Ezekiel 48 - An Bibel Kernewek 20234 (Kernewek Kemmyn)

Rannow a Loethow

¹ An re ma yw henwyn an loethow. Dhiworth or an gogledh, war fordh Hethlon, dhe Lebo-hamath, bys Hasar-enan, usi war or Damaskus troha'n gogledh, ryb Hamath: dhiworth tenewen an est dhe'n west: y fydh unn rann dhe Dan.

² Ryb or Dan, dhiworth tenewen an est bys tenewen an west, unn rann dhe Asher.

³ Ryb or Asher dhiworth tenewen an est bys tenewen an west, unn rann rag Naftali.

⁴ Ryb or Naftali, dhiworth tenewen an est bys tenewen an west, unn rann dhe Manasse.

⁵ Ryb or Manasse, dhiworth tenewen an est bys tenewen an west, unn rann dhe Efraym

⁶ Ryb or Efraym, dhiworth tenewen an est bys tenewen an west, unn rann dhe Rewben.

⁷ Ryb or Rewben, dhiworth tenewen an est bys tenewen an west, unn rann dhe Yuda.

⁸ Ryb or Yuda, dhiworth tenewen an est bys tenewen an west, y fydh an offrynn a offrynnowgh, pymp warn ugens a vilyow y les, ha'y hirder kepar ha'n rannow erell, dhiworth tenewen an est bys tenewen an west; ha'n sentri a vydh y'n kres anodho.

⁹ An offrynn a offrynnowgh dhe'n Arloedh a vydh pymp warn ugens a vilyow y hirder ha deg mil y les.

¹⁰ An re ma a vydh an offrynn sans rag an oferysi: y'n gogledh, pymp warn ugens a vilyow, hag y'n howlsedhes deg mil y les, hag y'n est deg mil y les, hag y'n soth pymp warn ugens a vilyow y hirder; ha'n sentri a vydh y'n kres anodho.

¹¹ Y fydh rag an oferysi sakrys, mebyon Sadok, a withas ow charj, ha nag ethons yn sowdhan, dell wrug an Levysi.

¹² Y fydh dhedha avel offrynn arbennik dhiworth offrynn sans an tir, tyller moyha sans, ryb or an Levysi.

¹³ Ryb or an oferysi y fydh offrynn dhe'n Levysi pymp warn ugens a vilyow y hirder ha deg mil y les. Oll an hirder a vydh pymp warn ugens, ha'n hirder deg mil.

¹⁴ Ny werthons travyth anodho, na'y geschanjya. Ny'n statyons, rag an gwella tir yw, ha sans dhe'n Arloedh.

¹⁵ An pymp mil yn les yw gesys, ha'n pymp warn ugens a vilyow yn hirder, a vydh tyller na veu sakrys rag an sita dhe wul devnydh anodho, rag annedhow, ha rag peurvaow. An sita a vydh y'n kres anodho.

¹⁶ An re ma a vydh hy musuryow: yn tenewen an gogledh peswar mil pymp kans, yn tenewen an soth, peswar mil pymp kans, yn tenewen an est peswar mil pymp kans, hag yn tenewen an west peswar mil pymp kans.

¹⁷ Y fydh peurva dhe'n sita: y'n gogledh dew kans ha hanter-kans, y'n soth dew kans ha hanter-kans, y'n est dew kans ha hanter-kans, hag y'n west dew kans ha hanter-kans.

¹⁸ Remenant an hirder ryb an offrynn sans a vydh deg mil y'n est, ha deg mil y'n west; y fydh ryb an offrynn sans. Y askorr a vydh boes rag oberoryon an sita.

¹⁹ Oberoryon an sita dhiworth oll loethow Ysrael a wra y gonedha.

²⁰ Oll an offrynn a vydh pymp warn ugens a vilyow orth pymp warn ugens a vilyow, pedrek. Ty a offrynn an offrynn sans war-barth gans perghennogeth an sita.

²¹ An remenant war dhew denewen an offrynn sans ha perghennogeth an sita a vydh rag an pennsevik. Y fydh owth ystynn dhiworth pymp warn ugens a vilyow an offrynn troha or an est, ha troha'n west a-dal an pymp warn ugens a vilyow bys or an west, kettuel gans rannow an loethow; y fydh rag an pennsevik. An offrynn sans gans an sentri a vydh y'n kres anodho.

²² Perghennogeth an Levysi ha perghennogeth an sita a vydh yn kres an pyth usi dhe'n pennsevik. Perghennogeth an pennsevik a vydh ynter or Yuda hag or Benyamin.

²³ Remenant an loethow: y fydh dhe Benyamin unn rann, dhiworth tenewen an est bys yn tenewen an west.

²⁴ Ryb or Benyamin, dhiworth tenewen an est bys tenewen an west, unn rann dhe Simeon.

²⁵ Ryb or Simeon, dhiworth tenewen an est bys tenewen an west, unn rann dhe Yssakar.

²⁶ Ryb or Yssakar, dhiworth tenewen an est bys tenewen an west, unn rann dhe Zebulun.

²⁷ Ryb or Zebulun, dhiworth tenewen an est bys tenewen an west, unn rann dhe Gad.

²⁸ Ryb or Gad dhe denewen an soth, an or a vydh dhiworth Tamar dhe dhowrow Meribath-kadesh, ena ryb an avon bys an Mor Bras.

²⁹ Hemm yw an tir a wredh y ranna avel eretons ow tewlel prenn rag loethow Ysrael, ha'n re ma yw aga rannow, yn-medh an Arloedh Duw.

³⁰ An re ma yw an fordhow yn-mes a'n sita: yn tenewen an gogledh, yw peswar mil pymp kans orth musur,

³¹ yetys an sita a vydh war-lergh henwyn loethow Ysrael, teyr yet y'n gogledh, yet Rewben onan, yet Yuda onan, yet Levi onan.

³² Yn tenewen an est, yw peswar mil pymp kans, teyr yet: yet Yosep onan, yet Benyamin onan, yet Dan onan.

³³ Yn tenewen an soth, yw peswar mil pymp kans orth musur, teyr yet, yet Simeon onan, yet Yssakar onan, yet Zebulun onan.

³⁴ Yn tenewen an west, yw peswar mil pymp kans orth musur, teyr yet, yet Gad onan, yet Asher onan, yet Naftali onan.

³⁵ An kompas yw etek mil. Ha hanow an sita a-dhia'n jydh na a vydh: Yma an Arloedh Ena.