Ezekiel 41 - An Bibel Kernewek 20234 (Kernewek Kemmyn)

An Sentri

¹ Ena ev a'm dros dhe'n tempel, ha musura an kilbostow, hwegh kevelin aga les war an dhew denewen.

² Les an entrans o deg kevelin, ha fosow-tenewen an entrans o pymp kevelin war an dhew denewen. Ev a vusuras y hirder, dew-ugens kevelin, ha'y les ugens kevelin.

³ Ena ev a entras a-ji dhe gynsa rann an sentri ha musura kilbostow an entrans, dew gevelin. Les an entrans o hwegh kevelin, ha fosow-tenewen an entrans seyth kevelin.

⁴ Ena ev a vusuras y hirder, dewgens kevelin, ha'n les dewgens kevelin a-rag an sentri. Yn-medh ev dhymm, ‘Hemm yw an tyller an moyha sans.’

⁵ Ena ev a vusuras fos an chi, hwegh kevelin; ha les an chambouryow-tenewen peswar kevelin oll a-dro dhe'n chi.

⁶ Yth esa an chambouryow-tenewen yn tri nivel, onan a-ugh an arall, ha deg warn ugens yn pub nivel. Yth esa jistys yn fos an chambouryow-tenewen oll a-dro, dh'aga skoedhya ma na vens skoedhys gans fos an chi.

⁷ An chambouryow-tenewen a dheuth ha bos moy ledan war bub nivel. An drehevyans a-dro dhe'n chi o drehevys yn nivelyow ow mos yn-bann. Grisyow eth yn-bann dhiworth an nivel isella dhe'n ughella der an nivel y'n kres.

⁸ My a welas ynwedh bos dhe'n chi terras ughelhes avel sel oll a-dro; selyow an chambouryow-tenewen o korsenn leun, hwegh kevelin aga ughelder.

⁹ Les fos a-ves an chambouryow-tenewen o pymp kevelin. Yth esa spas igor yntra chambouryow-tenewen an chi

¹⁰ ha'n helyow, ugens kevelin oll a-dro dhe'n chi.

¹¹ Yth esa darasow an chambouryow-tenewen ow mires troha'n spas igor, unn daras troha'n gogledh, hag unn daras troha'n dyghow. Les an tyller gwag o pymp kevelin oll a-dro.

¹² An drehevyans a-dal an garth troha'n howlsedhes o seyth kevelin, ha fos an drehevyans o pymp kevelin hy les oll a-dro, ha'y hirder deg kevelin ha peswar-ugens.

¹³ Ena ev a vusuras an chi, kans kevelin y hirder, ha'n garth ha'n drehevyans gans y fosow kans kevelin aga hirder;

¹⁴ ynwedh les fas an chi ha'n garth troha'n est o kans kevelin.

¹⁵ Ena ev a vusuras hirder an drehevyans a-dal an garth a-dryv dhodho, ha'n tremenvaow a-dro dhodho, kans kevelin. An sentri a-ves, ha'n sentri a-bervedh, ha'n portal a-dal an klos,

¹⁶ an treudhowyow, an fenestri ynn ha'n tremenvaow a-dro dh'aga thri, a veu pannellow gans prenn oll a-dro. Dhiworth an leur yn-bann dhe'n fenestri, ha'n fenestri aga honan, o kudhys.

¹⁷ Y'n spas a-ugh an daras ha bys y'n chi a-bervedh, ha tu a-ves, ha war an fosow oll a-dro hag y'n sentri a-bervedh ha'n sentri a-ves

¹⁸ yth o kervys cherubim ha palmys, palm yntra cherub ha cherub. Dhe bub cherub yth esa dew fas,

¹⁹ fas den troha'n palm war unn tenewen, ha fas lew troha'n palm war an tenewen arall. Kervys ens war oll an chi a-derdro.

²⁰ Dhiworth an leur dhe dyller a-ugh an daras yth esa cherubim ha palmys kervys, ha war fos an tempel.

²¹ Postow-daras an tempel o pedrek; hag a-rag an tyller sans yth esa neppyth gans semlans

²² alter a brenn, tri hevelin y ughelder, ha dew gevelin y hirder; y gernow, y sel ha'y denwennow o a brenn. Yn-medh ev dhymm, ‘Hemm yw an voes usi a-rag an Arloedh.’

²³ Yth esa darasow dewblek dhe'n tempel ha dhe'n tyller sans.

²⁴ Yth esa dhe bub daras diw dhelenn, diw dhelenn rag an eyl daras, ha diw dhelenn dhe'n daras arall.

²⁵ War dharasow an tempel yth o kervys cherubim ha palmys, haval dhe'n re kervys war an fosow; hag yth esa nen a brenn war fas an portal a-ves.

²⁶ Yth esa fenestri ynn gans palmys war an dhew denewen, war fosow-tenewen an portal, ha war jambouryow-tenewen an chi ha'n nenyow.