Eksodus 9 - An Bibel Kernewek 20234 (Kernewek Kemmyn)

Mernans an Enyvales

¹ Ha'n Arloedh a leveris dhe Moyses, ‘Ke dhe Faro, ha leverel dhodho, “Yndellma y lever an Arloedh, Duw an Ebrowyon: Gas ow fobel dhe vones ma'm serfyons.

² Rag mar neghydh aga gasa dhe vones ha'ga gwitha hwath,

³ otta, dorn an Arloedh a goedh gans pla meur war agas gwarthek usi y'n parkow, an vergh, an asenes, an kowrvergh, an oghen ha'n greow.

⁴ Mes an Arloedh a wra dissernya yntra gwarthek Ysrael ha gwarthek Ejyp, ma na varwo travyth a bew mebyon Ysrael.” ’

⁵ Ha'n Arloedh a settyas termyn, ow leverel, ‘A-vorow an Arloedh a wra an dra ma y'n tir.’

⁶ Ha'n vorow an Arloedh a wrug an dra ma; gwarthek oll an Ejyptianys a verwis mes a'n gwarthek a vebyon Ysrael ny verwis nagonan.

⁷ Ha Faro a dhannvonas, hag otta, nyns o marow nagonan a warthek Ysrael. Mes kolonn Faro o kaleshes ha ny asas an bobel dhe vones.

Bryghi

⁸ Ha'n Arloedh a leveris dhe Moyses ha dhe Aron, ‘Kemmerewgh dornasow lusu a'n forn, ha gasa Moyses dh'aga thewlel war-tu ha nev a-wel Faro.

⁹ Hag y hwra dos ha bos ponn dre bow Ejyp, ha dos ha bos bryghi ow tardha yn kuriegi war dhen ha best dre bow Ejyp oll.’

¹⁰ Ytho i a gemmeras lusu dhiworth an forn, ha sevel a-rag Faro, ha Moyses a's tewlis war-tu ha nev, hag y teuth ha bos bryghi ow tardha yn kuriegi war dhen ha best.

¹¹ Ha ny ylli an hudoryon sevel a-rag Moyses drefenn an bryghi, rag yth esa an bryghi war an hudoryon ha'n Ejyptianys oll.

¹² Mes an Arloedh a galeshas kolonn Faro, ha ny woslowas orta; dell gowssa an Arloedh dhe Moyses.

Keser

¹³ Ena an Arloedh a leveris dhe Moyses, ‘Sav myttin a-varr ha sevel a-rag Faro, ha leverel dhodho, “Yndellma y lever an Arloedh, Duw an Ebrowyon: Gas ow fobel dhe vones, ma'm serfyons.

¹⁴ Rag an dreveth ma my a wra dannvon oll ow flagys war dha golonn, ha war dha servysi ha war dha bobel, may hwodhvi nag eus nagonan avelov vy yn oll an nor.

¹⁵ Rag erbynn lemmyn my a allsa ystynn ow dorn ha'th weskel ty ha'th pobel gans an pla, ha ty a via treghys a'n nor.

¹⁶ Mes rakhemma y'th hesis dhe vewa, dhe dhiskwedhes dhis ow galloes, may fo derivys ow hanow war oll an nor.

¹⁷ Hwath yth omughelhydh erbynn ow fobel, ha ny's gesydh dhe vones.

¹⁸ Otta, a-vorow a-dro dhe'n prys ma, my a wra dhe goedha keser pur vras, a eghenn na veu gwelys bythkweth yn Ejyp a'n jydh y feu fondys bys lemmyn.

¹⁹ Lemmyn ytho dannvon, kyrgh dha warthek hag oll a'th eus y'n pras a-ji dhe woskes saw; rag an keser a wra dos war bub den ha best usi y'n pras ha na vydh kuntellys dhe dre, ha merwel a wrons.” ’

²⁰ Ena, ev neb a borthas own a er an Arloedh yn mysk servysi Faro a wrug dh'y gethyon ha'y warthek fia dhe'n chiow;

²¹ mes ev neb na wrug vri a er an Arloedh a asas y gethyon ha'y warthek y'n pras.

²² Ha'n Arloedh a leveris dhe Moyses, ‘Ystynn dha dhorn war-tu ha nev, hag y fydh keser yn pow Ejyp oll, war dhen ha best ha pub plans y'n gwel, dre bow Ejyp oll.’

²³ Ena Moyses a ystynnas y welenn war-tu ha nev; ha'n Arloedh a dhannvonas taran ha keser, ha tan a resas dhe'n nor. Ha'n Arloedh a lesas keser war bow Ejyp;

²⁴ yth esa keser, ha tan owth omdhiskwedhes yn mysk an keser, keser pur vras, a'n par na veu gwelys bythkweth yn pow Ejyp oll a-ban dheuth ha bos kenedhel.

²⁵ An keser a weskis peub hag esa y'n gwel dre bow Ejyp oll, ha den ha best; ha'n keser a weskis pub plans a'n gwel ha brewi pub gwydhenn a'n gwel.

²⁶ Marnas yn pow Goshen, le mayth esa mebyon Ysrael, ny veu keser.

²⁷ Ena Faro a dhannvonas, ha gelwel Moyses hag Aron ha leverel dhedha, ‘My re beghas an prys ma; an Arloedh yw ewn, ha my ha'm pobel yw kamm.

²⁸ Pys an Arloedh; rag lowr re beu a'n taran ha'n keser ma; my a as dhywgh mones, ha ny wrewgh hwi gortos na fella.’

²⁹ Moyses a leveris dhodho, ‘Kettell av vy a'n sita, my a wra ystynn ow diwla dhe'n Arloedh; hedhi a wra an taran, ha ny vydh namoy keser, may hwodhvi bos an nor dhe'n Arloedh.

³⁰ Mes ty ha'th servysi, my a woer na berthowgh own na hwath an Arloedh Duw.’

³¹ (Distruys veu an lin ha'n heydh, rag yth esa an heydh yn penn-ys ha'n lin owth egina,

³² mes ny veu distruys an gwaneth ha'n gwaneth-spelt, rag diwedhes yns i ow tevi).

³³ Ytho Moyses eth yn-mes a'n sita dhiworth Faro, hag ystynn y dhiwdhorn dhe'n Arloedh; ha'n taran ha'n keser a hedhis, ha ny goedhas na fella an glaw war an nor.

³⁴ Mes pan welas Faro an glaw ha'n keser ha'n taran dhe hedhi, ev a beghas hwath arta, ha kaleshe y golonn, ev ha'y servysi.

³⁵ Ytho kolonn Faro a veu kaleshes, ha ny asas mebyon Ysrael dhe vones; dell gewssa an Arloedh dre Moyses.