Galatianys 5 - An Bibel Kernewek 20234 (Kernewek Kemmyn)

Gwithewgh agas Rydhses

¹ Rag rydhses y hwrug Krist agan delivra; rakhenna sevewgh fast, na vedhewgh maglennys arta yn-dann yew a gethneth.

² Ottavy, Powl, ow leverel dhywgh, mar pydhowgh hwi trodreghys ny vydh Krist travyth dh'agas les.

³ Desta a wrav dhe bub den a dhegemmer trodreghyans y fydh kendoner dhe synsi oll an lagha.

⁴ Hwi yw diberthys dhiworth Krist, hwi neb yw justifiys der an lagha, koedhys dhiworth gras.

⁵ Rag ni, der an Spyrys, a wayt gans mall an govenek a ewnder, dre fydh.

⁶ Rag yn Krist Yesu ny wrer fors a drodreghyans nag a antrodreghyans, mes a fydh owth oberi dre gerensa.

⁷ Yth esewgh hwi ow poenya yn ta; piw a'gas lettyas a obaya dhe'n gwiryonedh?

⁸ Ny dheuth an tennvos dhiworth neb a'gas gelow.

⁹ Temmik a woell a wra dhe oll an toes sevel.

¹⁰ Fydhyans a'm beus yn agas kever y'n Arloedh, na vydh dhywgh tybyans nahen, mes neb a'gas ankomber a wra godhevel an dial piwpynag a vo.

¹¹ Mes my, a vreder, mar pregowthav vy hwath an trodreghyans, prag yth ov vy helghys hwath? Offens an grows re beu defendys ytho.

¹² My a vynnsa, yth omspattha aga honan an re a'gas ankomber.

¹³ Rag hwi a veu gelwys dhe rydhses, a vreder, saw na wrewgh dhe'n rydhses ri spas dhe'n kig, mes dre gerensa bedhewgh servysi an eyl dh'y gila.

¹⁴ Rag oll an lagha yw kollenwys yn unn lavar: ‘Kar dha gentrevek kepar dell omgerydh dha honan.’

¹⁵ Mar kwrewgh bratha ha lenki an eyl y gila bedhewgh war ma na vowgh konsumys an eyl gans y gila.

An Spyrys ha'n Kig

¹⁶ Y lavarav, kerdhewgh war-lergh an Spyrys, saw na wrewgh kollenwel lust an kig.

¹⁷ Rag an kig a wra hwansa kontrari dhe'n Spyrys, ha'n Spyrys kontrari dhe'n kig, rag an re ma yw kontrari an eyl dh'y gila, ma na wryllowgh gul an pyth a vynnowgh.

¹⁸ Saw mars owgh hwi ledys der an Spyrys, ena nyns esowgh hwi yn-dann an lagha.

¹⁹ Oberow an kig yw apert; an re ma yw fornikasyon, mostedhes, fara direwl,

²⁰ gordhyans idolys, pystri, kas, strif, envi, sorr, strif, fowt akord, eresys,

²¹ avi, medhwenep, kevewiow gwyls, ha traow a'n par na. Anedha my a lever dhywgh lemmyn, kepar dell wrugavy leverel kyns, oll an re a wrello taklow a'n par ma ny wrons erita gwlaskor Duw.

²² Mes frut an Spyrys yw kerensa, lowena, kres, perthyans, kuvder, dader, lenduri,

²³ jentylys, omrewl; nyns eus lagha vyth erbynn traow a'n par na.

²⁴ Seul eus dhe Grist Yesu re growsyas an kig, keffrys ha'n yeunesow ha'n hwansow.

²⁵ Mar pewyn der an Spyrys, kerdhyn ynwedh der an Spyrys.

²⁶ Na vedhen goethus, ow serri an eyl y gila, ow perthi avi an eyl a'y gila.