Filippianys 4 - An Bibel Kernewek 20234 (Kernewek Kemmyn)

Kusul ha Kennerth

¹ Ytho, ow breder garadow, ha my hirethek war agas lergh, ow lowena ha'm kurun, sevewgh fast yndella y'n Arloedh, a garadowyon.

² My a bys Ewodyas ha my a bys Syntyke a vos a'n keth brys y'n Arloedh.

³ Dhe wir, my a'th pys ynwedh, a yew-was len, may hweressi an benynes a lavuryas genev y'n aweyl, gans Klemens ynwedh ha'm kesoberoryon erell, neb usi aga henwyn y'n lyver a vewnans.

⁴ Lowenhewgh pup-prys y'n Arloedh; arta y lavarav, lowenhewgh.

⁵ Agas klorder bedhes aswonnys dhe bub den oll. Ogas yw an Arloedh.

⁶ Na vedhewgh prederus a dravyth mes yn pup-tra, dre bysadow ha govynnadow gans grasyans, bedhes an taklow a wovynnsowgh godhvedhys dhe Dhuw.

⁷ Ha kres Duw a dremen pub konvedhes a wra gwitha agas kolonn ha'gas brys yn Krist Yesu.

⁸ Wor'tiwedh, a vreder, pypynag a vo gwir, pypynag a vo onest, pypynag a vo gwiryon, pypynag a vo glan, pypynag a vo plegadow, pypynag a vo gerys-da, mars eus vertu, mars eus gordhyans, prederewgh a'n taklow ma.

⁹ Ha'n taklow a dhys'sowgh ha degemmeres ha klewes ha gweles ynnov, gwrewgh an re ma; ha'n Duw a gres a vydh genowgh.

Aswonnvos a Ro Tus Filippi

¹⁰ Mes my a lowenhas yn feur y'n Arloedh, rag hwi dhe wul dh'agas preder a-dro dhymm dasvleujyowa – hwi a wre prederi yn hwir, mes nyns esa spas dhywgh.

¹¹ Nyns yw, my dhe gewsel a-dro dhe edhomm, rag my re dhyskas bos kontentys, pypynag a vo ow studh.

¹² My a woer an fordh dhe vos uvelhes, ha my a woer an fordh dhe balshe; pup-prys hag yn pup-tra my re dhyskas bos lenwys ha bos nownek, ha palshe ha bos yn esow.

¹³ My a yll gul pup-tra dredho ev neb a re dhymm nerth.

¹⁴ Byttegyns, hwi a wrug yn ta, ow kevrenna y'm anken.

¹⁵ Godhvydhewgh hwi ynwedh, a dus Filippi, yn dalleth an aweyl, pan yth yn-mes a Makedonia, na gevrennas genev eglos vyth y'n mater a ri ha degemmeres, marnas hwi yn unnsel.

¹⁶ Rag yn hwir, hwi a dhannvonas dhe'm edhomm unnweyth ha diwweyth yn Thessalonika.

¹⁷ Nyns yw my dhe hwilas an ro; mes my a hwila an frut owth ynkressya dh'agas reken.

¹⁸ Pup-tra a'm beus hag y palshav; lenwys ov vy ow tegemmeres taklow dhiworthowgh der Epafroditus, sawer plegadow, sakrifis kemmeradow ha plegadow dhe Dhuw.

¹⁹ Ha'm Duw a lenow oll agas edhomm herwydh y rychys yn splannder yn Krist Yesu.

²⁰ Lemmyn dh'agan Duw ha'gan Tas re bo gordhyans trank heb worfenn. Amen.

Salusyans Diwettha

²¹ Salusewgh pub sans yn Krist Yesu. An vreder usi genev a's dynnergh.

²² An syns oll a'gas dynnergh, dres oll an re usi yn mayni Sesar.

²³ Gras an Arloedh Yesu Krist re bo gans agas spyrys.