhvons konvedhes an eyl yeth y gila.’

⁸ Ytho an Arloedh a's skattras a-les alena war enep oll an nor, hag i a astelas drehevel an sita.

⁹ Ytho, yth yw hy hanow gelwys Babel, rag an Arloedh dhe gemmyska ena yeth oll an bys, ha'n Arloedh a's skattras alena war enep oll an nor.

Henedhow Shem

¹⁰ An re ma yw henedhow Shem. Shem o kans bloedh hag ev a dhineythis Arfaksad diw vlydhen wosa an liv.

¹¹ Ha Shem a vewas pymp kans blydhen wosa dineythi Arfaksad, hag ev a dhineythis mebyon ha myrghes.

¹² Arfaksad a vewas pymthek blydhen warn ugens, ha dineythi Shelagh.

¹³ Hag Arfaksad a vewas peswar kans blydhen ha teyr wosa dineythi Shelagh, hag ev a dhineythis mebyon ha myrghes.

¹⁴ Shelagh a vewas deg blydhen warn ugens ha dineythi Eber.

¹⁵ Ha Shelagh a vewas peswar kans blydhen ha teyr wosa dineythi Eber, hag ev a dhineythis mebyon ha myrghes.

¹⁶ Eber a vewas peswardhek blydhen warn ugens ha dineythi Peleg.

¹⁷ Hag Eber a vewas peswar kans blydhen ha deg warn ugens wosa dineythi Peleg, hag ev a dhineythis mebyon ha myrghes.

¹⁸ Ha Peleg a vewas deg blydhen warn ugens ha dineythi Reu.

¹⁹ Ha Peleg a vewas dew kans blydhen ha naw wosa dineythi Reu, hag ev a dhineythis mebyon ha myrghes.

²⁰ Reu a vewas dewdhek blydhen warn ugens ha dineythi Serug.

²¹ Ha Reu a vewas dew kans blydhen ha seyth wosa dineythi Serug, ha dineythi mebyon ha myrghes.

²² Serug a vewas deg blydhen warn ugens ha dineythi Nahor.

²³ Ha Serug a vewas dew kans blydhen wosa ev dhe dhineythi Nahor ha dineythi mebyon ha myrghes.

²⁴ Ha Nahor a vewas naw blydhen warn ugens, ha dineythi Teragh.

²⁵ Ha Nahor a vewas kans blydhen ha nownsek wosa ev dhe dhineythi Teragh, hag ev a dhineythis mebyon ha myrghes.

²⁶ Ha Teragh a vewas deg blydhen ha tri-ugens ha dineythi Abram, Nahor ha Haran.

An Ugheldas Abram

²⁷ An re ma yw henedhow Teragh. Teragh a dhineythis Abram, Nahor ha Haran, ha Haran a dhineythis Lot.

²⁸ Haran a verwis pan veu y das hwath yn few yn pow y enesigeth, Ur an Kaldeanys.

²⁹ Hag Abram ha Nahor a gemmeras gwragedh dhedha aga honan. Hanow gwreg Abram o Saray, ha hanow gwreg Nahor o Milka, myrgh Haran, tas Milka ha tas Yska.

³⁰ Mes Saray o gownagh; nyns esa flogh dhedhi.

³¹ Teragh a gemmeras Abram y vab ha Lot mab Haran, mab y vab ev, ha Saray y wohydh, gwreg y vab Abram, hag i eth yn-mes gansa dhiworth Ur an Kaldeanys mayth ellens dhe bow Kanan, hag i a dheuth dhe Haran ha triga ena.

³² Ha dydhyow Teragh a veu dew kans blydhen ha pymp, ha Teragh a verwis yn Haran.