Jamys 2 - An Bibel Kernewek 20234 (Kernewek Kemmyn)

Gwarnyans erbynn Faverans

¹ Ow breder, na synsewgh fydh agan Arloedh gloryus Yesu Krist, gans faverans dhe neb den.

² Mar teu gour owrek y vysies ha splann y dhillas a-bervedh yn agas kuntelles, ha mar teu ynwedh den boghosek, plos y dhillas,

³ ha hwi a vir orth neb a wisk an dillas splann ha leverel, ‘Esedh omma yn tyller da’, ha leverel dhe'n den boghosek, ‘Sav ena’, po ‘Esedh orth ow skavell-droes’,

⁴ a ny wrussowgh dissernya yntredhowgh ha mos ha bos breusydhyon drog agas prederow?

⁵ Goslowewgh, ow breder veurgerys. A ny dhewisas Duw an voghosogyon y'n bys dhe vos rych yn fydh ha heryon a'n wlaskor a ambosas dhe'n re a'n kar?

⁶ Mes hwi a dhisenoras an boghosek. A ny'gas begh an dus rych? A ny'gas tennons a-dherag lysyow breus?

⁷ A ny vlasfemyons i an hanow da a veu gelwys warnowgh?

⁸ Mar kollenwowgh yn hwir an lagha ryel war-lergh an skryptor, Ty a wra kara dha hynsa kepar dell gerydh dha honan, yn ta y hwrewgh hwi.

⁹ Mes mar plegyowgh dhe dremmynn neb den, pegh a wrewgh, ha dampnys owgh hwi gans an lagha avel peghadoryon.

¹⁰ Rag neb a with an lagha yn tien mes a drebuch yn unn dra, yn tien gyllys kablus yw ev.

¹¹ Rag neb a leveris ‘Na wra avoutri’, a leveris ynwedh, ‘Na wra denladh.’ Mar ny wre'ta avoutri mes denladh a wre'ta, devedhys osta peghador erbynn an lagha.

¹² Yndella leverewgh hag yndella gwrewgh, kepar ha tus a vons breusys dre lagha rydhses.

¹³ Rag an vreus a vydh heb tregeredh dhe neb na dhiskwa tregeredh. Tregeredh a drygh war vreus.

Fydh ha Gwriansow

¹⁴ Pyth yw an les, ow breder, mar lever den bos fydh ganso, mes nyns eus gwriansow? A yll fydh y selwel?

¹⁵ Broder po hwoer mars yns i noeth ha heb boes pub dydh,

¹⁶ ha mar lever nebonan ahanowgh dhedha, ‘Kewgh yn kres, bedhewgh toemm ha lenwys’, mes ny rowgh dhedha an taklow yw res dhe'n korf, pyth yw an les?

¹⁷ Yndella ynwedh, fydh hy honan, mar nyns eus gwriansow gensi, marow yw.

¹⁸ Mes nebonan a lever, ‘Yma fydh genes jy, ha gwriansow genev vy.’ Diskwa dhymm dha fydh jy heb gwriansow, ha my a vynn diskwedhes dhis ow fydh vy der ow gwriansow.

¹⁹ Ty a grys bos Duw onan. Yn ta y hwre'ta. An dhywolow ynwedh a grys, ha krena.

²⁰ A vynn'ta godhvos, a dhen koeg, bos euver fydh heb gwriansow?

²¹ A ny veu agan tas Abraham justifiys dre wriansow, hag ev owth offrynna y vab Ysak war an alter?

²² Ty a wel bos fydh ow kesoberi gans y wriansow ha bos fydh kowlwrys dre wriansow.

²³ Ha kollenwys veu an skryptor ow leverel, ‘Abraham a fydhyas yn Duw hag akontys veu hemma dhodho avel ewnder’, hag y'n gelwys, ‘Koweth Duw.’

²⁴ Ty a wel den dhe vos justifiys dre wriansow, a-der dre fydh yn unnsel.

²⁵ Hag y'n keth vaner, a ny veu Rahab an hora justifiys dre wriansow ha hi ow wolkomma an kannasow ha'ga dannvon alena dre fordh arall?

²⁶ Rag kepar dell yw an korf marow heb spyrys, yndella ynwedh, marow yw fydh heb gwriansow.