Ezekiel 12 - An Bibel Kernewek 20234 (Kernewek Kemmyn)

Tokyn a'n Gethneth

¹ Ger an Arloedh a dheuth dhymm, ow leverel:

² Mab den, yth esos trigys yn kres chi diwostydh. Yma dhedha dewlagas dhe weles mes ny welons, yma dhedha diwskovarn dhe glewes mes ny glewons, rag chi diwostydh yns i.

³ Ytho ty, A vab den, pareus ragos dha honan fardellow rag divroedh, hag yn golow dydh, hag i ow mires, ke dhe dhivroedh; ke dhiworth dha dyller dhe dyller arall a-wel dhedha. Y hyll bos, i dhe gonvedhes, kyn fons i chi diwostydh.

⁴ Dro dha fardellow yn-mes dydhweyth, kepar ha fardellow divroedh, ha ke dhe-ves gorthugherweyth a-wel dhedha, avel an re a wra mos dhe dhivroedh.

⁵ Pal toll ragos der an fos a-wel dhedha, ha dro dha fardellow dredho.

⁶ Gwra aga drehevel war dha skoedh a-wel dhedha, ha'ga dri yn-mes y'n tewlder. Kudh dha fas, rag na welli an tir; rag my re'th wrug tokyn dhe ji Ysrael.

⁷ Ytho my a wrug kepar dell veu gorhemmynnys dhymm. My a dhros ow fardellow yn-mes dydhweyth avel fardellow rag divroedh, hag y'n tewlder my a balas toll der an fos dre leuv; y'n tewlder my a's dros yn-mes, ha'ga doen war ow skoedh a-wel dhedha.

⁸ Ger an Arloedh a dheuth dhymm myttin, ow leverel:

⁹ Mab den, a ny wrug chi Ysrael, an chi diwostydh, leverel dhis, ‘Pandr'a wredh?’

¹⁰ Lavar dhedha, ‘Yndellma y lever an Arloedh Duw: An dhargan ma yw a-dro dhe'n pennsevik yn Yerusalem hag oll chi Ysrael usi ynni.’

¹¹ Lavar, ‘My yw tokyn ragowgh: kepar dell wrug vy, yndella y fydh gwrys dhedha i. Yth ons yn divroedh, yn kethneth.’

¹² An pennsevik usi yn aga mysk a dhrehav y fardellow war y skoedh y'n tewlder, ha mos dhe-ves; ev a bal toll y'n fos ha'ga doen dhe-ves dredho; ev a gudh y fas, ma na allo gweles an dor gans y dhewlagas.

¹³ Ha my a les ow roes warnodho, hag ev a vydh kechys y'm antell, ha my a'n dre dhe Babylon, tir an Kaldeanys, mes ny'n gwel, hag ena y ferow.

¹⁴ Ha my a skatter dhe bub gwyns oll an re usi a-dro dhodho, y weresoryon, hag oll y soudoryon, ha tenna kledha war aga lergh.

¹⁵ Hag i a woer my dhe vos an Arloedh pan wrav aga skoellya a-les yn mysk an kenedhlow, ha'ga skattra y'n gwlasow.

¹⁶ Mes my a spar dhiworta nebes anedha dhiworth an kledha, dhiworth divoetter, ha dhiworth pla, rag may teriffons aga thaklow kasadow y'n kenedhlow a dhons di. Ena i a woer my dhe vos an Arloedh.

¹⁷ Ger an Arloedh a dheuth dhymm, ow leverel:

¹⁸ Mab den, deber dha vara yn unn grysya, hag yv dha dhowr yn unn grena ha gans fienasow.

¹⁹ Lavar dhe bobel an tir, Yndellma y lever an Arloedh Duw a-dro dhe drigoryon Yerusalem ha pow Ysrael: I a dheber aga bara yn fienasow, hag eva aga dowr yn euth, rag hy thir a vydh lommhes a bup-tra eus ynno, drefenn freudh oll an re usi trigys ynni.

²⁰ An trevow annedhys a vydh ynyal ha'n tir a vydh gwastyes; ha hwi a woer my dhe vos an Arloedh.

²¹ Ger an Arloedh a dheuth dhymm, ow leverel:

²² Mab den, Pandr'yw an henlavar ma a'gas beus a-dro dhe bow Ysrael, ‘An dydhyow a hirha, ha pub gwelesigeth a dhe goll’?

²³ Rakhenna lavar dhedha, ‘Yndellma y lever an Arloedh Duw: My a worr diwedh dhe'n henlavar ma, ha ny'n leverons arta yn Ysrael.’ Mes lavar dhedha, An dydhyow re dheuth nes, ha keweras pub gwelesigeth.

²⁴ Rag ny vydh arta fals welesigeth vytholl na fella, na fekyl dhewinieth yn mysk chi Ysrael.

²⁵ Mes my, an Arloedh, a gews an pyth a gowsav hag ev a hwyrvydh. Ny vydh delatys na fella; mes yn agas dydhyow, a ji diwostydh, my a gews an ger ha'y gowlwul, yn-medh an Arloedh Duw.

²⁶ Ger an Arloedh a dheuth dhymm, ow leverel:

²⁷ Mab den, otta chi Ysrael ow leverel, ‘An welesigeth a wra ev hy gweles yw rag lies dydh alemma; ev a brofoes a-dro dhe dermynyow pell.’

²⁸ Rakhenna lavar dhedha, Yndellma y lever an Arloedh Duw: Ny vydh delatys na fella nagonan a'm geryow; an ger a gowsav a vydh gwrys, yn-medh an Arloedh Duw.