Ezekiel 26 - An Bibel Kernewek 20234 (Kernewek Kemmyn)

Profoesans Erbynn Tyr

¹ Y'n unnegves blydhen, yn kynsa dydh an mis, ger an Arloedh a dheuth dhymm, ow leverel,

² Mab den, drefenn Tyr dhe leverel erbynn Yerusalem, ‘Aha! Yetys an poblow yw terrys ha'n sita yw igor a-ragov; my a vydh sewen, rag hy bos distruys’,

³ rakhenna yndellma y lever an Arloedh Duw: Otta, yth esov er dha bynn, A Tyr, ha my a dhre yn-bann lies kenedhel er dha bynn, kepar dell wra an mor dri y donnow yn-bann.

⁴ I a dhistru fosow Tyr, ha terri hy thouryow dhe'n dor, ha skuba dhe-ves hy doust dhiworti, ha'y gul karrek lomm.

⁵ Y fydh tyller rag lesa roesow yn kres an mor; rag my re gewsis, yn-medh an Arloedh Duw. Hi a vydh preydh dhe'n kenedhlow,

⁶ ha'y myrghes usi y'n gwel a vydh ledhys gans an kledha. Ena i a woer my dhe vos an Arloedh.

⁷ Rag yndellma y lever an Arloedh Duw: Awottavy ow tri erbynn Tyr Nebukadnessar myghtern Babylon dhiworth an gogledh, myghtern myghternedh, war-barth gans mergh ha charettow, gans marghoglu ha troeslu meur.

⁸ Ev a ladh dha vyrghes y'n gwel gans an kledha, ha krugya gweyth-esedhva er dha bynn, ha krugya krug-esedhva er dha bynn, ha drehevel to a skoesow er dha bynn.

⁹ Ev a sett strokosow y hor'bennow erbynn dha fosow, ha terri dha douryow dhe'n dor gans y voelyow.

¹⁰ Mar lies vydh y vergh may hwra aga doust dha gudha. Orth son an varghogyon, ha'n rosow, ha'n charettow dha fosow a gren, pan enter y'th yetys kepar ha'n re a enter yn sita mayth eus ynni aswa.

¹¹ Gans karnow y vergh ev a drett oll dha stretys; ev a ladh dha bobel gans an kledha, ha'th kolovenyow krev a goedh dhe'n dor.

¹² I a byll dha rychys hag a breydh dha wara; i a derr dhe'n dor dha fosow ha distrui dha jiow desiradow; hag i a dewl dha veyn ha'th prennyer ha dha dhoust yn kres an mor.

¹³ My a wra dhe dros dha gana tewel, ha son dha sowtris ny vydh klewys arta.

¹⁴ My a'th wra karrek lomm; ty a vydh tyller rag lesa roesow. Ny vydhydh nevra dastrehevys, rag my an Arloedh re gewsis, yn-medh an Arloedh Duw.

¹⁵ Yndellma y lever an Arloedh Duw dhe Tyr: A ny gren an arvoryow orth son dha goedh, pan hanas an re goliys, pan vydh an ladhva y'n kres ahanas?

¹⁶ Ena oll pennsevigyon an mor a dhiyskynn dhiworth aga thronys ha gorra dhe denewen aga fowsyow, ha diwiska aga dillas brosys. I a omwisk gans krena, hag esedha war an dor; i a gren heb hedhi, hag i a gemmer skruth orthis.

¹⁷ I a dhrehav galargan warnas, ha leverel dhis, Fatell osta distruys, annedhyades an moryow, an sita gerys-da, neb a veu krev war an mor, hi ha'y annedhysi; hi neb a worras hy euth war oll hy annedhysi!

¹⁸ Lemmyn an arvoryow a gren yn dydh dha goedh; an ynysow usi y'n mor a gemmer skruth orth dha dhibarth.

¹⁹ Rag yndellma y lever an Arloedh Duw: Pan y'th wrav sita wastys avel sitys nag yw annedhys, pan dhrov yn-bann warnas an downder, ha'n dowrow meur a'th kudh,

²⁰ ena my a'th tre yn-nans gans an re a dhiyskynn dhe'n pytt, dhe'n bobel a dermynyow koth; ha my a'th wrav dhe driga y'n dor barth a-woeles, kepar hag yn magoryow an termynyow koth, gans an re a dhiyskynn dhe'n pytt, ma na ylli dehweles, na kavoes tyller yn mysk an re vew.

²¹ Euth tromm a wrav dhis. Ty a vydh hwilys, heb bos kevys arta bys vykken, yn-medh an Arloedh Duw.