Habakkuk 2 - An Bibel Kernewek 20234 (Kernewek Kemmyn)

¹ Sevel a wrav war ow savla-gwitha hag omsettya war ow thour-goelyas ow mires dhe weles an pyth a vynn ev leverel dhymm, ha'n pyth a worthybav dhe'm krodhvol.

An Arloedh a Worthyp Arta

² Ha'n Arloedh a worthybis dhymm, ha leverel: Skrif an welesigeth yn tiblans war leghennow may poennyo neb a's red.

³ Rag an welesigeth yw hwath rag termyn apoyntys; hi a fisten dhe'n diwedh, ha ny wowlever: kyn hok hi, rag hi a dheu yn surredi, ny dhelat hi.

⁴ Awotta, goethus yw an den nag yw y enev ewn ynno, mes an den gwiryon a vew der y lelder.

Pymp Guw avel Breus erbynn Drogoberoryon

⁵ Rychys ynwedh yw fals, ny dhur an den goethus, neb re ledanhas y vryansenn avel ifarn, ha kepar hag ankow na yll bos gwalghys, mes ev a guntell a-dro dhodho oll an kenedhlow, hag assembla dhodho oll an poblow.

⁶ A ny wra oll an re na drehevel parabolenn er y bynn, ha henlavarow rag y skornya, ow leverel, ‘Go-ev neb a guntell war-barth pythow nag eus dhodho ev; (pes termyn y hwra henna pesya?) Beghys yw gans arwoestlow.’

⁷ A ny sev a-dhesempis dha gresysoryon? A ny dhifun an re a'th wra dhe grena? Ha ty a vydh preydh ragdha.

⁸ Rag ty dhe bylla lies kenedhel, an remenant oll a'n kenedhlow a'th pyll; drefenn goes mab-den, ha garowder erbynn tiryow, erbynn sitys, hag oll an dus usi trigys ynni.

⁹ Go-ev neb a gemmer tebel brow rag y ji, ow settya y neyth a-vann may fo delivrys dhiworth an leuv a dhrogober.

¹⁰ Ty re dhros meth dhe'th chi ow tistrui lies pobel, hag ow pegha erbynn dha enev dha honan.

¹¹ Rag an men a skrij dhiworth an fos, ha'n geber y'n prennweyth a'n gorthyp.

¹² Go-ev neb a dhrehav tre gans goes ha fondya sita war gammhynseth.

¹³ A nyns yw dhiworth Arloedh an luyow may lavur an poblow rag tan ha mayth yw an kenedhlow skwithys rag travyth?

¹⁴ Rag lenwys vydh an nor gans godhvos golewder an Arloedh, dell worher an dowrow an mor.

¹⁵ Go-ev neb a re dh'y gentrevek bolla dha wenon dhe eva, ha'y vedhwi ynwedh rag mires orth aga noethedh.

¹⁶ Lenwys os gans meth yn le golewder: yv ty ynwedh ha diskwa dha gudhgenn. An hanaf yn leuv dhyghow an Arloedh a dheu dhis ha disenor a vydh war dha wolewder.

¹⁷ Rag garowder erbynn Lebanon a'th kudh, ha ladhva an bestes a'th ownekha, drefenn goes mab-den, ha garowder erbynn tiryow, erbynn sitys, ha myns eus trigys ynna.

¹⁸ Py les eus dhe imaj gravys pan y'n gravyas y furvyer – imaj teudh ha dyskador gowyow? An furvyer a drest y wrians y honan, ow kul idolys avlavar!

¹⁹ Go-ev neb a lever dhe brenn, ‘Difun’, dhe ven avlavar, ‘Yn-sol!’ Dyskador ywa? Otta, gorlownys yw gans owr hag arghans, mes nyns eus spyrys vyth a-berth ynno.

²⁰ Mes yma'n Arloedh yn y dempel sans: tewes a-dheragdho oll an nor!