Ezekiel 47 - An Bibel Kernewek 20234 (Kernewek Kemmyn)

Dowr ow Resek dhiworth an Tempel

¹ Ena ev a'm dros arta dhe entrans an tempel; hag otta, yth esa dowr ow resek a-dhann dreudhow an tempel troha'n est (rag yth esa an tempel ow mires troha'n est); hag yth esa an dowr ow resek a-dhann denewen soth an tempel, a'n soth dhe'n alter.

² Ena ev a'm dros yn-mes der yet an gogledh, ha'm ledya a-dro a'n tu a-ves bys an yet a-ves a vir troha'n est; hag otta, yth esa dowr ow resek yn-mes a denewen an soth.

³ Pan eth an gour yn-mes gans kordenn-vusura yn y leuv, ev a vusuras mil gevelin, hag ena ev a'm ledyas der an dowr, a dheuth bys y'n dhewufern.

⁴ Arta ev a vusuras mil ha'm ledya der an dowr, hag esa bys y'n dhewufern. Ena ev vusuras mil arall ha'm ledya der an dowr, hag a veu bys y'n dhiwglun.

⁵ Arta ev a vusuras mil, hag yth o avon na yllis vy tremena dresti, rag an dowr re dhrehavsa lowr dhe neuvya ynno, avon na yllys tremena dredhi.

⁶ Yn-medh ev dhymm, ‘Mab den, a welsys hemma?’ Ena ev a'm ledyas ha'm dri arta dhe lann an avon.

⁷ Wosa my dhe dhehweles, otta, war lann an avon gwydh pals, pur lies, war dhiw lann an avon.

⁸ Yn-medh ev dhymm, ‘Yma'n dowr ma ow resek yn-mes troha ranndir an est, hag ow mos yn-nans dhe'n Araba; pan dheu bys y'n mor, bys yn mor an dowrow trenk, an dowr a vydh yaghhes.

⁹ Plepynag yth a an avon, pub kreatur bew ow hesya a vew, hag y fydh puskes pur lies drefenn an dowrow a dheu di. Y fydhons yaghhes, ha pup-tra a vew plepynag a dheu an avon.

¹⁰ Tus a sev ryb an mor ow pyskessa; dhiworth En-gedi ha bys En-eglaym y fydh tylleryow rag lesa roesow. An puskes a vydh a lies kinda, kepar ha puskes an Mor Bras, pur lies.

¹¹ Mes ny vydh yaghhes y wernow ha'y halow; i a vydh gesys rag hoelan,

¹² Ryb an avon, war hy diw lann, y tyv gwydh a bub kinda rag boes, ma na wedher aga del, na ny fyll aga frut, mes i a dheg frut nowydh, rag bos aga dowrow dhiworth an sentri. Aga frut a vydh rag boes, ha'ga del rag yaghheans.’

Oryon Nowydh an Tir

¹³ Yndellma y lever an Arloedh Duw: An re ma yw an oryon may hwrewgh ranna an tir avel eretons rag an dewdhek loeth a Ysrael. Y fydh diw rann dhe Yosep.

¹⁴ Hwi a'n rann yntredha gans an eyl eretons kepar ha'y gila. My a dos gans ow leuv drehevys y ri dh'agas tasow, ha'n tir ma a goedh dhywgh avel agas eretons.

¹⁵ Hemma a vydh or an tir: Yn tu an orth, dhiworth an Mor Bras dre fordh Hethlon dhe Lebo-hamath, hag yn-rag dhe Sedad,

¹⁶ Berotha, Sibraym (usi ynter or Damaskus hag or Hamath), bys Haser-hattikon, usi ryb or Hawran.

¹⁷ Ytho an or a vydh dhiworth an mor dhe Hasar-enan, usi a'n gogledh dhe or Damaskus, gans or Hamath dhe'n gogledh. Hemma a vydh tenewen an gogledh.

¹⁸ Yn tenewen an est, an or a vydh yntra Hawran ha Damaskus; ha dhiworth Gilead ha pow Ysrael orth an Yordan; dhe vor an est bys yn Tamar. Hemma a vydh tenewen an est.

¹⁹ Yn tenewen an soth y fydh dhiworth Tamar bys dowrow Meribath-kadesh, ena ryb an avon dhe'n Mor Bras. Hemma a vydh or an soth.

²⁰ Yn tenewen an west, an Mor Bras yw an or bys yn tyller a-dal Lebo-hamath. Hemma a vydh tenewen an west.

²¹ Yndella hwi a rann an tir ma yntredhowgh, herwydh loethow Ysrael.

²² Hwi a'n rann ow tewlel prenn avel eretons dhywgh ha rag an alyons yw trigys yntredhowgh ha dhedha fleghes dineythys yn agas mysk. I a vydh ragowgh avel Ysraelysi teythyek; i a's tevydh eretons yn mysk loethow Ysrael.

²³ Yn py loeth pynag a vo an alyons trigys, ena hwi a rann dhedha aga eretons, yn-medh an Arloedh Duw.