Ezekiel 29 - An Bibel Kernewek 20234 (Kernewek Kemmyn)

Profoesans erbynn Ejyp

¹ Y'n degves blydhen, y'n degves mis, yn dewdhegves dydh an mis, ger an Arloedh a dheuth dhymm, ow leverel:

² Mab den, treyl dha fas erbynn Faro myghtern Ejyp, ha profoes er y bynn hag erbynn oll Ejyp.

³ Kows ha lavar, Yndellma y lever an Arloedh Duw: Otta, yth esov er dha bynn, A Faro myghtern Ejyp, an dhragon vras ow krowedha yn mysk hy avonyow, neb a leveris dhymm, ‘Dhymmo vy yw ow Nil; my a'n gwrug ragov vy ow honan.’

⁴ Mes my a worr higow y'th tiwen ha gul dhe buskes dha avonyow glena orth dha skans. My a'th tre yn-bann yn-mes a'th avonyow, gans oll puskes dha avonyow ow klena orth dha skans.

⁵ My a'th as, tewlys y'n difeythtir, ty hag oll puskes dha avonyow. Ty a goedh war an gwel, ha ny vydhydh kuntellys nag ynkleudhys. My a'th re dhe vestes an gwel ha dhe ydhyn an nev rag boes.

⁶ Ena oll trigoryon Ejyp a woer my dhe vos an Arloedh, rag ty re beu lorgh a gorsenn dhe ji Ysrael.

⁷ Pan y'th talghennsons er dha leuv ty a veu terrys, ha ty a skwardyas oll aga skoedhow; ha pan boessons warnas ty a veu terrys ha gul dhe oll aga diwglun krena.

⁸ Rakhenna yndellma y lever an Arloedh Duw: Awottavy ow tri kledha er dha bynn, ha treghi dhiworthis den ha best.

⁹ Pow Ejyp a vydh ynyalder ha difeyth. Ena i a woer my dhe vos an Arloedh. Rag ty dhe leverel, ‘An avon yw dhymm, ha my a's gwrug’,

¹⁰ rakhenna otta, yth esov er dha bynn, hag erbynn dha avonyow, ha my a wra pow Ejyp ynyal kowal ha difeyth, dhiworth Migdol dhe Syene, bys yn or Ethiopia.

¹¹ Ny dremen dresto troes den, na ny dremen dresto troes best; ny vydh annedhys dewgens blydhen.

¹² My a wra pow Ejyp ynyalder yn mysk powyow ynyal, ha'y sitys a vydh difeyth dewgens blydhen yn mysk sitys difeyth; ha my a skatter Ejyp y'n kenedhlow, ha'ga lesa y'n powyow.

¹³ Rag yndellma y lever an Arloedh Duw: Orth diwedh dewgens blydhen my a guntell Ejyp dhiworth an poblow le mayth ens skattrys

¹⁴ My a dreyl kethneth Ejyp, ha'ga dri arta dhe dir Pathros, dhe dir aga dallethvos, hag y fydhons ena ruvaneth isel.

¹⁵ Hi a vydh isella a'n ruvanethow, ha ny omughelha arta a-ugh an kenedhlow. My a's tanowha ma na rewllyons an kenedhlow arta.

¹⁶ Ny wra chi Ysrael fydhya ynna arta; i a berth kov a'ga hammweyth pan dreylsons dhedha rag gweres. Ena i a woer my dhe vos an Arloedh Duw.

Ejyp a vydh Pyllys gans Babylon

¹⁷ Y'n seythves blydhen warn ugens, yn kynsa dydh an mis, ger an Arloedh a dheuth dhymm, ow leverel:

¹⁸ Mab den, Nebukadnessar myghtern Babylon a wrug dh'y lu lavurya yn krev erbynn Tyr; pub penn o bloghhes, ha pub skoedh o rutys lomm. Mes ny veu gwayn dhodho ev na dh'y lu rag y lavur erbynn Tyr.

¹⁹ Rakhenna yndellma y lever an Arloedh Duw: Awottavy ow ri pow Ejyp dhe Nebukadnessar myghtern Babylon; ev a dheg hy rychys dhe-ves, ha kemmeres hy freydh, ha'y fylla; y fydh gober y lu.

²⁰ My re ros dhodho pow Ejyp yn attal rag y ober a wrug, rag i a lavuryas ragov vy, yn-medh an Arloedh Duw.

²¹ Y'n jydh na y hwrav dhe gorn skylla rag Ysrael, ha my a re dhis ganow igor yn aga mysk. Ena i a woer my dhe vos an Arloedh.