Habakkuk 1 - An Bibel Kernewek 20234 (Kernewek Kemmyn)

Habakkuk a Grodhvol a-dro dhe Gammhynseth

¹ An profoesans a welas Habakkuk an profoes yn gwelesigeth.

² Pes termyn, A Arloedh, y kriav rag gweres ha ny vynnydh goslowes; ‘Freudh!’ a armav dhis ha ny vynnydh sawya?

³ Prag y tiskwedhydh dhymm droktra, ha gul dhymm mires orth ahwer? Rag yma terroes ha freudh a-dheragov; yma strif, ha kedrynna a sev.

⁴ Rakhenna dinerth yw an lagha, ha ny a gwirvreus nevra yn-rag. Rag an tebelwas a omsett a-dro dhe'n den gwiryon; ytho kammvreus a yn-rag.

An Arloedh a Worthyp

⁵ Aspiewgh yn mysk an kenedhlow, ha mirewgh, ha bedhes dhywgh marth bras: rag yn agas dydhyow y hwrav ober na grysowgh, kyn fo derivys dhywgh.

⁶ Rag, otta, my a sord an Kaldeanys, kenedhel hwerow ha fysk, a geskerdh dre les an tir rag sesya annedhow nag esons dhedha.

⁷ Fell hag euthyk yns: aga breus ha'ga reowta a yn-rag a-dhiworta.

⁸ Skaffa ages lewpardes yw aga mergh, ha gwylsa yns ages bleydhi an gorthugher: aga marghogyon a boen yn-mes, ha'ga marghogyon a dheu dhiworth pell. I a nij kepar ha'n er a fisten dhe dhybri;

⁹ rag ravna i oll a dheu: i a dheu yn-rag yn aga leunder avel gwyns an howldrevel, ow kuntell kethyon avel tewes.

¹⁰ Hag i a skorn an vyghternedh, ha ges yw pennternedh ragdha: i a hwerth orth pub ker; i a wra tommenn rag hy hemmeres.

¹¹ Ena i a dremen kepar ha gwyns, ha mos dhe-ves; an dus kablus ma, aga nerth yw aga duw.

Habakkuk a Grodhvol Arta

¹² A ny veus a'n dalleth, A Arloedh, ow Duw sans? Ny verwyn. A Arloedh, ty re's ordenas rag breus; A Garrek, ty re's fondyas rag keredh.

¹³ Re bur yw dha dhewlagas rag gweles droktra, ha ny yllydh perthi drogober. Prag y firydh ytho orth an falswesyon, ha synsi dha daves pan dhevor an tebelwas an den yw moy gwiryon agesso?

¹⁴ Ha ty a wra tus kepar ha puskes an mor, kepar ha'n pryvyon, nag eus rewler dhedha.

¹⁵ Ev a gemmer peub anedha war-vann gans higenn, ha'ga thenna yn-mes gans y roes, ev a's kuntell yn y roes-draylya: rakhenna ev a lowenha ha heudhi.

¹⁶ Rakhenna yth offrynn dh'y roes ha leski offrynnow dh'y roes-draylya; rag bras yw y rann dredha, ha rych yw y boes.

¹⁷ A wakha ytho y roes heb hedhi, ow ladha kenedhlow yn tibita?