Jamys 5 - An Bibel Kernewek 20234 (Kernewek Kemmyn)

Gwarnyans dhe'n Dus Rych

¹ Dewgh lemmyn, a dus rych, gwrewgh oela ha kyni war agas galarow ow tos warnowgh.

² Pedrys yw agas pythow ha dybrys gans goedhanes yw agas dillas.

³ Agas owr ha'gas arghans re gesknias, ha'ga hesknians a vydh dustuni er agas pynn ha dybri agas kig kepar ha tan. Hwi re guntellas tresor rag an dydhyow diwettha.

⁴ Otta, gobrow an wonisysi a vysas agas gwelyow hag a wrussowgh gwitha dhiworta yn fals, ymons ow karma; ha garmow an vysoryon re dhrehedhas diwskovarn Arloedh an luyow.

⁵ Hwi re vewas yn es hag yn plesour war an dor; hwi re vagas agas kolonn yn dydh ladhva.

⁶ Hwi re dhampnyas ha ladha an den gwiryon; ny sev ev orthowgh.

Perthyans ha Pysadow

⁷ Ytho, perthewgh, a vreder bys yn devedhyans an Arloedh. Otta, an tiek a worta frut drudh an dor, meur y berthyans yn y gever, erna dhegemmerro an glaw a-varr ha'n glaw diwedhes.

⁸ Perthewgh hwi ynwedh. Fastyewgh agas kolonn, rag devedhyans an Arloedh re dheuth nes.

⁹ Na wrewgh krodhvolas, a vreder, an eyl war y gila, ma na vewgh breusys. Otta, an breusydh a sev a-dherag an darasow.

¹⁰ Kemmerewgh, a vreder, yn ensampel a wodhevyans ha perthyans, an brofoesi a gewsis yn hanow an Arloedh.

¹¹ Otta, ni a's gelow gwynnvys, an re a dhuryas; duryans Job re wrussowgh klewes anodho, ha porpos an Arloedh a welsowgh, bos an Arloedh pur druedhek ha pitethus.

¹² Mes dres oll, ow breder, na liewgh na re'n nev, na re'n dor na gans li vydh arall, mes bedhes agas ‘Ya’ ya, ha'gas ‘Na’ na, ma na goetthowgh yn-dann vreus.

¹³ Eus nebonan ahanowgh grevys? Gwres ev pysi. Eus nebonan lowenek? Kanes ev salm.

¹⁴ Eus nebonan klav yn agas mysk? Gelwes ev henavogyon an eglos ha gwrens i pysi warnodho ha'y untya gans oyl yn hanow an Arloedh.

¹⁵ Ha pysadow fydh a wra sawya an klav, ha'n Arloedh a vynn y dhrehevel. Ha mar kwrug ev peghosow, y fydh henna gevys dhodho.

¹⁶ Ytho, yesewgh agas peghosow an eyl dh'y gila, ha pysewgh an eyl rag y gila, may fewgh yaghhes. Pur nerthek yw an pysadow effeythus a dhen gwiryon.

¹⁷ Elias o den kehaval y gnas dhyn ni hag ev a bysis yn pysadow na wrella glaw, ha glaw ny wrug war an dor teyr blydhen ha hwegh mis.

¹⁸ Hag arta ev a bysis, ha'n nev a ros glaw, ha'n dor a dhug y frut.

¹⁹ Ow breder, mar kwander nebonan ahanowgh dhiworth an gwir ha nebonan a'n dre arta dhodho,

²⁰ godhvydhes ev: neb a dreyl peghador a'y gammfordh a selow y enev a ankow, ha kudha peghosow pals.