Galatianys 3 - An Bibel Kernewek 20234 (Kernewek Kemmyn)

Lagha po Fydh

¹ A hwi dus Galatia, dus foll! Piw re'gas husas, may feu diskwedhys dherag agas lagasow Yesu Krist dhe vos krowsys?

² Hemma unnsel a vynnav dyski genowgh: A dhegemmersowgh hwi an Spyrys der oberow an lagha po dre grysi an pyth a glewsowgh?

³ Owgh hwi mar foll? Hwi a dhallathas gans an Spyrys: esowgh owth assaya diwedha lemmyn gans an kig?

⁴ A wodhevsowgh kemmys yn euver – a pe yn euver devri?

⁵ Ev neb a dharbar ytho an Spyrys dhywgh hag oberi gans galloes ynnowgh, a wra ev y wul der oberow an lagha po dre fydhya y'n pyth a glewsowgh?

⁶ Kepar dell ‘fydhyas Abraham yn Duw hag akontys veu hemma dhodho avel ewnder’,

⁷ godhvydhewgh ytho an re ma, an dus mayth eus dhedha fydh, dhe vos mebyon Abraham.

⁸ Skryptor, ow ragweles Duw dhe justifia an Jentilys dre fydh, a dharganas an aweyl dhe Abraham: ‘An Jentilys oll a vydh benniges ynnos’,

⁹ ytho an re a fydh yw benniges war-barth gans Abraham, an den a fydh.

¹⁰ Rag myns a fydh yn oberow an lagha yn-dann volleth; rag skrifys yw, ‘Milliges yw pubonan na bes yn oll an gorhemmynnow skrifys yn lyver an lagha, orth aga gul.’

¹¹ Apert yw nag yw denvyth justifiys der an lagha a-wel dhe Dhuw, rag ‘An den gwiryon a vew dre fydh.’

¹² Nyns yw an lagha selys war fydh, mes, ‘Neb a wrello an oberow a vew ynna.’

¹³ Krist a'gan dasprenas dhiworth molleth an lagha hag ev gwrys molleth ragon, rag skrifys yw, ‘Milliges vydh peub yw kregys war brenn’,

¹⁴ may teffo bennath Abraham dhe'n Jentilys yn Krist Yesu, may kemmerryn ni ambos an Spyrys dre fydh.

An Lagha ha'n Ambos

¹⁵ A vreder, my a gews herwydh ensampel den a'n bys ma. Kemmynnskrif neb den, pan vo fastys, ny'n defend denvyth, na ny worr denvyth gorhemmynnow erell ynno.

¹⁶ Y feu leverys an ambosow dhe Abraham ‘Ha dh'y hasenn.’ Ny leverir ‘Ha dhe'n hasennow’, kepar dell ve a-dro dhe lies, mes a-dro dhe onan, ‘Ha dhe'th hasenn’, hag yw Krist.

¹⁷ Mes my a lever hemma: kevambos fastys kyns gans Duw, nyns yw defendys gans an lagha a dheuth peswar kans blydhen ha deg warn ugens a-wosa, may fo an ambos diswrys.

¹⁸ Rag mars yw an eretons devedhys a'n lagha nyns usi ev a'n ambos namoy; Duw a'y ras a'n ros dhe Abraham dre gevambos.

¹⁹ Prag ytho an lagha? Keworrys veu drefenn drogoberow, erna dheffo an hasenn may feu gwrys dhedhi an ambos, ordenys der eledh, yn leuv mayn.

²⁰ Nyns yw mayn neppyth unnsel rag unn parti, mes Duw yw onan.

Porpos an Lagha

²¹ Ytho yw an lagha erbynn ambosow Duw? Bynner re bo! Rag mar pe lagha res a allsa bewhe, ewnder a via devri dhiworth lagha;

²² mes an Skryptor re dhegeas pup-tra yn-dann begh may fo an ambos dre fydh yn Yesu Krist res dhe'n re a grys.

²³ Kyns bos fydh devedhys, yth eson ni gwithys yn-dann lagha, prisonys bys pan ve an fydh diskudhys wortiwedh,

²⁴ ytho an lagha o agan mester orth agan dri war-tu ha Krist, rag may fen ni justifiys dre fydh;

²⁵ ha fydh devedhys, nyns on ni yn-dann vester namoy.

²⁶ Rag yth owgh hwi oll mebyon Duw dre fydh yn Krist Yesu,

²⁷ rag myns ahanowgh a veu besydhys yn Krist a wiskas Krist.

²⁸ Ny yllir bos namoy Yedhow na Grek, na keth na den rydh, na gorow na benow, rag yth owgh hwi oll onan yn Krist Yesu,

²⁹ ha mars owgh hwi dhe Grist, ytho yth owgh hwi has Abraham, heryon herwydh ambos.