Ezekiel 22 - An Bibel Kernewek 20234 (Kernewek Kemmyn)

An Sita Woesek

¹ Ger an Arloedh a dheuth dhymm, ow leverel:

² Ty, A vab den, a vreusydh? A vreusydh an sita woesek? Gwra godhvedhys dhedhi oll hy thaklow kasadow.

³ Lavar, Yndellma y lever an Arloedh Duw: Sita usi ow skoellya goes yn hy kres, may teffo hy thermyn, hag owth omdhefola dre wul idolys.

⁴ Ty yw kablus drefenn an goes a skoellsys, ha ty re omdhefolsys der an idolys a wrussys. Ty re dhros dha dhydh nes, ha dos dhe dhiwedh dha vlydhynyow. Rakhenna my re'th wrug skorn dhe'n kenedhlow, ha ges dhe oll an powyow.

⁵ An re yw a-ogas ha'n re yw a-bell a wra ges ahanas, ty sita drog-gerys, leun a dervans.

⁶ Otta ynnos re beu pennsevigyon Ysrael, pubonan herwydh y nerth ow skoellya goes.

⁷ Ynnos re beu tas ha mamm despitys; y'n kres ahanas i re arwaskas an alyon ha tebeldhyghtya an omdhivas ha gwedhwes.

⁸ Ty re dhispresyas ow taklow sans, ha defola ow sabotys.

⁹ Ynnos re beu tus ow sklandra dhe skoellya goes; ynnos re beu tus ow tybri war an menydhyow; i re wrug tra vethus y'n kres ahanas.

¹⁰ Ynnos i re dhiskudhas noethedh aga thasow, ynnos i re dhefolas an venyn yn hy amseryow.

¹¹ Ynnos gour re wrug tra gasadow dhe wreg y gentrevek, ha gour a dhefol y wohydh gans vilta, ha gour a dhefol y hwoer, myrgh y das.

¹² Ynnos i re gemmeras falswober dhe skoellya goes; ty re gemmeras oker ha goroker, ha kemmeres gwayn dhiworth dha gentrevek der arwask, ha ty re'm ankevsys, yn-medh an Arloedh Duw.

¹³ Otta, my re weskis ow diwla war-barth erbynn dha wayn anewn re wrussys hag erbynn an goes skoellys genes y'n kres ahanas.

¹⁴ A yll sev dha golonn sevel, po a vydh dha dhiwla krev rag an dydhyow may hwrav vy dha dhyghtya? My an Arloedh re gewsis, ha my a'n gwrav.

¹⁵ My a wra dha lesa yn kenedhlow ha'th skattra y'n powyow, ha kartha dhiworthis dha vostedhes.

¹⁶ Pan vydhydh defolys a-wel dhe'n kenedhlow, ena ty a woer my dhe vos an Arloedh.

¹⁷ Ger an Arloedh a dheuth dhymm, ow leverel:

¹⁸ Mab den, chi Ysrael re beu dhymm avel atal; i oll, brons, sten, horn, ha plomm a-berth yn forn. Atal arghans yns i.

¹⁹ Rakhenna yndellma y lever an Arloedh Duw: Drefenn hwi oll dhe vos atal, otta, rakhenna my a'gas kuntell a-berth yn Yerusalem.

²⁰ Kepar dell guntellons arghans, brons, horn, plomm, ha sten a-berth yn forn dhe hwytha tan warnedha dh'aga theudhi, yndella my a'gas kuntell y'm sorr ha'm konnar, ha'gas settya ena ha'gas teudhi.

²¹ My a'gas kuntell ha hwytha warnowgh gans tan ow sorrvann, ha hwi a vydh teudhys a-ji dhedhi.

²² Kepar dell deudh arghans yn mysk forn, yndella y fydhowgh teudhys a-ji dhedhi; ha hwi a woer y hwrugavy, an Arloedh, diveri ow sorr warnowgh.

²³ Ger an Arloedh a dheuth dhymm, ow leverel:

²⁴ Mab den, lavar dhedhi, Ty yw dor ma na goedhas glaw warnodho, na kowasow y'n jydh a sorrvann.

²⁵ Hy fennsevigyon yn hy kres yw kepar ha lew owth usa, ow terri preydh; i re dhybris enevow; i re gemmeras tresor ha taklow drudh; i re wrug gwedhwesow pals a-berth ynno.

²⁶ Hy oferysi re wrug freudh erbynn ow lagha ha disakra ow thaklow sans; ny dhissernsons yntra sans hag ansans, ha ny dhysksons dissernya yntra glan hag avlan; i re dhegeas aga dewlagas dhiworth ow sabotys, mayth ov vy disakrys yn aga mysk.

²⁷ Hy fennsevigyon ynni yw avel bleydhi ow terri preydh, ow skoellya goes dhe dhistrui enevow may kaffons gwayn anewn.

²⁸ Hy frofoesi re wynngalghyas ragdha, ow kweles fals welesigethow hag ow kul dewinieth wowek, ow leverel, ‘Yndellma y lever an Arloedh Duw’, pan na gewsis an Arloedh.

²⁹ Pobel an tir re arwaskas ha ladra; i re debeldhyghtyas an boghosek ha'n edhommek, hag arwaska an alyon, ow nagha gwirvreus.

³⁰ My a hwilas gour anedha a vynna drehevel an fos ha sevel a-ragov y'n aswa, ma na ve an pow distruys, mes ny'n kevis.

³¹ Ytho my a dhiveris ow sorrvann warnedha; my re's konsumyas gans tan ow honnar; my re attylis aga fordh war aga fenn aga honan, yn-medh an Arloedh Duw.