Hosea 13 - An Bibel Kernewek 20234 (Kernewek Kemmyn)

Breus an Arloedh war Ysrael

¹ Pan gewsi Efraym, yth esa krena; yth omughelhas yn Ysrael; mes pan beghas gans Baal ev a verwis.

² Lemmyn i a beghas hwath moy; i re wrug ragdha aga honan imajys teudh, delowyow gwrys a'ga arghans herwydh aga sleyghneth, i oll an ober a greftoryon. Leverir anedha, ‘Tus a wra sakrifis; i a amm dhe leughi!’

³ Rakhenna i a vydh avel kommolenn-vyttin, hag avel an gluth a dremen a-varr, hag avel us yw hwythys a leur-drushya gans an awel, hag avel mog a fenester.

⁴ Mes my re beu an Arloedh dha Dhuw a-ban veus yn pow Ejyp; ny wodhvydhydh Duw vyth a-der my, ha nyns eus selwador a-der my.

⁵ My a'th wodhya y'n gwylvos, yn tir a syghter.

⁶ Herwydh an peurwels yw dhedha y fons lenwys; lenwys vons, ha'ga holonn a veu goethus; rakhenna i a'm ankevis.

⁷ Ytho my a vydh avel lew dhedha, avel lewpard ow skolkya ryb an fordh.

⁸ My a dheu er aga fynn avel orses a gollas hy helyn, ha skwardya aga holonn mes a'ga brest, hag ena my a's devor avel lewes; goedhvil a wra aga frega.

⁹ A Ysrael, my a'th tistru: piw a vydh dha wereser?

¹⁰ Ple'ma dha vyghtern, ma'th sawyo? Ple'ma dha vreusysi yn oll agas sitys, ay leversys anedha, ‘Ro dhymm myghtern ha pennternedh’?

¹¹ My a ros dhis myghtern y'm sorr, ha my a'n kemmeras y'm konnar.

¹² Kammhynseth Efraym yw maylys, y begh yw gwithys yn kovadh.

¹³ An paynys a venyn yn lavur a dheu ragdho, mes ev yw mab anfur; pan dheu an prys ny yll ev dos dhe vin konna an brys.

¹⁴ My a's daspren dhiworth leuv ifarn; my a's delirv dhiworth ankow. Ple'mons dha blagys, A ankow? Ple'ma dha vros, A ifarn? Truedh a vydh kudhys dhiworth ow dewlagas.

¹⁵ Kyn hwra ev doen frut yn mysk y vreder, gwyns an Est a dheu, gwyns an Arloedh ow tos yn-bann dhiworth an difeyth. Y fenten a vydh desyghys, ha'y buth a hesk. Ev a byll pub lester drudh a'n dresorva.

¹⁶ Samaria a vydh kessydhys, rag hi a rebellyas erbynn hy Duw. I a goedh der an kledha; aga fleghesigow a vydh terrys dhe demmyn, ha'ga benynes veghyek a vydh skwardys igor.