Ezekiel 27 - An Bibel Kernewek 20234 (Kernewek Kemmyn)

Kynvann War Tyr

¹ Ger an Arloedh a dheuth dhymm, ow leverel:

² Ty, A vab den, drehav kynvann erbynn Tyr.

³ Lavar dhe Tyr yw esedhys orth entrans an mor, marchont an poblow war lies arvor, Yndellma y lever an Arloedh Duw: Tyr, ty re leveris, ‘Perfydh ov vy yn tekter.’

⁴ Yma dha oryon yn kolonn an moryow; dha vyldyoryon a wrug perfydh dha dekter.

⁵ I a wrug oll dha blenkys a veryw dhiworth Senir; i a gemmeras kederwydh dhiworth Lebanon dhe wul gwern ragos.

⁶ I a wrug dha roevow a dherow dhiworth Bashan; i a wrug dha flouryow a brenn kypres dhiworth arvoryow Kittim.

⁷ Sendal brosys dhiworth Ejyp o dha woel, avel baner ragos; ha'th kudhansow o glas ha purpur dhiworth arvoryow Elisha.

⁸ Trigoryon Sidon hag Arvad o dha roevadoryon; dha re skentel, A Tyr, esa ynnos, i o dha varners.

⁹ Yth esa henavogyon Gebal ha'y dus skentel ynnos, ow kalkya dha folsyow. Yth esa ynnos oll gorholyon an mor ha'ga marners, dhe vargenya rag dha wara.

¹⁰ Yth esa Persia, Lud ha Put y'th lu, dha wer a vresel; i a grogas skoes ha basnett ynnos, i a ros dhis dha splannder.

¹¹ Yth esa mebyon Arvad ha Helek war dha fosow a-derdro; hag yth esa gwer Gammad y'th touryow. I a grogas aga skoesow war dha fosow a-derdro; i a wrug perfydh dha dekter.

¹² Tarshish o dha gowethyas yn kenwerth, drefenn oll dha rychys a bub eghenn; i a geschanjyas arghans, horn, sten, ha plomm rag dha wara.

¹³ Yavan, Tubal, ha Meshek, yth ens i dha varchons; enevow tus ha lestri a vrons a geschanjsons rag dha wara.

¹⁴ Dhiworth chi Togarma i a geschanjyas mergh, mergh charettow, ha mulyon rag dha wara.

¹⁵ Mebyon Dedan o dha varchons; yth esa lies arvor ow kenwertha genes; i a dhri dhis dans-olifans hag eboni avel trubyt.

¹⁶ Aram o dha gowethyas yn kenwerth, dre reson dha lies askorr; garnet, purpur, brosweyth, lien fin, koral, ha rubi y rons rag dha wara.

¹⁷ Yuda ha pow Ysrael o dha marchons; gwaneth a Minnith, tesenn, mel, oyl, ha balsam y rons yn keschanj rag dha wara.

¹⁸ Damaskus o dha gowethyas yn kenwerth, dre reson dha lies askorr, hag oll dha rychys yn gwin a Helbon ha gwlan dhiworth Sahar.

¹⁹ Gwin dhiworth Uzal a rens yn keschanj rag dha askorr, horn oberys, kassia, ha kalamus rag dha wara.

²⁰ Dedan o dha varchont yn pallennow-diber rag marghogeth.

²¹ Arabia hag oll pennsevigyon Kedar o dha gowethysi yn kenwerth, gans eyn, hordhes, ha gever; y'n re ma i a genwertha genes.

²² Marchons a Sheba ha Raama o dha varchons; an gwella spisyow hag oll meyn drudh hag owr a rens yn keschanj rag dha wara.

²³ Haran, Kanne, hag Eden, marchons a Sheba, Asshur ha Kilmad o dha varchons.

²⁴ I o dha varchons yn dillas teg, yn pann glas, ha brosweyth, ha strelyow liwek kelmys gans kerdyn tynn; yth esa an re ma yn mysk dha varchondis.

²⁵ Yth esa gorholyon Tarshish ow karya dha wara. Ty o leun ha kargys pur boes yn kolonn an moryow.

²⁶ Yn dowrow ughel roevadoryon a'th tros, mes gwyns an est a'th terr yn kolonn an moryow.

²⁷ Dha rychys, dha wara, dha varchondis, dha varners, dha gaptenyon, dha galkyoryon, dha werthoryon, hag oll dha soudoryon usi genes, hag oll an mayni usi a-bervedh a sedh yn kolonn an moryow yn dydh dha goedh.

²⁸ Orth son leva dha varners an peurvaow a gren.

²⁹ Oll an re a syns an roevow a dheu yn-nans dhiworth aga gorholyon; marners hag oll kaptenyon an mor a sev war dir.

³⁰ I a dhrehav aga lev er dha bynn, hag i a gri yn hwerow; i a dewl doust war aga fennow ha rolya yn lusu.

³¹ I a omvoelha ragos hag omwrogysa gans yskar. I a oel warnas yn hwerowder enev, gans kynvann hwerow.

³² I a dhrehav kynvann ragos ha kyni warnas, ‘Piw a veu distruys bythkweth kepar ha Tyr yn kres an mor?

³³ Pan eth dha wara yn-mes war an moryow, ty a walghas lies pobel; dre dha rychys bras ha'th wara ty a wrug golusek myghternedh an norvys.

³⁴ Lemmyn ty yw terrys gans an mor yn downderyow an dowrow; dha wara hag oll dha gowethysi re sedhis genes.

³⁵ Oll trigoryon an arvoryow a gemmer skruth orthis, ha'ga myghternedh yw pur dhyegrys, ha'ga fasow yw troblys.

³⁶ Gwikoryon an poblow a hwiban orthis; ty re dheuth dhe euth tromm ha ny vydhydh nevra namoy.’