Ezekiel 6 - An Bibel Kernewek 20234 (Kernewek Kemmyn)

Profoesans erbynn Menydhyow Ysrael

¹ Ger an Arloedh a dheuth dhymm, ow leverel:

² Mab den, sett dha fas war-tu ha menydhyow Ysrael, ha profoes dhedha,

³ ha lavar, Menydhyow Ysrael, goslowewgh ger an Arloedh Duw. Yndellma y lever an Arloedh Duw dhe'n menydhyow ha dhe'n brennow, dhe'n goverow ha dhe'n nansow, Awottavy ow tri warnowgh kledha, ha my a dhistru agas tylleryow ughel.

⁴ Agas alteryow a vydh forsakys, ha'gas alteryow ynkys a vydh terrys, ha my a dewl dhe'n leur agas re ledhys a-rag agas idolys.

⁵ My a worr korfow mebyon Ysrael a-rag aga idolys, ha skattra agas eskern a-dro dh'agas alteryow.

⁶ Yn oll agas annedhow an sitys a vydh difeythys; agas tylleryow ughel a vydh distruys, may fydh agas idolys terrys ha diswrys, agas alteryow ynkys treghys dhe'n dor, ha'gas oberow defendys dhe-ves.

⁷ An re ledhys a goedh yn agas mysk, ha hwi a woer my dhe vos an Arloedh.

⁸ Mes my a as remenant; re ahanowgh a skap an kledha yn mysk an kenedhlow, pan vydhowgh skattrys y'n gwlaskordhow.

⁹ An re ahanowgh a skap a wra ow kovhe y'n kenedhlow mayth yns i degys yn kethneth, fatell ov vy terrys gans aga holonn avoutrek a dreylyas a-dhiworthiv, ha gans aga dewlagas ow horya war-lergh aga idolys. Kasa aga honan a wrons dre reson an drogow a wrussons rag oll aga thaklow kasadow.

¹⁰ Hag i a woer my dhe vos an Arloedh; ny gewsis yn euver my dhe wul dhedha an terroes ma.

¹¹ Yndellma y lever an Arloedh Duw: Tak dha dhiwla ha stank dha droes, ha lavar, Ellas rag oll an taklow kasadow vil a ji Ysrael, rag i a goedh der an kledha, dre dhivoetter, ha dre blag.

¹² Neb yw a-bell a verow der an plag, ha neb yw ogas a goedh der an kledha, ha neb yw gesys po gwithys a verow dre dhivoetter. Yndella my a gowlwra ow honnar warnedha.

¹³ Ena hwi a woer my dhe vos an Arloedh, pan vydh aga re ledhys yn mysk aga idolys a-dro dh'aga alteryow, war bub bronn ughel, war oll pennow an menydhyow, hag yn-dann bub gwydhenn las, hag yn-dann bub terebinthenn dhelyek, le may rosons ena sawer plegadow dhe oll aga idolys.

¹⁴ My a ystynn ow leuv warnedha ha gul an tir ynyal, dhiworth an difeyth bys Dibla, yn oll aga thrigvaow. Ena i a woer my dhe vos an Arloedh.