Ezekiel 36 - An Bibel Kernewek 20234 (Kernewek Kemmyn)

Bennath war Ysrael

¹ Ha ty, A vab den, profoes dhe venydhyow Ysrael, ha lever: Klewewgh ger an Arloedh.

² Yndellma y lever an Arloedh Duw: Drefenn an eskar dhe leverel er dha bynn, ‘Aha! An breow bythkwethek re beu dhyn avel eretons’,

³ rakhenna, profoes ha lavar, Yndellma y lever an Arloedh Duw: Drefenn i dh'agas gul ynyal ha'gas helghya a bub tu, rag may fowgh eretons dhe remenant an kenedhlow, ha hwi re beu skornys gans tavosow, ha despitys gans an bobel;

⁴ rakhenna, menydhyow Ysrael, klewewgh ger an Arloedh Duw: Yndellma y lever an Arloedh Duw dhe'n menydhyow, dhe'n brennow, dhe'n goverow, dhe'n nansow, dhe'n magoryow ynyal, ha dhe'n sitys diannedh, a dheuth ha bos rag preydh ha rag ges dhe remenant an kenedhlow usi oll a-dro;

⁵ rakhenna yndellma y lever an Arloedh Duw: Sur yn tan ow avi my re gewsis erbynn remenant an kenedhlow, hag erbynn oll Edom a gemmeras ow thir dhedha aga honan rag eretons gans joy yn aga holonn ha despit yn aga brys, rag may fe hy feurva preydh.

⁶ Rakhenna, profoes a-dro dhe bow Ysrael, ha lavar dhe'n menydhyow, dhe'n brennow, dhe'n goverow, ha dhe'n nansow, Yndellma y lever an Arloedh Duw, Otta, my re gewsis y'm avi hag y'm sorrvann, rag hwi dhe berthi skorn an kenedhlow.

⁷ Rakhenna, yndellma y lever an Arloedh Duw: My re dos gans leuv drehevys y hwra an kenedhlow a-dro dhis perthi aga heredh.

⁸ Mes hwi, menydhyow Ysrael, hwi a ystynn agas skorrow ha doen agas froeth rag ow fobel Ysrael, rag i a dheu dhe-dre yn skon.

⁹ Yth ov vy ragowgh, ha my a dreyl dhywgh, ha hwi a vydh gonedhys ha hesys.

¹⁰ My a ynkress tus warnowgh, oll chi Ysrael kowal; ha'n sitys a vydh annedhys, ha'n magoryow a vydh dastrehevys.

¹¹ My a ynkress warnowgh den ha best, hag i a balsha ha doen froeth; my a'gas gwra dhe vos annedhys kepar hag y'n termynyow koth, ha gul dhywgh seweni moy es kyns. Ena hwi a woer my dhe vos an Arloedh.

¹² My a wra dhe dus kerdhes warnowgh, ow fobel Ysrael, hag i a wra dha berghenna, ha ty a vydh aga eretons, ha nevra namoy vydhydh orth aga gul anvap.

¹³ Yndellma y lever An Arloedh Duw: Drefenn i dhe leverel dhywgh, ‘Ty a dhevor tus, ha gul dha genedhel anvap’,

¹⁴ rakhenna ny dhevorydh tus arta, na wul dha genedhel anvap arta, yn-medh an Arloedh Duw.

¹⁵ Ny asav dhis klewes skorn an poblow namoy, na perthi keredh an kenedhlow namoy; ny wredh dhe'n genedhel trebuchya namoy, yn-medh an Arloedh Duw.

Restorita Ysrael

¹⁶ Ger an Arloedh a dheuth dhymm, ow leverel:

¹⁷ Mab den, pan esa chi Ysrael trigys yn aga thir aga honan, i a'n defolas der aga fara ha'ga gwriansow; yth o aga fara kepar hag avlander amseryow a-ragov.

¹⁸ Ytho my a dhiveris ow sorr warnedha rag an goes a skoellsens war an tir, ha rag aga idolys may hwrussens y dhefola dredha.

