Ezekiel 40 - An Bibel Kernewek 20234 (Kernewek Kemmyn)

Gwelesigeth a'n Tempel Nowydh

¹ Y'n pympes blydhen warn ugens a'gan divroedh, yn dalleth an vlydhen, yn degves dydh an mis, y'n peswardhegves blydhen wosa an sita dhe vos gweskys yn-nans, poran y'n jydh na, leuv an Arloedh a veu warnav, hag ev a'm dros ena.

² Ev a'm dros, yn gwelesigethow a Dhuw, dhe bow Ysrael, ha'm settya war venydh pur ughel, may feu warnodho neppyth haval dhe sita a-dhyghowbarth.

³ Ev a'm dros ena, hag otta, yth esa gour, y semlans haval dhe semlans brons, gans kordenn a lien ha korsenn-vusura yn y leuv; hag yth esa ow sevel y'n yet.

⁴ An gour a leveris dhymm, ‘Mab den, mir gans dha dhewlagas, ha klew gans dha dhiwskovarn, ha sett dha vrys war bup-tra a dhiskwedhav dhis; rag ty a veu dres omma rag may hallav y dhiskwedhes dhis. Deriv pup-tra a welydh dhe ji Ysrael.’

Yet an Est dhe'n Klos A-ves

⁵ Hag otta, yth esa fos a-ves dhe'n chi oll a-dro. Hirder an gorsenn-vusura yn leuv an gour o hwegh kevelin-hir, pub kevelin-hir o kevelin ha dornva. Ev a vusuras les an fos, unn gorsenn; ha'n ughelder, unn gorsenn.

⁶ Ena ev a entras a-ji dhe'n yet esa ow mires troha'n est, hag yskynna war hy grisyow ha musura treudhow an yet, unn gorsenn y les.

⁷ Yth esa logow, unn kevelin aga hirder hag unn kevelin aga les, hag yth esa pymp kevelin ynter an logow; ha treudhow an yet ryb portal an yet war-tu ha'n sentri o unn gorsenn.

⁸ Ena ev a vusuras portal an yet war-tu ha'n sentri, unn gorsenn.

⁹ Ena ev a vusuras portal an yet, eth kevelin; ha'y gilbostow, dew gevelin. Yth esa portal an yet a-dal an sentri.

¹⁰ Yn yet an est yth esa tri log, tri an tenewen ma ha tri an tenewen arall, ha'n tri kemusur; ha'n kolovenyow war an dhew denewen a veu kemusur.

¹¹ Ena ev a vusuras les entrans an yet, deg kevelin; ha hirder an yet, trydhek kevelin.

¹² Yth esa ke a-rag an logow, unn kevelin war an dhew denewen, ha'n logow o hwegh kevelin war an dhew denewen.

¹³ Ena ev a vusuras an yet dhiworth to onan a'n logow dhe do an arall, an les pymp kevelin warn ugens, dhiworth daras dhe dharas,

¹⁴ Ynwedh ev a vusuras an portal, ugens kevelin; an yet a valegis y'n klos oll a-dro.

¹⁵ Dhiworth fas yet an entrans bys yn fas portal an yet war-ji yth esa hanter-kans kevelin.

¹⁶ Yth esa fenestri ynn dhe'n logow, ha dh'aga hilbostow a-ji dhe'n yet oll a-dro, hag ynwedh yth esa fenestri dhe'n portals war-ji oll a-dro; ha war an kilbostow yth esa palmys.

An Klos A-ves

¹⁷ Ena ev a'm dros bys y'n klos a-ves, hag otta, yth esa helyow ena, ha leur a leghveyn gwrys rag an klos oll a-dro; yth esa deg hel warn ugens war an leur.

¹⁸ An leur a amalas tenwennow an yetys, kemusur gans hirder an yetys; hemm o an isella leur.

¹⁹ Ena ev a vusuras an les dhiworth fas an yet isella bys y'n fas a-ves a'n klos a-bervedh; kans kevelin dhe'n howldrevel ha dhe'n gogledh.

Yet an Gogledh

²⁰ Ena ev a vusuras an yet a vir troha'n gogledh, ow ledya dhe'n klos a-ves, hy hirder ha'y les.

²¹ Ha'y logow, tri war bub tenewen, ha'y kilbostow ha'y portal, a veu kemusur gans an kynsa yet; yth esa hy hirder hanter-kans kevelin, ha'y les pymp kevelin warn ugens.

²² Hag yth esa hy fenestri, ha'y portal ha'y palmys kemusur gans an yet esa ow mires troha'n est. Yth ens yn-bann dhedhi war seyth gris, hag yth esa hy fortal a-dal dhedhi.

²³ Yth esa an yet dhe'n klos a-bervedh a-dal yet an gogledh, kepar dell esa y'n est; ev a vusuras a yet dhe yet, kans kevelin.

Yet an Soth

²⁴ Ena ev a'm dros troha'n soth, hag otta, yth esa yet y'n soth. Ev a vusuras y gilbostow ha'y bortal. Yth ens i kemusur gans an re erell.

