Ezekiel 11 - An Bibel Kernewek 20234 (Kernewek Kemmyn)

Breus erbynn an Gusulyoryon Dhrog

¹ Ena an spyrys a'm drehevis ha'm dri dhe yet est chi an Arloedh, a vir troha'n est. Hag otta, orth an yet yth esa pymp gour warn ugens, ha my a welas yn aga mysk Yaazania mab Azzur, ha Pelatia mab Benaya, pennsevigyon an bobel.

² Ena ev a leveris dhymm, ‘Mab den, an re ma yw an wer usi ow prasa sherewynsi hag ow ri drog-gusul y'n sita ma.

³ Yn-medhons, “Nyns yw ogas an termyn rag drehevel chiow; an sita yw an galter ha ni yw an kig.”

⁴ Rakhenna profoes er aga fynn; profoes, mab den.’

⁵ Ena Spyrys an Arloedh a goedhas warnav vy, hag yn-medh ev dhymm, ‘Lavar, Yndellma y lever an Arloedh: Yndella hwi re leveris, chi Ysrael; my a woer an pythow a dheu yn agas brys.

⁶ Hwi re ladhas lies y'n sita ma, ha lenwel hy stretys a gorfow.

⁷ Rakhenna yndellma y lever an Arloedh Duw: An korfow re worrsowgh y'n kres anedhi, i yw an kig, ha hi yw an galter, mes my a'gas dre yn-mes dhiworti.

⁸ Hwi re borthas own a'n kledha; ha my a dhre an kledha warnowgh, yn-medh an Arloedh Duw.

⁹ My a'gas dre yn-mes anedhi, ha'gas ri yn leuv estrenyon ha gul breusow warnowgh.

¹⁰ Hwi a goedh der an kledha; yn oryon Ysrael my a'gas breus. Ena hwi a woer my dhe vos an Arloedh.

¹¹ Ny vydh hi kalter ragowgh, na ny vydhowgh kig a-berth ynni; yn oryon Ysrael my a'gas breus.

¹² Ena hwi a woer my dhe vos an Arloedh; rag ny gerdhsowgh y'm ordenansow, na ny wrussowgh ow breusow, mes hwi re wrug war-lergh breusow an kenedhlow esons a-dro dhywgh.’

¹³ Lemmyn pan esen vy ow profoesa, Pelatia mab Benaya a verwis. Ena my a goedhas war ow fas ha kria gans lev ughel, ha leverel, ‘Ogh Arloedh Duw! A vynnydh dhiswul remenant Ysrael?’

Ambos Duw dhe Ysrael

¹⁴ Ger an Arloedh a dheuth dhymm, ow leverel:

¹⁵ Mab den, dha vreder, dha vreder, dha neskerens, hag oll chi Ysrael yn tien, i yw an re may leveris trigoryon Yerusalem dhedha, ‘Pell yns i dhiworth an Arloedh! An tir ma yw res dhyn yn perghennogeth.’

¹⁶ Rakhenna lavar: Yndellma y lever an Arloedh Duw: Kynth y's dannvonas pell yn mysk an kenedhlow, ha'ga skattra yn mysk an gwlasow, my a vydh meneghi ragdha pols byghan y'n gwlasow may teuthons di.

¹⁷ Rakhenna lavar, Yndellma y lever an Arloedh Duw: My a'gas kuntell dhiworth an poblow, ha'gas kuntell dhiworth an gwlasow may fewgh skattrys ynna, ha my a re dhywgh pow Ysrael.

¹⁸ I a dheu di ha remova oll hy thaklow vil ha'y thaklow kasadow dhiworti.

¹⁹ My a re dhedha unn golonn, ha my a worr spyrys nowydh ynnowgh; my a gemmer an golonn a ven dhiworth aga horf ha ri dhedha kolonn a gig,

²⁰ rag may kerthons y'm ordenansow ha gwitha ow breusow ha'ga gul. Ena i a vydh ow fobel, ha my a vydh aga Duw.

²¹ Mes an re may kerdh aga holonn war-lergh aga thaklow vil ha'ga thaklow kasadow, my a dhre aga fordh war aga fenn, yn-medh an Arloedh Duw.

²² Ena an cherubim a drehevis aga eskelli ha'ga rosow rybdha, hag yth esa glori Duw Ysrael warnedha a-wartha.

²³ Glori an Arloedh a yskynnas yn-mes a'n sita, ha sevel war an menydh yw a'n est dhe'n sita.

²⁴ An Spyrys a'm drehevis ha'm dri dhe'n dhivresow yn Kaldea y'n welesigeth yn Spyrys Duw. Ena an welesigeth a welsen a yskynnas dhiworthiv.

²⁵ Ha my a gewsis dhe'n dhivresow oll geryow an Arloedh a dhiskwedhsa dhymm.