Ester 1 - An Bibel Kernewek 20234 (Kernewek Kemmyn)

Kevewi Myghtern Ahasuerus

¹ Lemmyn yn dydhyow Ahasuerus, (hemm yw Ahasuerus esa ow reynya a-dhiworth Eynda bys yn Ethiopia, war seyth rannvro ha hwegh ugens):

² y'n dydhyow na, pan o an myghtern Ahasuerus esedhys war se y wlaskor, esa yn Shushan an bennsita,

³ yn tressa blydhen y reyn, ev a wrug kevewi rag y bennsevigyon ha'y wesyon oll; hag yth esa a-ragdho nerth Persia ha Media, ugheloryon ha gwahalyethow an rannvroyow.

⁴ Ev a dhiskwedhas rychys y wlaskor gloryus hag enor y veuredh bryntin lies dydh, kans dydh ha peswar-ugens.

⁵ Pan veu an dydhyow ma kollenwys, an myghtern a wrug kevewi rag oll an bobel a omgevi yn Shushan an bennsita, byghan ha bras, seyth dydh, yn klos lowarth palys an myghtern.

⁶ Yth esa kroglennow a goton wynn ha pann glasrudh, kelmys gans kerdyn a lien fin ha purpur orth kylghyow a arghans ha kolovenyow a varbel. Yth esa growedhvaow a owr hag arghans war leur a veyn gwyrdh, marbel, askell ha meyn glaswyrdh.

⁷ Hag y feu res dhedha diwes yn lestri owr (ha'n lestri dihaval an eyl dh'y gila), ha palster a win ryel herwydh helder an myghtern.

⁸ Ha lagha an eva o, na ve denvyth konstrynys; rag yndella yth arghsa an myghtern dhe oll soedhogyon y ji, may hwrella peub herwydh y vodh.

⁹ Keffrys, Vashti an vyghternes a wrug kevewi rag an benynes y'n chi ryel esa dhe'n myghtern Ahasuerus.

¹⁰ An seythves dydh, ha kolonn an myghtern heudh gans gwin, erghi a wrug ev dhe Mehuman, Biztha, Harbona, Bigtha, hag Abagtha, Zethar, ha Karkas, an seyth spadhesik a venystra yn golok myghtern Ahasuerus,

¹¹ may kyrghens Vashti an vyghternes a-rag an myghtern gans tulyfant ryel, rag diskwedhes hy thekter dhe'n poblow ha dhe'n bennsevigyon; rag y feu hy semlans da dh'y weles.

¹² Mes skonya a wrug an vyghternes Vashti a dhos orth gorhemmynn an myghtern der an spadhesigyon; hag yndella, pur serrys o an myghtern ha'y gonnar a loskas ynno.

Myghternes Vashti Gordhyllys a'y Soedh

¹³ Ena an myghtern a hwilas kusul a'n dus fur a aswonni an termynyow (rag yndella yth o maner an myghtern war-tu oll a aswonni lagha ha breus;

¹⁴ hag yth esa yn y ogas Karshena, Shethar, Admatha, Tarshish, Meres, Marsena, ha Memukan, an seyth pennsevik a Persia ha Media, a weli fas an myghtern, hag o esedhys yn kynsa renk an wlaskor):

¹⁵ ‘Herwydh an lagha, pandr'a wren ni dhe'n vyghternes Vashti rag na gollenwis hi an pyth re arghsa an myghtern Ahasuerus dhedhi der an spadhesigyon?’

¹⁶ Ha Memukan a worthybis a-rag an myghtern ha'n bennsevigyon, ‘Ny wrug Vashti an vyghternes kamm dhe'n myghtern hepken, mes ynwedh dhe oll an bennsevigyon, ha dhe oll an poblow usi yn oll rannvroyow an myghtern Ahasuerus.

¹⁷ Rag y fydh an gweythres ma a'n vyghternes dyllys bys yn benynes oll, ha gul dh'aga gwer bos fiys yn aga dewlagas pan leverons, “Yth erghis an myghtern Ahasuerus may fe Vashti an vyghternes kyrghys a-dheragdho, mes ny dheuth hi”.

¹⁸ Ha'n keth jydh ma, pennsevigesow Persia ha Media, neb re glewas a fara an vyghternes, a venek hemma erbynn oll pennsevigyon an myghtern. Ytho, y fydh kals a vismer hag a gonnar.

¹⁹ Mara pleg dhe'n myghtern, des gorhemmynn ryel a-dhiworto, ha bedhes skrifys yn mysk laghys Persia ha Media na yll bos daskelwys, na dheffo Vashti namoy a-dherag myghtern Ahasuerus; ha res an myghtern hy studh ryel dhe nebonan a vo gwell agessi hi.

²⁰ Ytho, arghadow an myghtern hag a wra ev, pan vo dyllys dres oll y wlaskor, (rag meur yth yw), oll an gwragedh a re enor dh'aga gwer, ha dhe'n byghan ha dhe'n bras.’

²¹ An lavar o plegadow dhe'n myghtern ha'n bennsevigyon; ha'n myghtern a wrug war-lergh ger Memukan.

²² Ev a dhannvonas lytherow bys yn oll rannvroyow an myghtern, bys yn pub rannvro herwydh skrif an tyller na, ha dhe bub pobel oll herwydh aga yeth, may fe pub gour mester yn y ji y honan.