Hosea 10 - An Bibel Kernewek 20234 (Kernewek Kemmyn)

Peghes Ysrael ha'y Gethneth

¹ Ysrael yw gwinbrenn lies-skorrek, a dheg frut pals. Dhe voy y frut, dhe voy y kressyas an alteryow; dhe voy dader y dir, dhe voy y hwrussons peulveyn teg.

² Aga holonn yw fals; lemmyn i a berth an kessydhyans a'ga offens. Ev a wra dralya aga alteryow, ha distrui aga feulveyn.

³ Lemmyn i a lever, ‘Ny'gan beus myghtern drefenn na berthsyn own a'n Arloedh. Mes pandr'a yll myghtern gul ragon?’

⁴ I a gews geryow, ow kowlia, ow kul kevambos; ha breus a egin avel kegis yn fynnglow an gwel.

⁵ Annedhysi Samaria a wra drem war leugh Beth-aven. Hy fobel a gyn warnodho, ha'y oferysi a oel war y wolewder, rag ev a vydh divres dhiworti.

⁶ Ev ynwedh a vydh dres dhe Assyria avel ro dhe'n myghtern meur. Efraym a'n jevydh meth, hag Ysrael a vydh methek a'y gusul.

⁷ Samaria ha'y myghtern a vydh degys dhe-ves avel barrenn war enep an dowr.

⁸ Tylleryow ughel Aven, pegh Ysrael, a vydh distruys. Spern hag askall a dyv dres aga alteryow. Ena yn-medhons dhe'n menydhyow, ‘Gorherewgh ni’, ha dhe'n brennow, ‘Koedhewgh warnan ni.’

⁹ A-dhia dhydhyow Gibea y peghsys, a Ysrael; ena y sevsons. A ny wrug bresel drehedhes dhe'n dhrogoberoryon yn Gibea?

¹⁰ My a wra aga hessydhya pan vynnav, ha kenedhlow a vydh kuntellys er aga fynn, pan vydhons kessydhys may hwrellons aga helmi rag aga hammweyth dewblek.

¹¹ Efraym yw avel lejek dyskys a gar drushya; mes my a worr yew war hy honna teg. My a wra hernessya Efraym, aras a wra Yuda, ha Yakob a gloes.

¹² Hesewgh dhywgh agas honan yn ewnder, mysewgh yn tregeredh, hag aras gwrewgh agas gweres anerys; prys yw dhe hwilas an Arloedh, bys may teffo ha gul dhe wiryonedh koedha warnowgh avel glaw.

¹³ Hwi re aras droktra, ha mysi anewnder, ha re dhyb'sowgh an frut a wowyow; rag ty a drestyas y'th fordh, yn niver bras dha gasoryon.

¹⁴ Tervans a dhrehav yn mysk dha bobel, hag oll dha gastylli a vydh distruys, kepar dell wrug Shalman distrui Beth-arbel yn dydh an gas, pan veu brewys an vamm gans hy fleghes.

¹⁵ Yndellma y fydh gwrys dhywgh, A Bethel, drefenn agas drogedh meur. Orth dydh-tardh, myghtern Ysrael a vydh kisys glan.