Ezekiel 39 - An Bibel Kernewek 20234 (Kernewek Kemmyn)

Luyow Gog Distruys

¹ Ha ty, A vab den, profoes erbynn Gog, ha lever, Yndellma y lever an Arloedh Duw: Otta, yth esov er dha bynn, A Gog, chyf pennsevik Meshek ha Tubal;

² my a'th treyl a-dro ha'th tenna yn-rag, ha'th tri yn-bann dhiworth penn pella an gledhbarth, ha'th hembronk erbynn menydhyow Ysrael.

³ My a wysk dha warak yn-mes a dha dhorn gledh, ha gul dhe'th sethow koedha yn-nans yn-mes a dha dhorn dhyghow.

⁴ Ty a goedh war venydhyow Ysrael, ty hag oll dha luyow, ha'n poblow eus genes; my a'th re dhe ydhyn-preydh a bub eghenn ha dhe'n bestes gwyls avel boes.

⁵ Ty a goedh y'n gwel igor; rag my re gewsis, yn-medh an Arloedh Duw.

⁶ My a dhannvon tan war Magog ha war an re trigys yn sawder y'n ynysow; i a woer my dhe vos an Arloedh.

⁷ My a wra dhe'm hanow sans bos aswonnys yn mysk ow fobel Ysrael; ha ny asav ow hanow sans dhe vos defolys na fella; ha'n kenedhlow a woer my dhe vos an Arloedh, an Sans yn Ysrael.

⁸ Otta, devedhys yw, hag y fydh gwrys. Hemm yw an jydh a gewsis anodho.

⁹ Ena an re trigys yn sitys Ysrael a yn-mes ha gorra tan y'n arvow ha'ga leski, skoesow ha boklers, gwaregow ha sethow, fustow-dorn ha guwow. Seyth blydhen i wra tan gansa.

¹⁰ Ny guntellons prenn dhiworth an gwel, na'y dreghi dhiworth an koeswigow, rag i a wra tan gans an arvow; i a gemmer preydh dhiworth an re a gemmeras preydh dhiworta i, hag i a byll an re a's pyllas i, yn-medh an Arloedh Duw.

Ynkleudhyans Gog

¹¹ Y'n jydh na my a re dhe Gog nans an re a dremen troha tu est an mor; ev a stopp hyns an dremenysi, rag Gog ha'y luyow a vydh ynkleudhys ena; henwys vydh Nans Hamon-gog.

¹² Ha chi Ysrael a vydh orth aga ynkleudhyas seyth mis, rag glanhe an tir.

¹³ Oll pobel an tir a wra aga ynkleudhyas; ha hemma a dhre enor dhedha y'n jydh may tiskwedhav ow glori, yn-medh an Arloedh Duw.

¹⁴ I a sett dhe denewen gwer dhe dremena heb hedhi der an tir hag ynkleudhyas an re gesys war enep an dor, dh'y lanhe; wosa seyth mis i a dhalleth hwilas.

¹⁵ Ha pan dremenons der an tir, ev neb a wel askorn den a worr tokyn rybdho bys pan wrug an ynkleudhyoryon y ynkleudhyas yn nans Hamon-gog.

¹⁶ Hag y fydh sita ena ynwedh, henwys Hamona. Yndella i a lanha an tir.

¹⁷ Mes ty, A vab den, yndellma y lever an Arloedh Duw: Kows dhe ydhyn a bub eghenn, ha dhe oll an bestes gwyls: Omguntellewgh ha dos; dewgh war-barth a bub tu dhe'm sakrifis a wrav ragowgh, sakrifis bras, war venydhyow Ysrael, ha hwi a dheber kig hag eva goes.

¹⁸ Hwi a dheber kig gwer alloesek, hag eva goes pennsevigyon an nor, hordhes, eyn, gever, terewi, i oll bestes peskys a Bashan.

¹⁹ Hwi a dheber blonek bys pan vydhowgh lenwys, hag eva goes bys pan vydhowgh medhow, orth an sakrifis a wrav ragowgh.

²⁰ Ha hwi a vydh lenwys orth ow moes a vergh ha marghogyon, a wer grev ha kasoryon a bub eghenn, yn-medh an Arloedh.

²¹ My a dhiskwedh ow glori yn mysk an kenedhlow, hag oll an kenedhlow a wel ow breus a wrugavy, ha'n leuv a worris warnedha.

²² Ha chi Ysrael a woer, my dhe vos an Arloedh aga Duw, a'n jydh na hag yn-rag.

²³ Ha'n kenedhlow a woer, chi Ysrael dhe vos yn kethneth drefenn aga drogobereth, rag i dhe vos dislel dhymm. Ytho my a gudhas ow fas dhiworta, ha'ga ri yn leuv aga eskerens, hag i oll a goedhas der an kledha.

²⁴ My a's dyghtyas herwydh aga avlander ha herwydh aga hammweythresow, ha my a gudhas ow fas dhiworta.

²⁵ Rakhenna yndellma y lever an Arloedh Duw: Lemmyn my a dreyl kethneth Yakob ha kemmeres truedh war oll chi Ysrael; ha my a vydh avius rag ow hanow sans.

²⁶ I a ankev aga meth hag oll an dislelder a wrussons er ow fynn, pan vydhons trigys yn sawder yn aga thir, heb denvyth dhe worra own ynna.

²⁷ Wosa my dh'aga dri arta dhiworth an poblow, ha'ga huntelles dhiworth tiryow aga eskerens, my a dhiskwedh ow sansoleth yn golok lies kenedhel.

²⁸ Ena i a woer my dhe vos an Arloedh aga Duw, rag my dh'aga dannvon yn divroedh yn mysk an kenedhlow; hag ena my a's kuntellas yn aga thir aga honan, heb gasa nagonan anedha ena.

²⁹ Ny gudhav ow fas arta dhiworta, rag my re dhiveris ow spyrys war ji Ysrael, yn-medh an Arloedh Duw.