Jamys 4 - An Bibel Kernewek 20234 (Kernewek Kemmyn)

Kerensa a'n Bys

¹ A-ble teu breselyow ha kasow yntredhowgh? A ny dhons i yn-mes a'gas hwansow usi owth omladh yn agas eseli?

² Yma hwans genowgh ha ny'gas beus. Hwi a ladh ha perthi avi heb galloes kavoes. Hwi a omladh ha breseli. Ny'gas beus rag na wovynnowgh.

³ Hwi a wovynn heb degemmeres, rag hwi a gammwovynn, may hyllowgh spena, ow siwya agas hwansow.

⁴ A avoutresow! A ny wodhowgh hwi kerensa an bys dhe vos eskarogeth erbynn Duw? Piwpynag a vynno bos koweth an bys a omwra eskar Duw.

⁵ Po a dybowgh an skryptor dhe leverel yn euver, ‘Trohag avi y yeun an spyrys a wrug ev dhe driga ynnowgh.’

⁶ Mes brassa gras y re ev; rakhenna y lever, ‘Duw a sev erbynn tus woethus, mes dhe dus uvel ev a re ras.’

⁷ Ytho, bedhewgh gostydh dhe Dhuw; mes sevewgh erbynn an jowl, hag ev a wra fia dhiworthowgh.

⁸ Dewgh nes dhe Dhuw, hag ev a dheu nes dhywgh hwi. Glanhewgh agas diwla, a beghadoryon, ha purhewgh agas kolonn, a dus dewblek agas brys.

⁹ Gwrewgh galari, ha kyni hag oela. Bedhes agas hwarth treylys dhe gynvann, ha'gas lowena dhe dristyns.

¹⁰ Omuvelhewgh a-dherag an Arloedh, hag ev a wra agas ughelhe.

Breusi Breder

¹¹ Na wrewgh kewsel an eyl erbynn y gila, a vreder. Neb a gews erbynn broder po a vreus y vroder a gews erbynn an lagha hag a vreus an lagha; ha mar preusewgh an lagha, nyns osta gwrier an lagha mes breusydh.

¹² Onan yw riyas an lagha ha breusydh, neb a yll selwel ha diswul. Piw osta jy, a vreus dha gentrevek?

Gwarnyans erbynn Bostya

¹³ Dewgh lemmyn, an re a lever, ‘Hedhyw po a-vorow ni a vynn mos a-ji dhe'n dre ma ha spena blydhen ena ha kenwertha, ha gul prow.’

¹⁴ Mes ny wodhowgh fatell vydh agas bewnans a-vorow. Ethenn owgh hwi owth omdhiskwedhes rag berr dermyn hag ena ow mos mes a wel.

¹⁵ Yn le henna, y koedh dhywgh leverel, ‘Mar mynn an Arloedh, ni a vew, ha gul hemma po henna.’

¹⁶ Mes lemmyn hwi a vost yn agas goeth. Oll bostya a'n par na yw drog.

¹⁷ Ytho neb a woer an pyth yw da dhe wul hag ev ny'n gwra, dhodho ev pegh yw.