Ester 4 - An Bibel Kernewek 20234 (Kernewek Kemmyn)

Ester a Ervir Ri Gweres dhe'n Yedhewon

¹ Lemmyn pan wodhva Mordekay pup-tra a via gwrys, ev a skwardyas y dhillas ha gwiska yskar ha lusu, ha mos yn-mes dhe gres an sita, ow kria gans garm ughel ha hwerow.

² Mos a wrug bys y'n barth a-rag yet an myghtern, rag na ylli denvyth entra dhe yet an myghtern gwiskys yn yskar.

³ Hag yn pub rannvro, py le pynag may teffa gorhemmynn hag arghadow an myghtern, yth esa drem meur yn mysk an Yedhewon, gans penys hag oelva ha kynvann; yth esa lies huni a'ga growedh yn yskar ha lusu.

⁴ Pan dheuth maghtethyon ha spadhesigyon Ester ha derivas dhedhi, grevys yn town veu an vyghternes; dannvon dillas rag kwetha Mordekay a wrug hi yn le y yskar, mes ny vynna ev aga degemmeres.

⁵ Ena, Ester a elwis war Hatak, onan a spadhesigyon an myghtern, neb a'n apoyntyas dh'y servya, ha hi a erghis dhodho mayth ella dhe Mordekay rag dyski an pyth o hemma ha'n praga anodho.

⁶ Ytho, yth eth Hatak yn-mes dhe Mordekay bys yn plen an sita a-rag yet an myghtern.

⁷ Ha Mordekay a dherivas dhodho oll an pyth re hwarvia dhodho ha'n myns kewar a arghans hag a wrussa Haman ambosa y be yn tresorvaow an myghtern rag distrui an Yedhewon.

⁸ Ynwedh, ev a ros dhodho dasskrif a dekst an arghadow a via res yn Shushan rag aga distrui, ma'n diskwettha ev dhe Ester, ha'y dherivas orti; ha charjya dhedhi mayth ella hi a-ji bys y'n myghtern, dhe gonjorya ha dhe wul pysadow orto rag hy fobel.

⁹ Ytho Hatak eth ha derivas orth Ester geryow Mordekay.

¹⁰ Ena Ester a gewsis orth Hatak, ha ri dhodho messaj rag Mordekay,

¹¹ ‘Oll gwesyon an myghtern ha pobel rannvroyow an myghtern a woer bos unn lagha rag peub, po gour po benyn, seul a dheffo bys y'n myghtern y'n klos a-bervedh, heb bos gelwys: gorrys vydh dhe'n mernans, marnas ev mayth ystynno an myghtern an welenn owrek dhodho may fewo; mes ny veuv vy gelwys dhe dhos a-ji bys y'n myghtern nans yw deg dydh warn ugens.’

¹² Hag i a dherivas orth Mordekay geryow Ester.

¹³ Mordekay a leveris dhedha may taskorrens gorthyp dhe Ester, ‘Na dyb y'th enev ty dhe skapya yn chi an myghtern, moy ages oll an Yedhewon.

¹⁴ Rag mar tewydh yn tien y'n eur ma, ha difresyans ha selwyans a dheu dhe'n Yedhewon dhiworth tyller arall, ty ha chi dha das a vydh distruys: ha piw a woer na vesta devedhys dhe'th savla ryel rag termyn a'n par ma?’

¹⁵ Ena Ester a leveris dhedha may taskorrens gorthyp dhe Mordekay,

¹⁶ ‘Ke, kuntell oll an Yedhewon usi yn Shushan, ha gwrewgh penys ragov, ha na wrewgh hwi dybri nag eva tri dydh, nosweyth na dydhweyth: my ynwedh, ha'm maghtethyon, penys a wren ni yn kepar maner. Ena mos a-ji bys y'n myghtern a wrav kyn fo erbynn an lagha: ha mar pydhav distruys, distruys vydhav.’

¹⁷ Ytho, yth eth Mordekay yn y fordh, ha gul war-lergh pup-tra re arghsa Ester dhodho.