Ezekiel 17 - An Bibel Kernewek 20234 (Kernewek Kemmyn)

An Dhew Er ha'n Gwinbrenn

¹ Ger an Arloedh a dheuth dhymm, ow leverel:

² Mab den, dro allegori yn-rag, ha lavar parabolenn dhe ji Ysrael.

³ Lavar: Yndellma y lever an Arloedh Duw: Er bras gans eskelli bras ha pluvennow hir, leun a bluv liesliw, a dheuth dhe Lebanon ha kemmeres an ughella skorrenn a gederwydhenn;

⁴ ev a dorras penn hy barrennow ha'y dri dhe bow a genwerth, ha'y settya yn sita a wikoryon.

⁵ Ena ev a gemmeras neppyth a has an tir ha'y worra y'n dor a hasek; ryb lies dowr ev a'n plansas avel helygenn;

⁶ Ev a skyllas, ha bos gwinbrenn owth omlesa isel; y skorrennow a dreylyas war-tu hag ev, hag y feu y wreydh yn-danno. Ytho y teuth ha bos gwinbrenn ha gul eginyow ha dannvon barrennow yn-mes.

⁷ Yth esa er bras arall gans eskelli bras ha pluv pals; hag otta, an gwinbrenn ma a dreylyas y wreydhyow dhodho; hag a dhannvonas y varrennow dhodho, may hwrella y dhowrhe dhiworth an dor may feu plynsys.

⁸ Y feu treusplynsys dhe dhor da ryb lies dowr dhe wul skorr ha dhe dhoen frut, dhe vos gwinbrenn bryntin.

⁹ Lavar: Yndellma y lever an Arloedh Duw: A sewen? A ny denn ev y wreydhyow yn-bann, ha terri y frut rag may hwetthro, hag oll y varrennow yr a wedher? Ny vydh gans leuv grev na meur a bobel y fydh tennys yn-bann dhiworth y wreydhyow.

¹⁰ Mars yw treusplynsys, a wra ev sewena? Pan wra gwyns an est y dochya a ny wra ev gwedhra oll yn tien, gwedhra y'n dor may tevis?

¹¹ Ger an Arloedh a dheuth dhymm, ow leverel:

¹² Lavar dhe'n chi diwostydh, A ny wodhowgh styr an taklow ma? Lavar, Otta myghtern Babylon a dheuth dhe Yerusalem ha kemmeres hy myghtern ha'y fennsevigyon, ha'ga dri ganso dhe Babylon.

¹³ Ena ev a gemmeras onan a'n has ryel ha gul kevambos ganso, ha'y worra yn-dann li. Ynwedh ev a gemmeras ledyoryon an wlas,

¹⁴ rag may fe gwlaskor isel, ha ma na omdhrehaffa arta, mes may saffa dre witha y gevambos.

¹⁵ Mes ev a rebellyas er y bynn, ow tannvon y gannasow dhe Ejyp, dhe ri dhodho mergh ha lu bras. A yll bos seweni? A yll skapya, neb a wra yndella? A yll terri kevambos ha skapya?

¹⁶ Dell vewav vy, yn-medh an Arloedh Duw, ev a verow yn Babylon, yn tyller an myghtern a'n gwrug ev myghtern; may tispresyas y li, ha terri y gevambos.

¹⁷ Ny vydh Faro gweres dhodho yn bresel, gans y lu bras hag ost meur, pan vydh gweythyow-esedhva krugys, ha pan vydh touryow-esedhva drehevys dhe dreghi dhe-ves lies enev.

¹⁸ Drefenn ev dhe dhispresya an ti, ow terri an kevambos, hag ow ri y leuv, ha gul oll an taklow ma, ny skap.

¹⁹ Rakhenna yndellma y lever an Arloedh Duw: Dell vewav, my a attal war y benn ow ti a dhispresyas, ha'm kevambos a dorras.

²⁰ My a les ow roes warnodho, hag ev a vydh kechys y'm antell, ha my a'n dre dhe Babylon ha'y vreusi ena, drefenn ev dhe vos dislel dhymm.

²¹ Hag oll flour y soudoryon a goedh dre'n kledha, ha'n remenant a vydh skattrys gans pub gwyns; ha hwi a woer, my, an Arloedh dhe gewsel.

²² Yndellma y lever an Arloedh Duw: My ow honan a gemmer skyllenn dhiworth topp ughel an gederwydhenn, ha'y settya y'n dor; dhiworth topp hy barrennow yowynk my a derr skyllenn bleudh; my ow honan a's plans war venydh pur ughel.

²³ Yn ughella menydh Ysrael my a'n plans, may hallo dri yn-mes skorrennow ha doen frut, ha dos ha bos kederwydhenn vryntin, ha pub par edhen a drig yn-danno, ha pub par kreatur askellek a drig yn skeus y skorrennow.

²⁴ Ena oll gwydh an gwel a woer my dhe vos an Arloedh. My a dhre dhe'n leur an wydhenn hir hag ughelhe an wydhenn isel, my a dhesygh an wydhenn las, ha gul dhe'n wydhenn sygh skylla; My an Arloedh re gewsis ha my a'n gwra.