Hosea 2 - An Bibel Kernewek 20234 (Kernewek Kemmyn)

¹ Leverewgh dh'agas breder, ‘Ammi’, ha dh'agas hwerydh, ‘Ruhama.’

Dislelder Ysrael: Kessydhyans ha Daspren

² Kuhudhewgh agas mamm, kuhudhewgh: rag nyns yw hi ow gwreg, ha nyns ov vy hy gour. Kemmeres hi hy dijastita mes a'y golok, ha'y avoutri dhiworth hy diwvronn,

³ ma na wrav vy hy destryppya noeth, ha'y gorra kepar hag yn dydh hy genesigeth; my a's gwrav avel gwylvos, ha'y settya avel syghtir, ha'y ladha gans syghes.

⁴ Ny gemmerav truedh a'y fleghes, rag fleghes avoutri yns i.

⁵ Aga mamm a wrug avoutri, hi neb a's omdhuk re oberis yn tivlas: rag hi a leveris, ‘My a hol ow haroryon, neb a re dhymm ow bara ha'm dowr, ow gwlan ha'm lin, ow oyl ha'm diwes.’

⁶ Rakhenna my a vynn keas dha fordh gans spern; ha'y degea gans fos, ma na gaffo hy hynsyow.

⁷ Hi a wra poenya war-lergh hy haroryon mes ny yll drehedhes dhedha; hi a's hwila, mes ny yll aga havoes. Ena hi a lever, ‘My a vynn mos, ha dehweles dhe'm kynsa gour; y feu gwell ragov ena es dell yw lemmyn.’

⁸ Ny wodhva hi, y feu my neb a ros dhedhi an ys, ha'n gwin, ha'n oyl, ha kressya hy arghans, ha'y owr a bareussons rag Baal.

⁹ Rakhenna my a dhaskemmer ow ys yn y brys, ha'm gwin yn y seson, ha kibya dhe-ves ow gwlan ha'm lin gansa may hwre hi kwetha hy noethedh.

¹⁰ Lemmyn my a wra diskudha hy meth a-rag dewlagas hy haroryon, ha nagonan ny's delirv dhiworth ow leuv.

¹¹ My a worr diwedh dhe oll hy heudhder: hy dy'goelyow, hy loeryow nowydh, hy sabotys, hag oll hy dy'goelyow apoyntys.

¹² My a wra difeythya hy gwinbrennyer ha'y figbrennyer, may leveris anedha, ‘Ow pewas yns i, a rosons ow haroryon dhymm.’ My a's gwra goedhel, ha bestes an gwel a's deber.

¹³ My a wra hy hessydhya rag dydhyow an Baalim, may leski offrynnow dhedha, hag omafina gans hy bysowyer ha'y gemmweyth, ha mos war-lergh hy haroryon, mes hi a'm ankovas, yn-medh an Arloedh.

¹⁴ Ytho, awotta, my a wra hy dynya, ha'y hembronk dhe'n difeyth, ha my a gows yn hegar dhedhi.

¹⁵ My a re dhedhi hy gwinlannow alena, ha nans Akor avel daras govenek. Ena hi a worthyp kepar hag yn dydhyow hy yowynkneth, kepar hag y'n jydh may teuthons yn-bann yn-mes a bow Ejyp.

¹⁶ Y'n jydh na, yn-medh an Arloedh, ty a'm gelow ‘Ow gour’, ha ny'm gelwydh byth moy ‘Ow Baal.’

¹⁷ My a gemmer henwyn an Baalim yn-mes a'y ganow, ha ny vydhons nevra kovhes orth aga henwyn.

¹⁸ Y'n jydh na my a wra kevambos ragdha, gans bestes an gwel, gans ydhyn an ebron, ha pryves an dor. My a dhral an warak, an kledha ha'n gas dhiworth an tir, ha my a's gwrav dhe wrowedha yn saw.

¹⁹ My a wra ambosa dhe'th temmedhi bys vynitha; my a wra ambosa dhe'th temmedhi yn ewnder ha gwirvreus, yn tregeredh hag yn truedh.

²⁰ My a wra ambos dhe'th temmedhi yn lenduri, hag ena ty a aswonn an Arloedh.

²¹ Y'n jydh na my a worthyp, yn-medh an Arloedh, my a worthyp dhe'n nevow, hag i a worthyp dhe'n nor.

²² Ha'n tir a worthyp dhe'n ys ha dhe'n gwin ha dhe'n oyl; hag i a worthyp dhe Yezreel.

²³ My a wra hy flansa ragov y'n tir. My a gemmer truedh a Lo-ruhama, ha leverel dhe Lo-ammi ‘Ty yw Ow fobel’; hag ev a lever, ‘Ty yw ow Duw.’