Eksodus 6 - An Bibel Kernewek 20234 (Kernewek Kemmyn)

¹ Mes an Arloedh a leveris dhe Moyses, ‘Lemmyn ty a wel an pyth a wrav dhe Faro; rag ev a's dannvon, krev an dhorn, ha krev an dhorn ev a's gorr yn-mes a'y dir.’

Duw a Elow Moyses

² Ha Duw a leveris dhe Moyses, ‘My yw an Arloedh;

³ ha my a omdhiskwedhas dhe Abraham, dhe Ysak ha dhe Yakob avel Duw Ollgalloesek, mes der ow hanow vy, an Arloedh, nyns en vy aswonnys dhedha.

⁴ Ynwedh my re fastyas ow hevambos gansa, dhe ri dhedha pow Kanan, an pow may hwodrigsens ynno.

⁵ Dhe voy, my re glewas kynvann mebyon Ysrael yw synsys yn kethneth gans an Ejyptianys, ha my re borthas kov a'm kevambos.

⁶ Lavar ytho dhe vebyon Ysrael, “My yw an Arloedh hag a wra agas dri a-dhann veghyow an Ejyptianys ha'gas livra a'ga hethneth ha'gas dasprena gans bregh ystynnys ha dre vreusow meur,

⁷ ha'gas kemmeres avel ow fobel, ha my a vydh agas Duw; ha hwi a woer my dhe vos an Arloedh agas Duw re'gas dros a-dhann veghyow an Ejyptianys.

⁸ Ha my a'gas dre bys yn tir hag a des y ri dhe Abraham, dhe Ysak ha dhe Yakob; my a'n re dhywgh yn perghennogeth. My yw an Arloedh.” ’

⁹ Moyses a gewsis yndellma dhe vebyon Ysrael; mes ny goelsons orth Moyses drefenn galar aga spyrys ha'ga gonis fell.

¹⁰ Ha'n Arloedh a leveris dhe Moyses,

¹¹ ‘Ke a-ji, lavar dhe Faro myghtern Ejyp, may hasso mebyon Ysrael dhe vones a'y dir.’

¹² Mes Moyses a leveris a-rag an Arloedh, ‘Otta, ny goelas mebyon Ysrael orthiv; fatell wra Faro goslowes orthiv ha my antrodreghys ow diwweus?’

¹³ Ha'n Arloedh a gewsis dhe Moyses hag Aron, orth aga gorhemmynna a-barth mebyon Ysrael hag a-barth Faro myghtern Ejyp, dhe dhri mebyon Ysrael yn-mes a bow Ejyp.

Aghow Moyses hag Aron

¹⁴ An re ma yw pennow aga theyluyow: mebyon Rewben, kynsa-genys Ysrael: Hanok, Pallu, Hesron ha Karmi; an re ma yw teyluyow Rewben.

¹⁵ Mebyon Simeon: Yemuel, Yamin, Ohad, Yakin, Sohar ha Shaul mab an Gananyades; an re ma yw teyluyow Simeon.

¹⁶ Ha'n re ma yw henwyn mebyon Levi, war-lergh aga henedhow: Gershon, ha Kohath, ha Merari: ha blydhynyow bewnans Levi o kans ha seytek bloedh warn ugens.

¹⁷ Mebyon Gershon yw: Libni, ha Shimei, herwydh aga theyluyow.

¹⁸ Ha mebyon Kohath yw: Amram, hag Yshar, ha Hebron, hag Uzziel: ha blydhynyow bewnans Kohath o kans ha trydhek bloedh warn ugens.

¹⁹ Ha mebyon Merari yw Mahli ha Mushi: an re ma yw teyluyow Levi war-lergh aga henedhow.

²⁰ Hag Amram a gemmeras avel gwreg Yokebed, y vodrep, ha hi a dhug dhodho Aron ha Moyses: ha blydhynyow bewnans Amram o kans seytek bloedh warn ugens.

²¹ Mebyon Yshar: Koragh, ha Nefeg, ha Zikri.

²² Ha mebyon Uzziel: Mishael, Elsafan, ha Sithri.

²³ Aron a gemmeras avel gwreg Elisheba, myrgh Amminadab, ha hwoer Nahshon; ha hi a dhug dhodho Nadab, Abihu, Eleazar, hag Ithamar.

²⁴ Mebyon Koragh: Assir, Elkana, hag Abiasaf; an re ma yw teyluyow an Koraghysi.

²⁵ Eleazar mab Aron, a gemmeras avel y wreg onan a vyrghes Putiel; ha hi a dhug dhodho Finehas. An re ma yw pennow teyluyow an Levysi herwydh aga theyluyow.

²⁶ An re ma yw an Aron ha Moyses a gewsis an Arloedh dhedha, ‘Drewgh mebyon Ysrael yn-mes a Ejyp herwydh aga luyow.’

²⁷ I yth o a gewsis orth Faro myghtern Ejyp, a-dro dhe gyrghes mebyon Ysrael yn-mes a Ejyp, an Moyses ma ha'n Aron ma.

Gorhemmynn an Arloedh dhe Moyses hag Aron

²⁸ Hag y hwarva, an jydh may kewsis an Arloedh dhe Moyses yn pow Ejyp,

²⁹ an Arloedh a leveris dhe Moyses, ‘My yw an Arloedh; lavar dhe Faro myghtern Ejyp pup-tra a lavarav dhis.’

³⁰ Ha Moyses a leveris dhe'n Arloedh, ‘Otta, my yw antrodreghys ow diwweus; ytho fatell wra Faro koela orthiv?’