¹⁹ My a's skattras yn mysk an kenedhlow, hag y fons lesys der an powyow; my a's breusis war-lergh aga fara ha'ga gwriansow.

²⁰ Pan dheuthons dhe'n kenedhlow, py le pynag y teuthons, i a dhisakras ow hanow sans. Leverys veu anedha, ‘An re ma yw pobel an Arloedh, hwath i res eth a-dhiworth y dir.’

²¹ Mes y feu bern dhymm rag ow hanow sans a wrussa chi Ysrael y dhisakra yn mysk an kenedhlow may teuthons di.

²² Rakhenna lavar dhe ji Ysrael, Yndellma y lever an Arloedh Duw: Nyns yw ragowgh hwi y hwrav vy hemma, chi Ysrael, mes rag ow hanow sans a wrussowgh y dhisakra yn mysk an kenedhlow may teuthewgh di.

²³ My a sansha ow hanow meur, re beu disakrys yn mysk an kenedhlow, hag a wrussowgh y disakra yn aga mysk. Ena an kenedhlow a woer my dhe vos an Arloedh, yn-medh an Arloedh Duw, pan vydhav sanshes dredhowgh a-rag aga dewlagas.

²⁴ My a'gas kemmer dhiworth an kenedhlow, ha'gas kuntelles dhiworth oll an powyow, ha'gas dri dh'agas tir.

²⁵ Skoellya a wrav warnowgh dowr glan, ha hwi a vydh glanhes dhiworth oll agas avlander, ha dhiworth oll agas idolys.

²⁶ My a re dhywgh kolonn nowydh, ha gorra spyrys nowydh ynnowgh, ha kemmeres an golonn a ven dhiworth agas kig, ha ri dhywgh kolonn a gig.

²⁷ My a worr ow Spyrys ynnowgh, ha gul dhywgh kerdhes y'm ordenansow, ha gwaytyas gwitha ow breusow.

²⁸ Hwi a drig y'n tir a res vy dh'agas tasow; hwi a vydh ow fobel, ha my a vydh agas Duw.

²⁹ My agas saw dhiworth oll agas avlander. My a elow dhe'n ys ha'y voghhe, ha ny worrav divoetter warnowgh.

³⁰ My a voghha froeth an gwydh hag askorr an gwel, ma na berthowgh arta skorn an kenedhlow drefenn divoetter.

³¹ Ena hwi a berth kov a'gas drog fordhow ha'gas gweythresow na vons da; ha hwi a wra divlasa agas honan rag agas kammweythresow ha'gas gwriansow kasadow.

³² Nyns yw a-barth dhywgh hwi y hwrav vy hemma, yn-medh an Arloedh Duw; bedhes hemma godhvedhys dhywgh. Kemmerewgh meth ha bos konfondys drefenn agas fara, a ji Ysrael.

³³ Yndellma y lever an Arloedh Duw: Y'n jydh may hwrav agas glanhe dhiworth agas kammweythresow, my a wra dhe'n sitys bos annedhys, ha'n magoryow a vydh dastrehevys.

³⁴ An tir ynyal a vydh gonedhys, yn le bos ynyal yn golok kemmys a dremen dresto.

³⁵ Yn-medhons, ‘An tir ma, hag a veu ynyal, re dheuth ha bos avel lowarth Eden, ha'n sitys, hag a veu magoryow hag ynyal ha terrys dhe'n dor, yw kerys hag annedhys.’

³⁶ An kenedhlow gesys a-dro dhywgh a woer y hwrug my, an Arloedh, drehevel an tylleryow distruys, ha plansa an tylleryow ynyal. My, an Arloedh, re gewsis, ha my a'n gwra..

³⁷ Yndellma y lever an Arloedh Duw: Ynwedh my a as dhe ji Ysrael govynn orthiv dhe wul hemma ragdha: dhe voghhe aga thus kepar ha flokk.

³⁸ Kepar ha flokk rag offrynnow, kepar ha flokk Yerusalem yn hy goelyow apoyntys, yndella y fydh an sitys ynyal lenwys a flokkys a dus. Ena i a woer my dhe vos an Arloedh.