²⁵ Yth esa fenestri ynno oll a-dro, kepar ha'n fenestri erell. Y hirder o hanter-kans kevelin, ha'y les pymp kevelin warn ugens.

²⁶ Yth esa seyth gris ow mos yn-bann dhodho, hag yth esa y bortal a-dal dhedha; yth esa dhodho palmys war y gilbostow, onan war bub tenewen.

²⁷ Yth esa yet y'n klos a-bervedh, troha'n soth, hag ev a vusuras a yet dhe yet troha'n soth, kans kevelin.

Yetys dhe'n Klos A-bervedh

²⁸ Ena ev a'm dros dhe'n klos a-bervedh dre yet an soth, hag ev a vusuras yet an soth; kemusur o gans an re erell.

²⁹ Y logow, y gilbostow, ha'y bortal o kemusur gans an re erell. Yth esa fenestri ynno hag yn y bortal oll a-dro. Yth o hanter-kans kevelin y hirder, ha pymp kevelin warn ugens y les.

³⁰ Yth esa kilbostow oll a-dro, pymp kevelin warn ugens aga hirder, ha pymp kevelin aga les.

³¹ Yth esa y bortal ow mires troha'n klos a-ves, hag yth esa palmys war y gilbostow, hag yth esa eth gris ow mos yn-bann dhodho.

³² Ena ev a'm dros dhe'n klos a-bervedh troha'n est, hag ev a vusuras an yet, kemusur gans an re erell.

³³ Y logow, y gilbostow, ha'y bortal o kemusur gans an re erell; hag yth esa fenestri dhodho oll a-dro, ha dh'y bortal; y hirder o hanter-kans kevelin, ha'y les pymp kevelin warn ugens.

³⁴ Yth esa y bortal troha'n klos a-ves, hag yth esa palmys war y gilbostow war an dhew denewen, hag yth esa eth gris ow mos yn-bann dhodho.

³⁵ Ena ev a'm dros dhe yet an gogledh ha'y vusura; kemusur o gans an re erell.

³⁶ Y logow, y gilbostow, ha'y bortal o kemusur gans an re erell, hag yth esa dhodho fenestri oll a-dro. Y hirder o hanter-kans kevelin, ha'y les pymp kevelin warn ugens.

³⁷ Yth esa y bortal ow mires troha'n klos a-ves, hag yth esa dhodho palmys war y gilbostow war en dhew denewen; hag yth esa eth gris ow mos yn-bann dhodho.

An Helyow rag Pareusi Sakrifisow

³⁸ Yth esa hel gans hy daras ryb postow an yetow; ena i a wolghi an offrynn leskys.

³⁹ Yn portal an yet yth esa diw voes, onan yn pub tenewen, mayth esa ledhys an offrynnow leskys, an offrynnow pegh, ha'n offrynnow kammweyth.

⁴⁰ Y'n tenewen tu a-ves dhe'n portal, ryb an grisyow dhe entrans yet an gogledh, yth esa diw voes; hag y'n tenewen arall dhe bortal an yet yth esa diw voes.

⁴¹ Ytho esa peder moes war unn tenewen a'n yet, ha peder moes y'n tenewen arall: eth moes may ladhens an sakrifisow warnedha.

⁴² Yth esa ynwedh peder moes rag an offrynn leskys, gwrys a ven treghys, kevelin ha hanter aga hirder, ha kevelin ha hanter aga les, ha kevelin aga ughelder, mayth esa settys daffar mayth o ledhys an offrynnow leskys ha'n sakrifisow.

⁴³ Yth esa ynwedh baghow, dornva aga les, fastys a-bervedh oll a-dro. Yth esa kig an offrynn war an moesow ma.

⁴⁴ Tu a-ves dhe'n yet a-bervedh yth esa helyow rag an genysi y'n klos a-bervedh, onan ryb tenewen yet an gogledh, a vir troha'n soth, an arall ryb tenewen yet an est, a vir troha'n gogledh.

⁴⁵ Yn-medh ev dhymm, ‘An hel ma, a vir troha'n soth, yw rag an oferysi, an re mayth eus dhedha charj a'n chi;

⁴⁶ ha'n hel a vir troha'n gogledh yw rag an oferysi mayth eus dhedha charj a'n alter; an re ma yw mebyon Sadok, an Levysi mayth eus dhedha kummyas dhe dhos nes dhe'n Arloedh.’

⁴⁷ Ena ev a vusuras an klos, kans kevelin y hirder, ha kans kevelin y les. Yth esa an alter a-rag an chi.

An Tempel

⁴⁸ Ena ev a'm dros dhe bortal an chi, ha musura kilbostow an portal, pymp kevelin war an dhew denewen. Les an yet o peswardhek kevelin, ha fosow-tenewen an yet o tri hevelin war an dhew denewen.

⁴⁹ Hirder an portal o ugens kevelin, ha'n les dewdhek kevelin. Yth esa deg gris ow mos yn-bann dhodho, hag yth esa kolovenyow ryb an kilbostow war an dhew denewen.