Eksodus 5 - An Bibel Kernewek 20234 (Kernewek Kemmyn)

Moyses hag Aron a-rag Faro

¹ A'y wosa, Moyses hag Aron a dheuth a-ji dhe Faro ha leverel, ‘Yndellma y lever an Arloedh, Duw Ysrael, “Gas ow fobel dhe vones may hallons ow goelya y'n gwylvos.” ’

² Mes Faro a leveris, ‘Piw yw an Arloedh may koelliv orth y lev ha gasa Ysrael dhe vones? Ny aswonnav an Arloedh, ha dhe voy ny asav Ysrael dhe vones.’

³ Ena y lavarsons, ‘Duw an Ebrowyon re vetyas genen; gas ni dhe vones, ni a'th pys, vyaj a dri dydh y'n gwylvos hag offrynna dhe'n Arloedh agan Duw ma na goettho warnan gans pla po gans an kledha.’

⁴ Mes myghtern Ejyp a leveris dhedha, ‘Moyses hag Aron, prag y kemmerowgh an bobel a'ga ober? Kewgh dh'agas beghyow!’

⁵ Ha Faro a leveris, ‘Otta, pobel an tir yw lemmyn niverus, ha hwi a wra dhedha powes a'ga beghyow!’

⁶ An keth jydh, Faro a worhemmynnis dhe'n vestrysi kethneth ha'ga gorweloryon,

⁷ ‘Ny rowgh na fella dhe'n bobel kala' rag gwruthyl brykkys avel kyns; gesewgh i dhe vones ha kuntell kala aga honan.

⁸ Mes an niver a vrykkys a wrens seulabrys hwi a sett warnedha, ny'n lehowgh war neb kor; rag diek yns; yndella i a gri, “Deun dhe offrynna dh'agan Duw.”

⁹ Bedhes ober poessa gorrys war an wer may hwonetthens orto ha ma na wrellens vri a eryow gowek.’

¹⁰ Ytho an vestrysi kethneth ha gorweloryon an bobel eth yn-kerdh ha leverel dhe'n bobel, ‘Yndellma y kews Faro, “Ny rov dhywgh kala'.

¹¹ Kewgh agas honan dhe gyrghes kala' yn pub le may hyllowgh y gavoes; mes agas ober ny vydh lehes kammenn.” ’

¹² Ytho an dus a veu skattrys a-les dre bow Ejyp oll, ow kuntell sowl rag kala.

¹³ An vestrysi kethneth a wre aga ynnia, ow leverel, ‘Kowlwrewgh agas ober, agas ober pub-dydhyek, kepar ha pan ve kala.’

¹⁴ Ha gorweloryon mebyon Ysrael, neb a veu gorrys warnedha gans mestrysi kethneth Faro, a veu gweskys hag y feu govynnys orta, ‘Prag na wrussowgh hwi kowlwul agas ewn rann hedhyw, avel kyns?’

¹⁵ Ena gorweloryon mebyon Ysrael a dheuth ha kria war Faro, ‘Prag y tyghtydh dha gethyon yndellma?

¹⁶ Nyns yw res kala vyth dhe'th servysi hag ymons ow leverel dhyn, “Gwrewgh brykkys!” Otta, gweskys yw dha servysi, ha'th pobel dha honan yw dhe vlamya.’

¹⁷ Hag ev a leveris, ‘Diek – hwi yw diek; hemm yw an praga hwi dhe leverel, “Gwren mos dhe sakrifia dhe'n Arloedh.”

¹⁸ Kewgh lemmyn ha gonis; rag ny vydh kala res dhywgh, hwi a wra an keth niver a vrykkys hogen.’

¹⁹ Gorweloryon mebyon Ysrael a welas aga bos yn trobel, pan lavarsons, ‘Ny wrewgh hwi yn neb fordh lehe an niver a vrykkys pub dydh.’

²⁰ I a dhyerbynnas Moyses hag Aron esa orth aga gortos dell dheuthons a-dhiworth Faro;

²¹ hag y lavarsons dhedha, ‘An Arloedh re virro warnowgh ha breusi, drefenn hwi re wrug dhyn bos kasadow yn dewlagas Faro ha'y servysi, ha gorra kledha yn aga dorn dh'agan ladha.’

Moyses a Grodhvol a-rag an Arloedh

²² Ena Moyses a dreylyas arta dhe'n Arloedh ha leverel, ‘A Arloedh, prag y hwrussys drog dhe'n bobel ma? Prag bythkweth y hwrussys ow dannvon?

²³ Rag a-ban dheuth dhe Faro dhe gewsel y'th hanow, ev re wrug drog dhe'n bobel ma, ha ty, ny wrussys livra dha bobel kammenn.’