Hosea 4 - An Bibel Kernewek 20234 (Kernewek Kemmyn)

Ysrael Kuhudhys gans Duw

¹ Klewewgh ger an Arloedh, mebyon Ysrael, rag yma dhe'n Arloedh ken erbynn trigoryon an tir. Nyns eus gwiryonedh, na tregeredh, nag aswonnvos Duw y'n tir.

² Mollethi, toella, ladha, ladra, hag avoutri – fenna a wrons; ha krow a hol krow.

³ Rakhenna an tir a dhesygh, ha myns eus trigys ynno a wedher, gans bestes an gwel, ydhyn an nevow; ynwedh puskes an mor a wra merwel.

⁴ Byttegyns bynner re striffyo denvyth, ha bynner re gerettho denvyth, rag er dha bynn yma ow hen, A oferyas.

⁵ Ty a drebuch dydhweyth, an profoes ynwedh a drebuch nosweyth, ha my a dhistru dha vamm.

⁶ Ow fobel yw kisys drefenn fowt a skians. Drefenn ty dhe nagha skians, my a wra dha nagha ma na vi oferyas ragov; drefenn ty dhe ankevi lagha dha Dhuw, my ynwedh a wra ankevi dha vebyon.

⁷ Dhe voy i a gressyas dhe voy i a beghas er ow fynn; my a dreyl aga splannder dhe veth.

⁸ I a dheber pegh ow fobel, ha hwansek yns dh'aga hammhynseth.

⁹ Kepar dell vydh rag an bobel, yndella y fydh rag an oferyas; my a wra aga hessydhya rag aga fordhow, ha'ga gobra rag aga gwriansow.

¹⁰ I a wra dybri ha ny vons lenwys; i a dheu ha bos horys ha ny ynkressyons, rag i dhe asa obaya dhe'n Arloedh.

Ysrael a Wordh Imajys

¹¹ Fornikasyon ha gwin ha gwin nowydh a gemmer dhe-ves an golonn.

¹² Ow fobel a wovynn kusul a'ga frenn, ha'n gwelenn a's gorthyp. An spyrys a horyans a wra dhedha mos yn stray, hag i a wra horyans a-dhiworth aga Duw.

¹³ War benn an menydhyow y sakrifions, ha war an bronnow y leskons offrynnow, yn-dann dherwenn, hag edhlenn wynn, ha terebinthenn, drefenn bos da aga skeus. Ytho agas myrghes a wra fornikasyon, ha'gas gohydhow a wra avoutri.

¹⁴ Ny wrav vy kessydhya agas myrghes pan wrons fornikasyon, na'gas gohydhow pan wrons avoutri, rag an wer a slynk dhe-ves gans horys, ha sakrifia gans horys-tempel: pobel heb konvedhes a vydh diswrys.

¹⁵ Kyn hwredh fornikasyon, a Ysrael, bynner re bo Yuda kablus. Na dhewgh hwi dhe Gilgal, na mos yn-bann dhe Beth-aven, na ti ‘Dell vew an Arloedh!’

¹⁶ Ytho Ysrael yw gorth avel lejek penn-kales. Lemmyn an Arloedh a's bugel avel oen yn pras efan.

¹⁷ Efraym yw keffrysyas imajys; gas e dhodho y honan!

¹⁸ Pan yw aga gwires dhe benn, i a vew avel horys; yn howtyn i a gar meth.

¹⁹ An gwyns a's maylyas yn hy eskelli, hag y fydhons methek a'ga sakrifisow.