Jamys 1 - An Bibel Kernewek 20234 (Kernewek Kemmyn)

Salusyans

¹ Jamys, gwas Duw ha'n Arloedh Yesu Krist, dhe'n dewdhek loeth yw skattrys: Lowena dhywgh!

Fydh ha Furneth

² Tybewgh pup-tra dhe vos lowena, ow breder, pan goedhowgh yn provow divers,

³ ow kodhvos an prevyans a'gas fydh dhe wul perthyans.

⁴ Ha gwres perthyans kowlwul y ober may fewgh perfydh ha dien, heb bos dhywgh fowt travyth.

⁵ Mes mar fyll furneth dhe nebonan ahanowgh, govynnes ev orth Duw a re dhe bub den yn hel, heb keredhi, hag y fydh res dhodho.

⁶ Mes govynnes yn fydh heb doutya, rag neb a dhout yw kepar ha mordonn yw helghys ha tewlys der an gwyns.

⁷ Na dybes an den ma ev dhe dhegemmeres travyth dhiworth an Arloedh.

⁸ Gour dewblek y vrys yw brottel yn oll y fordhow.

Boghosogneth ha Rychys

⁹ Mes gwres bostya an broder uvel yn y ughelder,

¹⁰ ha'n den rych yn y uvelder, rag ev a dremen kepar ha bleujenn wyls.

¹¹ Rag an howl a sev gans an trethes ha gul dhe'n gwels gwedhra, ha'n vleujenn anodho a goedh, ha tekter y semlans yw diswrys. Y'n keth fordh an den rych a wedher yn mysk y wriansow.

Prevyans ha Temptyans

¹² Gwynnvys an gour a bes yn-dann brevyans rag, wosa bos prevys, ev a dhegemmer an gurun a vewnans a ambosas Duw dhe'n re a'n kar.

¹³ Na leveres denvyth a vo prevys, ‘Gans Duw prevys ov vy’; rag ny yll Duw bos prevys gans drog, ha ny brev ev y honan denvyth.

¹⁴ Mes prevys yw pub den yw tennys ha dynys der y dhrokhwansow ev.

¹⁵ Ena tebel-ewl, wosa omdhoen, a dhineyth peghadow, ha peghadow kowlwrys a dhineyth ankow.

¹⁶ Na vedhewgh toellys, ow breder veurgerys.

¹⁷ Pub ro da ha pub ro perfydh a dhiyskynn dhiworth a-wartha, ow tos yn-nans dhiworth an Tas a wolowys ha nyns eus chanj na skeus treylyans ganso.

¹⁸ Gans y vynnas ev, ev a'gan dineythis dre er a wiryonedh, may fen ni avel an kynsa frut a'y greaturs.

Klewes ha Gul an Ger

¹⁹ Godhvydhewgh hemma, ow breder veurgerys. Bedhes pub den skav dhe glewes, lent dhe gewsel, lent dhe serri.

²⁰ Rag ny wra sorr gour avonsya ewnder Duw.

²¹ Ytho, gorrewgh dhe-ves pub plosedhes ha drog dres eghenn, ha degemmerewgh yn uvel an ger plynsys ynnowgh, a yll selwel agas enev.

²² Bedhewgh gwrioryon a'n ger, heb bos goslowysi yn unnsel, owth omdoella.

²³ Rag den mars yw goslowyas a'n ger heb bos gwrier, ev yw kepar ha gour a wel y fas genesik yn gweder.

²⁴ Ev a wel y honan ha mos dhe-ves hag ankevi a-dhesempis py par den yw.

²⁵ Mes neb a vir y'n lagha berfydh a rydhses ha pesya ynno, heb bos goslowyas a ankev, mes gwrier an ober, gwynnvys vydh an den ma y'n pyth a wra.

²⁶ Mars eus neb den a breder y vos kryjyk, heb fronna y daves, mes ow toella y golonn ev, koeg yw kryjyans an den ma.

²⁷ Kryjyans glan hag andhefolys a-dherag Duw an Tas yw hemma; mos dhe vires orth omdhivasow ha gwedhwesow yn aga anken, hag omwitha dinamm dhiworth an bys.