Ezekiel 45 - An Bibel Kernewek 20234 (Kernewek Kemmyn)

An Rannvro Sans

¹ Pan vydhowgh ow tewlel prenn dhe ranna an tir avel eretons, hwi a re offrynn dhe'n Arloedh, rann a'n tir avel rannvro sans, pymp warn ugens a vilyow hy hirder hag ugens mil hy les. Hi a vydh sans a-ji dhe oll hy oryon a-dro.

² Anedhi y fydh rann bedrek rag an sentri, pymp kans hy hirder ha pymp kans hy les, ha spas igor a hanter-kans kevelin a-dro dhedhi.

³ Y'n rannvro sans ty a vusur rann a bymp warn ugens a vilyow hy hirder, ha deg mil hy les; ynni y fydh an sentri, an tyller an moyha sans.

⁴ Rann sans an tir a vydh dhe'n oferysi, menystrys an sentri, an re a dheu nes dhe venystra dhe'n Arloedh; hag y fydh tyller rag aga chiow ha tyller sans rag an sentri.

⁵ Hag y fydh rann pymp warn ugens a vilyow hy hirder ha deg mil hy les rag an Levysi a venyster y'n tempel avel aga ferghennogeth rag sitys dhe driga ynna.

⁶ Hwi a re perghennogeth an sita, pymp mil hy les ha pymp warn ugens a vilyow hy hirder, ryb tenewen an rann sans; y fydh rag oll chi Ysrael.

⁷ Rag an pennsevik y fydh an tir war dhew denewen an rann sans ha perghennogeth an sita, ryb tenewen an rann sans ha perghennogeth an sita, a'n howlsedhes hag a'n howldrevel, ha'n hirder kettuel gans an rannow dhiworth or an howlsedhes bys yn or an howlsevel

⁸ An tir ma a vydh y berghennogeth yn Ysrael. Ny wra ow fennsevigyon arwaska ow fobel na fella, mes i a re an tir dhe ji Ysrael war-lergh aga loethow.

⁹ Yndellma y lever an Arloedh Duw: Lowr yw, a bennsevigyon Ysrael! Hepkorrewgh garowder ha ravna, ha gwrewgh gwirvreus hag ewnder; na wrewgh tewlel ow fobel yn-mes a'ga ferghennogeth na fella, yn-medh an Arloedh Duw.

Poesow ha Musuryow

¹⁰ Y fydh dhywgh mantolyow ewn, hag efa ewn ha bath ewn.

¹¹ An efa ha'n bath a vydh kemusur, an bath unn degves rann a homer, ha'n efa unn degves rann a homer; an homer a vydh an musur savonek.

¹² An shekel a vydh ugens gera. An sommenn a ugens shekel ha pymp shekel warn ugens ha pymthek shekel a vydh agas mina.

Offrynnow

¹³ Hemm yw an offrynn a wrewgh: unn hweghves rann a efa dhiworth pub homer a waneth, hag unn hweghves rann a efa dhiworth pub homer a heydh,

¹⁴ An ordenans rag oyl yw unn degves rann a bath dhiworth pub kor (yma deg bath yn unn kor, kepar hag y'n homer);

¹⁵ hag unn dhavas dhiworth pub flokk a dhew kans dhiworth peurvaow dowrhes Ysrael. Hemm yw rag an offrynn greun, ha'n offrynn leskys ha'n offrynn kres, dhe wul prenedh ragdha, yn-medh an Arloedh.

¹⁶ Oll pobel an tir a re an offrynn ma rag pennsevik Ysrael.

¹⁷ Dever an pennsevik a vydh ri an offrynnow leskys, offrynnow greun, hag offrynnow diwes y'n goelyow, y'n loeryow nowydh hag y'n sabotys, oll an goelyow apoyntys a ji Ysrael; ev a brovi an offrynnow pegh, an offrynnow greun, an offrynnow leskys, ha'n offrynnow kres, dhe wul prenedh rag chi Ysrael.

Goelyow

¹⁸ Yndellma y lever an Arloedh Duw: Y'n kynsa mis, yn kynsa dydh an mis, ty a gemmer tarow yowynk heb namm, ha ty a burha an sentri.

¹⁹ An oferyas a gemmer neppyth a woes an offrynn pegh ha'y worra war bostow darasow an tempel, peswar kornell min gwartha an alter, ha war bostow yet an klos a-bervedh.

²⁰ Ty a wra yndella yn seythves dydh an mis rag gour a beghas heb y wodhvos, po dre sempledh ty a wra prenedh rag an tempel.

²¹ Y'n kynsa mis, yn peswardhegves dydh an mis, y fydh dhywgh an pask, goel a seyth dydh; bara heb goell a vydh dybrys.

²² Y'n jydh na an pennsevik a brovi tarow avel offrynn pegh ragdho ev y honan ha rag oll an bobel.

²³ Seyth dydh a'n goel ev a brovi offrynn leskys dhe'n Arloedh, seyth tarow, ha seyth hordh heb namm, rag pubonan a'n seyth dydh, ha bogh rag offrynn pegh

²⁴ Hag ev a brovi offrynn greun, unn efa, rag pub tarow, ha hin a oyl rag pub efa.

²⁵ Y'n seythves mis, yn pymthegves dydh an mis, ha dre seyth dydh an goell, ev a wra an keth provians rag offrynnow pegh, offrynnow leskys, hag offrynnow greun, ha'n oyl.