Hosea 5 - An Bibel Kernewek 20234 (Kernewek Kemmyn)

Breus a Dheu Erbynn Yuda hag Ysrael

¹ Klewewgh hemma, a oferysi! Goslowewgh, chi Ysrael! Attendyewgh, A ji an myghtern! An vreus yw er agas pynn, drefenn agas bos antell orth Mispa, ha roes lesys war Tabor.

² An omsevysi yw gyllys down yn ladha. My a wra aga heredhi oll.

³ My a aswonn Efraym, hag Ysrael nyns yw kudhys ragov: rag lemmyn ty re wrug fornikasyon, A Efraym, hag Ysrael yw defolys.

⁴ Aga gweythresow ny's gas dhe dhehweles dh'aga Duw, rag bos spyrys a fornikasyon yn aga mysk, ha ny aswonnons an Arloedh.

⁵ Goeth Ysrael a dhest er y bynn; Ysrael hag Efraym a drebuch yn aga hammhynseth; Yuda ynwedh a drebuch gansa.

⁶ I a wra mos gans aga flokkys ha'ga gwarthek dhe hwilas an Arloedh, mes ny'n kevons; ev re gildennas anedha.

⁷ I re draytas an Arloedh, ha dineythi fleghes direyth. Lemmyn an loer nowydh a wra aga dybri war-barth gans aga rannow a dir.

⁸ Kenewgh an korn yn Gibea, an hirgorn yn Rama. Germewgh yn Beth-aven; war dha lergh Benyamin.

⁹ Efraym a vydh ynyal yn dydh an geredh. Yn mysk loethow Ysrael deklarya a wrav an pyth yw sur.

¹⁰ Pennsevigyon Yuda re dheuth ha bos avel an re a remov orven. My a wra diveri warnedha ow sorr avel dowr.

¹¹ Efraym yw arweskys, brewys yn breus, rag plegadow veu dhodho mos war-lergh euveredh.

¹² Rakhenna my a vydh avel gwennen worek dhe Efraym, hag avel podredhes dhe ji Yuda.

¹³ Efraym a welas y gleves, ha Yuda y woli, ena Efraym eth dhe Assyria, hag a dhannvonas dhe'n myghtern meur. Mes ny yll agas sawya, na yaghhe agas goli.

¹⁴ My a vydh avel lew dhe Efraym, hag avel lew yowynk dhe ji Yuda. My, my a wra skwardya ha mones; my a wra kemmeres, ha nagonan ny dhelirv.

¹⁵ My a wra mos ha dehweles dhe'm tyller, bys mayth aswonnons aga offens, ha hwilas ow fas; yn aga ahwer i a'm hwila dihwans.