Jamys 3 - An Bibel Kernewek 20234 (Kernewek Kemmyn)

An Taves

¹ Na vedhewgh meur ahanowgh dyskadoryon, ow breder. Hwi a woer ni, an dhyskadoryon dhe dhegemmeres breus poessa.

² Pubonan ahanan a gammwra yn lies tra. Den mar ny gammwra yn y lavar, gour perfydh yw hemma, hag ev a yll fronna an korf dien ynwedh.

³ Mar korryn fronn yn ganow margh may fo ev gostydh dhyn ni, y gorf dien ynwedh a lewyn ni.

⁴ Mirewgh orth an gorholyon ynwedh. Mar vras kyn fons i ha herdhys gans gwynsow krev, lewys yns i gans lew pur vyghan ple fo ervirys gans an lewyader.

⁵ Yndella an taves ynwedh yw esel byghan hag a vost taklow bras. Otta, ass yw byghan an tan, hag ass yw bras an koes a vydh leskys ganso!

⁶ Ha tan yw an taves, norvys kammhynseth. Settys yw an taves yn mysk agan eseli, ow mostya an korf dien hag ynflammya an ros a vewnans, ow kavoes y dan dhiworth ifarn.

⁷ Pub eghenn a vest hag edhen, a bryv ha bestes morek yw dovhes ha re beu dovhes gans mab-den,

⁸ mes an taves ny yll denvyth y dhovhe. Droktra direwl yw, leun a wenon marwel.

⁹ Ganso ev, ni a vennik an Arloedh ha Tas, ha ganso ev ni a volleth mab-den yw gwrys war-lergh hevelep Duw.

¹⁰ Yn-mes a'n keth ganow y teu ha bennath ha molleth. Nyns yw gwiw, ow breder, an taklow ma dhe hwarvos yndella.

¹¹ A dhyllo fenten dowr yr ha hwerow yn-mes a'n keth toll?

¹² A yll figbrenn, ow breder, ri greun olew, po gwinbrenn ri figys? Ynwedh ny yll fenten hoelan ri dowr yr.

¹³ Piw yntredhowgh yw fur ha skentel? Der y gonversashyon da, diskwedhes ev y wriansow yn uvelder furneth.

¹⁴ Mes mars eus avi hwerow ha strivyans genowgh yn agas kolonn, na wrewgh bostya, na gowleverel erbynn an gwir.

¹⁵ Nyns yw hemma furneth a dhiyskynn a-wartha, mes a'n bys, anspyrysel, dyowlek yw.

¹⁶ Le may ma avi ha strivyans yma deray ha pub drogober.

¹⁷ Mes an furneth a-wartha yw kyns oll glan, ena ow kara kres, klor, es y berswadya, leun a versi ha frut da, heb faverans, heb falsuri.

¹⁸ Ha frut ewnder yw hesys yn kres rag an re a wra kres.