Ezekiel 10 - An Bibel Kernewek 20234 (Kernewek Kemmyn)

Glori Duw a As Yerusalem

¹ Ena my a viras, hag otta, y'n fyrmament esa a-ugh penn an cherubim yth esa neppyth avel men saffir, hag yth omdhiskwedhas a-ughta avel semlans hevelep tron.

² Ena ev a leveris dhe'n gour o gwiskys yn lien, ‘Ke a-ji dhe'n tyller ynter an rosow yn-dann an cherub. Lanw dha dhiwla a golennow tan dhiworth an tyller ynter an cherubim, ha'ga skattra war an sita.’ Hag ev a entras a-rag ow dewlagas.

³ Lemmyn yth esens an cherubim ow sevel a-dhyghowbarth dhe'n chi pan entras an gour, ha'n gommolenn a lenwis an klos a-bervedh.

⁴ Ha glori Duw Ysrael a yskynnas a-dhiwar an cherub bys yn treudhow an chi, ha'n chi o lenwys a'n gommolenn, ha'n klos o leun a splannder glori an Arloedh.

⁵ Son eskelli an cherubim o klewys bys y'n klos a-ves, kepar ha lev Duw Ollgalloesek pan usi ow kewsel.

⁶ Pan worhemmynnis dhe'n gour o gwiskys yn lien, ow leverel, ‘Kemmer tan dhiworth an tyller ynter an rosow, dhiworth an tyller ynter an cherubim’, ev a dheuth ha sevel ryb onan a'n an rosow.

⁷ Ena an cherub a ystynnas y leuv dhiworth an tyller ynter an cherubim dhe'n tan esa ynter an cherubim, ha'y gemmeres ha'y worra yn dorn a'n gour o gwiskys yn lien, hag ev a'n kemmeras ha mos dhe-ves.

⁸ Yth esa dhe'n cherubim dell hevelis furv leuv den yn-dann aga eskelli.

⁹ My a viras, hag otta peder ros ryb an cherubim, unn ros ryb an unn cherub, ha ros arall ryb cherub arall, ha semlans an rosow o haval dhe owrven.

¹⁰ Yn aga semlans, pubonan a'n peswar o haval dhe'n re erell, kepar dell ve ros a-ji dhe ros.

¹¹ Pan ens, yth ens dhe onan a'n peswar-tu, ny dreylyens hag i ow mos, mes dhe'n tyller mayth esa an penn ow mires, ena yth ens; ny dreylyens hag i ow mos.

¹² Oll aga horf, aga heyn, ha'ga diwla, ha'ga eskelli, ha'n rosow o leun a lagasow a-derdro – an rosow a veu dh'aga feswar.

¹³ Yth esens orth aga gelwel ‘an rosow ow troyllya’ y'm klewans.

¹⁴ Yth esa peswar fas dhe bubonan: an kynsa fas o fas an cherub, ha'n nessa fas o fas den, ha'n tressa o fas lew, ha'n peswora o fas er.

¹⁵ Ena an cherubim a yskynnas war-vann. Hemm yw an kreatur bew a welis ryb an avon Kebar.

¹⁶ Pan e an cherubim, an rosow e rybdha, ha pan dhrehevi an cherubim aga eskelli dhe yskynna dhiworth an dor, ny dreylya an rosow ynwedh dhiworth aga thenewen.

¹⁷ Pan sevens, i a sevi; ha pan yskynnens, i ynwedh a yskynna gansa; rag bos spyrys an kreatur bew ynna.

¹⁸ Ena glori an Arloedh eth dhe-ves dhiwar dreudhow an chi, ha sevel a-ugh an cherubim.

¹⁹ Ha'n cherubim a dhrehevis aga eskelli hag yskynna dhiworth an dor a-wel dhymm, hag i ow mos yn-mes; ha pan ethons dhe-ves yth esa aga rosow rybdha. I a sevis orth daras yet est chi an Arloedh, hag yth esa glori Duw Ysrael a-ughta a-vann.

²⁰ Hemm o an kreatur bew neb a welis yn-dann Dhuw Ysrael orth an avon Kebar, ha my a wodhva i dhe vos cherubim.

²¹ Pubonan a'n peswar a's tevo peswar fas ha peder askell, ha hevelep diwla den o yn-dann aga eskelli.

²² Ha hevelep aga fasow o an keth fasow a welis ryb an avon Kebar, aga semlans hag i aga honan. Pubonan e kompes war-rag.