Galatianys 6 - An Bibel Kernewek 20234 (Kernewek Kemmyn)

Degewgh Beghyow Keskristonyon

¹ A vreder, mar pe nebonan kechys yn kammweythres, hwi, usi a'n Spyrys, restoryewgh den a'n par na yn spyrys a jentylys. Mir orthis dha honan, ma na vi temptys ynwedh.

² Degewgh agas beghyow an eyl a-barth y gila, hag yndella hwi a gollenow lagha Krist.

³ Rag mar tyb neb den y vos neppyth pan nag yw ev travyth, ev a omdoell.

⁴ Mes preves pubonan y ober y honan, hag ena y'n jevydh skila rag bostyans ynno ev y honan, a-der yn den arall;

⁵ rag pubonan a dheg y vegh y honan.

⁶ Neb yw katekumenus y'n ger, kevrennes gans an dyskador yn pup-tra yw da.

⁷ Na vedhewgh toellys: ny vydh Duw skornys. Rag pypynag a wra den y hasa, an keth henna a wra ev y vysi;

⁸ rag neb a wra hasa dh'y gig y honan, dhiworth an kig ev a wra mysi podredhes; mes neb a wra hasa dhe'n Spyrys, dhiworth an Spyrys y hwra ev mysi bewnans heb diwedh.

⁹ Yn masobereth na vedhen digolonnek; rag y'n prys ewn y hwren ni mysi mar ny glamderyn.

¹⁰ Ytho, hedre vo spas dhyn, gwren ni da dhe bubonan, ha kyns oll dhedha i usi a'n teylu a fydh.

Gwarnyans Diwettha

¹¹ Mirewgh ass yw bras an lytherennow may skrifis vy dhywgh gans ow dorn ow honan.

¹² An re a vynn gul omdhiskwedhyans teg y'n kig a'gas konstryn dhe vos trodreghys, unnsel ma na vons i helghys rag krows Krist.

¹³ Rag ny wra an re yw trodreghys obaya dhe'n lagha aga honan, mes i a vynn orthowgh bos trodreghys may hallons bostya yn agas kig.

¹⁴ Bynner re bo bostyans dhymmo vy, saw yn krows agan Arloedh Yesu Krist, ha dredhi an bys ma krowsys dhymm ha my dhe'n bys.

¹⁵ Rag ny amont mann naneyl trodreghyans nag antrodreghyans, saw unnsel kreasyon nowydh.

¹⁶ Ha kemmys a gerdh war-lergh an rewl ma, re bo kres warnedha ha tregeredh, ha war Ysrael Duw.

¹⁷ Alemma rag, bynner re wrello denvyth ri troblow dhymm; rag my a deg merkyow Yesu war ow horf.

¹⁸ Re bo gras agan Arloedh Yesu Krist gans agas spyrys, a vreder. Amen.