Ezekiel 20 - An Bibel Kernewek 20234 (Kernewek Kemmyn)

Rebellyans Ysrael

¹ Y'n seythves blydhen, y'n pympes mis, yn degves dydh an mis, gwer a henavogyon Ysrael a dheuth dhe hwilas kusul a'n Arloedh, hag i a esedhas a-ragov.

² Ena ger an Arloedh a dheuth dhymm, ow leverel:

³ Mab-den, kows dhe henavogyon Ysrael, ha lavar dhedha, Yndellma y lever an Arloedh Duw: Yw rag hwilas kusul ahanav y teuthewgh? Dell vewav, ny vynnav kusul dhe vos hwilys genowgh hwi, yn-medh an Arloedh Duw.

⁴ A's breusydh jy? A vreusydh, mab den? Gwra dhedha aswonn taklow kasadow aga thasow,

⁵ ha lavar dhedha, Yndellma y lever an Arloedh Duw: Y'n jydh may tewisis vy Ysrael my a dos gans leuv drehevys dhe has chi Yakob, hag omdhiskwedhes dhedha yn pow Ejyp. My a dhrehevis ow leuv dhedha ha ti, ow leverel, My yw an Arloedh agas Duw.

⁶ Y'n jydh na my a dhrehevis ow leuv dhedha ha ti, my dh'aga dri yn-mes a bow Ejyp dhe dir a aspiis ragdha, a dhinwa leth ha mel, an tekka a'n tiryow oll.

⁷ My a leveris dhedha, Tewlewgh dhe-ves, hwi oll, an taklow kasadow usi a-rag agas dewlagas, ha na omdhefolewgh gans idolys Ejyp. My yw an Arloedh agas Duw.

⁸ Mes i a rebellyas er ow fynn ha ny vynnsons goslowes dhymm; ny wrug nagonan tewlel dhe-ves an taklow kasadow esa a-rag aga dewlagas, ha ny forsaksons idolys Ejyp. Ena yn-medhav, My a dhiver ow honnar warnedha, ow kowlwul ow sorr er aga fynn yn kres pow Ejyp.

⁹ Mes my a'n gwrug a-barth ow hanow, ma na vo disakrys a-wel dhe'n kenedhlow mayth esons yn aga mysk, may feuv aswonnys dhedha a-wel dhedha, orth aga dri yn-mes a bow Ejyp.

¹⁰ Ytho my a's dros yn-mes a bow Ejyp ha'ga dri dhe'n difeythtir.

¹¹ My a ros dhedha ow ordenansow, ha diskwedhes dhedha ow breusow, rag den mar kwra aga gwitha, ev a vew ynna.

¹² Ynwedh my a ros dhedha ow sabotys, dhe vos tokyn yntra my hag i, rag mayth aswonnens my dhe vos an Arloedh, neb a's sansha.

¹³ Byttegyns chi Ysrael a rebellyas er ow fynn y'n difeythtir. Ny gerdhsons war-lergh ow ordenansow, mes i a dhenaghas ow breusow, kyn fydh bew seul a's gwith; hag i a dhisakras ow sabotys yn feur. Ena yn-medhav, My a dhiver ow honnar warnedha y'n difeythtir, dh'aga howldhistrui.

¹⁴ My a wrug hemma a-barth ow hanow, ma na ve disakrys a-wel dhe'n kenedhlow, neb a's dres dhe-ves a-wel dhedha.

¹⁵ Ynwedh my a dhrehevis ow leuv, ow ti dhedha y'n difeythtir na vedhen aga dri dhe'n tir a res dhedha, a dhinwa leth ha mel, an tekka a'n tiryow oll;

¹⁶ drefenn i dhe dhenagha ow breusow, ha ny gerdhsons y'm ordenansow, hag i a dhisakras ow sabotys; rag yth esa aga holonn ow mos war-lergh aga idolys.

¹⁷ Byttegyns ow lagas a's sparyas, ha ny wrug vy aga diswul, na'ga howldhistrui y'n difeythtir.

¹⁸ My a leveris dh'aga mebyon y'n difeythtir, Na gerdhewgh yn ordenansow agas tasow, ha na withewgh aga breusow, ha na omdhefolewgh gans aga idolys.

¹⁹ My yw an Arloedh agas Duw; kerdhewgh y'm ordenansow, ha gwaytyewgh gul ow breusow.

²⁰ Sakrewgh ow sabotys rag may fons tokyn yntra my ha hwi, may hwodhvowgh my dhe vos an Arloedh agas Duw.

²¹ Mes an vebyon a rebellyas er ow fynn. Ny gerdhsons y'm ordenansow, na ny waytsons gul ow breusow, may hwra den bew dredha mara's gwra; i a dhisakras ow sabotys. Ena yn-medhav, My a dhiver ow honnar warnedha, ow kowlwul ow sorr er aga fynn y'n difeythtir.

²² Mes my a gildennas ow leuv dhe-ves, hag oberi a-barth ow hanow, ma na ve disakrys a-wel dhe'n kenedhlow, may hwrug vy aga dri yn-mes yn aga gwel.

²³ Ynwedh my a dhrehevis ow leuv ow ti dhedha yn difeythtir, my dh'aga skattra y'n kenedhlow ha dh'aga skoellya y'n gwlasow,

²⁴ drefenn na wrens ow breusow, hag i a naghas ow ordenansow, ha disakra ow sabotys, mes yth esa aga lagasow settys war idolys aga thasow.

²⁵ Ynwedh my a ros dhedha ordenansow nag ens da, ha breusow na yllens bewa ynna.

