Ezekiel 9 - An Bibel Kernewek 20234 (Kernewek Kemmyn)

Ladhva an Re a Wordh Idolys

¹ Ena ev a grias y'm diwskovarn gans lev ughel, ow leverel: ‘Deus nes, hwi an re ordenys dhe gessydhi a'n sita, peub gans y arv a dhistruyans yn y leuv.’

² Hag otta, hwegh gour ow tos dhiworth fordh an yet wartha, a vir troha'n gledhbarth, peub gans arv a dhistruyans yn y leuv. Unn gour yn aga mysk o gwiskys yn lien gans daffar skrifyas war y glun. I a dheuth a-ji, ha sevel ryb an alter a vrons.

³ Ha glori Duw Ysrael eth yn-bann a-dhiwar an cherub may fia warnodho, dhe dreudhow an chi. Ev a elwis dhe'n gour o gwiskys yn lien gans daffar skrifyas war y glun;

⁴ ha'n Arloedh a leveris dhodho, ‘Tremen der an sita, dre Yerusalem, ha gwra merk war dal an wer usi owth hanasa ha kyni war oll an taklow kasadow gwrys a-berth ynni.’

⁵ Dhe'n re erell y leveris, ha my ow klewes, ‘Tremenewgh dre'n sita war y lergh ha gweskewgh; na wres agas lagas kemmeres truedh, ha na gemmerewgh piteth.

⁶ Ledhewgh henavek, den yowynk, ha gwyrghes, ha flogh, ha benynes; mes pub gour may ma an merk warnodho na dhewgh nes dhodho. Dallethewgh dhiworth ow sentri.’ Ytho i a dhallathas gans an henavogyon esa a-rag an chi.

⁷ Ena yn-medh ev dhedha, ‘Defolewgh an chi ha lenwewgh an klosyow a'n re ledhys. Kewgh!’ Ytho i eth dhe-ves ha gweskel y'n sita.

⁸ Pan esons ow kweskel, ha my gesys ow honan, my a goedhas war ow fas ha garma, ha leverel, ‘Ogh Arloedh Duw! A dhiswredh oll remenant Ysrael, ha ty ow tiveri dha gonnar war Yerusalem?’

⁹ Hag yn-medh ev dhymm, ‘Anewnder chi Ysrael ha Yuda yw pur, pur vras; an tir yw leun a woes, ha'n sita yw leun a gammder; rag yn-medhons, “An Arloedh re forsakyas an tir, ha ny wel an Arloedh.”

¹⁰ Ytho ow lagas ny gemmer truedh, ha ny gemmerav piteth, mes my a dhre aga fordh war aga fenn.’

¹¹ Ena an gour gwiskys yn lien, gans daffar skrifyas war y glun, a worthybis, ow leverel: ‘My re wrug dell worhemmynsys dhymm.’