Ezekiel 32 - An Bibel Kernewek 20234 (Kernewek Kemmyn)

Galargan war Faro hag Ejyp

¹ Y'n dewdhegves blydhen, y'n dewdhegves mis, yn kynsa dydh an mis, ger an Arloedh a dheuth dhymm, ow leverel:

² Mab den, kemmer kynvann yn-bann rag Faro myghtern Ejyp, ha lavar dhodho, Ty yw avel lew yowynk yn mysk an kenedhlow, ha ty yw avel euthvil y'n moryow, ow lemmel a-dro y'th avonyow, ow tervyska an dowrow gans dha dreys, hag ow stronka aga avonyow.

³ Yndellma y lever an Arloedh Duw: My a les warnas ow roes yn kuntelles a lies pobel, hag i a'th tre yn-bann y'm roes-draylya.

⁴ My a'th tewl war an dor, ha'th teghesi war an gwel, ha gul dhe oll ydhyn an nevow triga warnas, ha my a lenow oll bestes an norvys ahanas.

⁵ My a worr dha gig war an menydhyow, ha lenwel an nansow a'th karyn.

⁶ My a worlyp an dor gans dha woes ow resek bys y'n menydhyow, ha'n goverow a vydh leun ahanas.

⁷ Pan y'th tifeudhav, my a gudh an nevow ha tewlhe aga ster; my a gudh an howl gans kommolenn, ha ny re an loer hy golow.

⁸ My a dewlha warnas oll golowys splann an nevow, ha dri tewolgow war dha dir, yn-medh an Arloedh Duw.

⁹ My a drobel kolonn lies pobel pan y'th tegav yn kethneth yn mysk an kenedhlow, bys yn tiryow na aswonnydh.

¹⁰ My a wra dhe lies pobel bos sowdhenys orthis, ha'ga myghternedh a vydh dyegrys orthis, pan swaysyav ow kledha a-ragdha; ha pub den a gren rag y vewnans pup-prys y'n jydh dha derroes.

¹¹ Rag yndellma y lever an Arloedh Duw: Kledha myghtern Babylon a dheu warnas.

¹² Dre gledhedhyow gwer alloesek my a wra dhe'th routh koedha, an fella yn mysk an kenedhlow. I a dhomhwel goeth Ejyp, hag oll hy routh a vydh diswrys.

¹³ My a dhistru oll hy chatel dhiworth amal dowrow meur; ha ny wra troes den aga throbla arta, na ny wra karnow chatel aga throbla.

¹⁴ Ena my a wra dh'aga dowrow bos kosel ha kler, ha my a wra dh'aga avonyow resek avel oyl, yn-medh an Arloedh Duw.

¹⁵ Pan wrav dhe bow Ejyp bos ynyal, ha pan vydh an tir destryppys a'y lanwes, pan waskav oll an re usi trigys ynni, ena i a woer my dhe vos an Arloedh.

¹⁶ Homm yw an alargan a ganons. Myrghes an kenedhlow a's kan; i a's kan war Ejyp ha war oll hy routh, yn-medh an Arloedh Duw.

Ejyp a Dhiyskynn dhe'n Pytt

¹⁷ Y'n dewdhegves blydhen, yn pymthegves dydh an mis, ger an Arloedh a dheuth dhymm, ow leverel,

¹⁸ Mab den, kyn war routh Ejyp, ha towl hi yn-nans, hi ha'n myrghes a genedhlow galloesek, bys yn rannow isella an norvys, gans an re a dhiyskynn dhe'n pytt.

¹⁹ Tekka ages piw osta? Diyskynn! Growedh gans an re antrodreghys!

²⁰ I a goedh yn mysk an re ledhys gans an kledha. An kledha re beu tennys; i a's drayl dhe-ves gans oll hy routhow.

²¹ Ledyoryon alloesek a gews yn-mes a ifarn a-dro dhedhi ha'y heffrysysi, ‘I re dhiyskynnas, i a wrowedh gans an re antrodreghys, gans an re ledhys gans an kledha.’

²² Yma Assyria ena, hag oll hy ost, ha'ga bedhow oll a-dro dhedhi, i oll ledhys, koedhys der an kledha;

²³ Aga bedhow yw settys yn pella rannow an pytt, ha'y ost oll a-dro dh'y bedh, i oll ledhys, koedhys der an kledha, an re a wrug euth yn tir an re vew.

²⁴ Yma Elam ena hag oll hy routh a-dro dh'y bedh; i oll ledhys, koedhys der an kledha, gyllys yn-nans antrodreghys dhe isella rannow an norvys; i a wrug euth yn tir an re vew. I a berth aga meth gans an re a dhiyskynn dhe'n pytt.

²⁵ I re wrug gweli rygdhi yn mysk an re ledhys, gans oll hy routh, ha'ga bedhow a-dro dhedhi, i oll antrodreghys, ledhys gans an kledha; rag i a wrug aga euth yn tir an re vew, hag i a berth aga meth gans an re a dhiyskynn dhe'n pytt.

²⁶ Yma Meshek ha Tubal ena, hag oll hy routh, ha'ga bedhow a-dro dhedhi, i oll antrodreghys, ledhys gans an kledha, rag i a wrug euth yn tir an re vew.

²⁷ A ny wrowedhons gans an gasoryon erell antrodreghys a goedhas, a dhiyskynnas dhe ifarn gans aga arvow a vresel, may feu aga kledha gorrys yn-dann aga fenn? Y fydh kessydhyans aga hammweythresow war aga eskern; rag y feu euth an gasoryon ma yn tir an re vew.

²⁸ Ytho ty ynwedh a vydh terrys yn mysk an re antrodreghys, ha growedha gans an re ledhys gans an kledha.

²⁹ Yma Edom ena, hy myghternedh, hag oll hy fennsevigyon, a veu gorrys spit dh'aga galloes gans an re ledhys gans an kledha; i a wrowedh gans an re antrodreghys, gans an re re dhiyskynnas dhe'n pytt.

³⁰ Yma ena pennsevigyon an gledhbarth, i oll, hag oll an Sidonianys, a dhiyskynnas gans an re ledhys, shamys rag an euth a wrussons der aga nerth; i a wrowedh antrodreghys gans an re ledhys gans an kledha, hag i a berth aga sham gans an re a dhiyskynn dhe'n pytt.

³¹ Pan wra Faro aga gweles, ev a vydh konfortys rag oll y routh a veu ledhys gans an kledha, Faro hag oll y lu, yn-medh an Arloedh Duw.

³² Rag ev a wrug y euth yn tir an re vew; ytho ev a wrowedh yn mysk an re antrodreghys, gans an re ledhys gans an kledha, Faro hag oll y routh, yn-medh an Arloedh Duw.