²⁶ My a's defolas der aga rohow aga honan, owth offrynna oll aga re kynsa-genys, rag may kwrellen vy aga euthega, may hwodhvens my dhe vos an Arloedh.

²⁷ Rakhenna, A vab den, kows dhe ji Ysrael ha leverel dhedha, Yndellma y lever an Arloedh Duw: Yn hemma ynwedh agas tasow a'm kablas ha bos dislel dhymm.

²⁸ My a's dros dhe'n tiredh may trehevis vy ow leuv ragdho, ow ti dh'y ri dhedha; mes peskweyth may hwelsons menydh ughel pynag po gwydhenn dhelyek pynag, i a wrug aga sakrifisow ena, ha ri ena rohow dhe'm provokya dhe sorr, hag offrynna ena aga sawer plegadow, ha diveri ena aga offrynn diwes.

²⁹ Ena yn-medhav dhedha, Pyth yw an tyller ughel esowgh ow mos dhodho? Ytho henwys yw Bama bys y'n jydh hedhyw.

³⁰ Rakhenna lavar dhe ji Ysrael, Yndellma y lever an Arloedh Duw: A wrewgh omdhefola agas honan yn fordh agas tasow, ow kul avoutri gans aga thaklow kasadow?

³¹ Pan offrynnowgh agas rohow, ha gul dh'agas mebyon mos dre dan, hwi a dhefol agas honan gans oll agas idolys bys y'n jydh hedhyw. A vynnav hwi dhe hwilas kusul ahanowgh, chi Ysrael? Dell vewav, yn-medh an Arloedh Duw, ny vynnav hwi dhe hwilas kusul ahanowgh.

³² Ny hwyrvydh an pyth usi yn agas brys, ow leverel, ‘Ny a vydh avel an kenedhlow, avel teyluyow an powyow, ow kordhya prenn ha men.’

³³ Dell vewav, yn-medh an Arloedh Duw, my a vydh myghtern warnowgh gans leuv grev, ha gans bregh ystynnys, ha gans sorr dinewys.

³⁴ My a'gas dre yn-mes a'n poblow ha'gas kuntelles dhiworth an powyow le may fewgh skattrys, gans leuv grev, ha gans bregh ystynnys, ha gans sorr dinewys.

³⁵ My a'gas dre dhe dhifeythtir an poblow ha'gas breusi ena, fas orth fas.

³⁶ Kepar dell vreusis agas tasow yn difeythtir pow Ejyp, yndella my a wra agas breusi hwi, yn-medh an Arloedh Duw.

³⁷ My a wra dhywgh tremena yn-dann an welenn, ha my a'gas dre yn kolm an kevambos.

³⁸ My a garth yn-mes ahanowgh an re usi ow rebellya hag offendya er ow fynn. My a's dre yn-mes dhiworth an pow mayth esons ow kodriga ynno; ny entrons a-berth yn pow Ysrael. Ena hwi a woer my dhe vos an Arloedh.

³⁹ Ha hwi, chi Ysrael, yndellma y lever an Arloedh Duw: Kewgh, servyowgh agas idolys, hwi oll. A-wosa hwi a woslow dhymm yn sur, ha ny dhisakrowgh ow hanow sans arta gans agas rohow ha gans agas idolys.

⁴⁰ Rag war ow menydh sans, war venydh ughel Ysrael, yn-medh an Arloedh Duw, oll chi Ysrael, i oll, a wra ow servya ena y'n tir; eno my a wra aga degemmeres. Ena my a vynn orthowgh agas offrynnow ha'n gwella a'gas sakrifisow gans oll agas taklow sans.

⁴¹ Kepar ha sawer plegadow my a'gas degemmer, pan y'gas drov yn-mes dhiworth an poblow, ha'gas kuntelles yn-mes a'n tiryow may fewgh skattrys ynna; ha my a vydh sanshes ynnowgh a-wel dhe'n kenedhlow.

⁴² Ena hwi a woer my dhe vos an Arloedh, pan y'gas drov dhe diredh Ysrael, dhe diredh a des gans leuv drehevis y ri dh'agas tasow.

⁴³ Ena hwi a berth kov a'gas fordhow, hag oll agas drogoberow may fewgh defolys dredha; ha kasadow dhywgh agas honan a vydh oll agas drogoberow a wrussowgh.

⁴⁴ Hwi a woer my dhe vos an Arloedh pan wrav vy yn ta genowgh a-barth ow hanow, a-der war-lergh agas drog fordhow ha'gas gwriansow legrys, a ji Ysrael, yn-medh an Arloedh Duw.

Profoesans erbynn an Negeb

⁴⁵ Ger an Arloedh a dheuth dhymm, ow leverel:

⁴⁶ Mab den, treyl dha fas troha'n soth, ha profoes erbynn koeswik gwel an Negeb.

⁴⁷ Lavar dhe goeswik an Negeb, Goslow ger an Arloedh: Yndellma y lever an Arloedh Duw, Awottavy owth enowi tan ynnos, hag ev a dheber pub gwydhenn las a-berth ynnos ha pub gwydhenn sygh. Ny vydh difeudhys an flamm a dan, ha pub fas a vydh goleskys ganso a'n dyghow dhe'n gogledh.

⁴⁸ Hag oll kig a wel my, an Arloedh, dh'y enowi; ny vydh difeudhys.

⁴⁹ Ena yn-medhav, ‘Ogh, Arloedh Duw, ymons ow leverel dhymm, “A nyns usi ow leverel parabolennow?” ’