Eksodus 38 - An Bibel Kernewek 20234 (Kernewek Kemmyn)

Alter an Offrynnow Leskys

¹ Ev a wrug an alter a offrynnow leskys ynwedh a brenn shittim; pymp kevelin o hy hys ha pymp kevelin hy les; pedrek o, ha tri hevelin o hy ughelder.

² Ev a wrug kern dhedhi dh'y feder kornell; hy hern o a unn rann gensi, hag ev a's gorlownyas gans brons.

³ Hag ev a wrug toulow oll an alter, an pottow, an reuvow, an bollow, an kigveryow ha'n padellow-tan: oll an daffar ev a wrug a vrons.

⁴ Hag ev a wrug dhe'n alter rastell, roesweyth a vrons, yn-dann hy amal, owth ystynn hanter-fordh war-nans.

⁵ Ev a deudhis peder lagasenn dhe beder kornell an rastell vrons avel synsellow an gwelynni.

⁶ Ev a wrug an gwelynni a brenn shittim ha'ga gorlownya gans brons.

⁷ Hag ev a worras an gwelynni der an lagasennow war denwennow an alter, dh'y doen gansa; ev a wrug an alter kow, gans estyll.

An Wolghell a Vrons

⁸ Hag ev a wrug an wolghell a vrons ha'y sel a vrons, dhiworth gwedrow an benynes a venystra orth daras tylda an kuntelles.

Klos an Tabernakel

⁹ Hag ev a wrug an klos; rag an barth dhyghow kroglennow an klos o a sendal plethys, kans kevelin;

¹⁰ aga holovenyow o ugens ha'ga krawyow ugens, a vrons, mes higennow an peulveyn ha'ga bondow o a arghans.

¹¹ Ha dhe'n barth kledh kans kevelin, aga holovenyow ugens, aga krawyow ugens, a vrons, mes higennow an kolovenyow ha'ga bondow o a arghans.

¹² Ha dhe denewen an howlsedhes yth esa kroglennow a hanter-kans kevelin, aga holovenyow deg, ha'ga krawyow deg; higennow an kolovenyow ha'ga bondow o a arghans.

¹³ Ha war denewen an est war-tu ha'n howldrehevel, hanter-kans kevelin.

¹⁴ Kroglennow unn tenewen an yet o pymthek kevelin, gans teyr holoven ha tri kraw.

¹⁵ Hag yndella dhe denewen arall yet an klos; dhe'n dhorn ma ha'n dhorn na yth esa kroglennow a bymthek kevelin, gans teyr holoven ha tri kraw.

¹⁶ Ha'n kroglennow a-dro dhe'n klos o gwrys a sendal plethys.

¹⁷ Ha krawyow an kolovenyow o a vrons, mes higennow an kolovenyow ha'ga bondow o a arghans; gorlownyans aga fenn-kolovenyow o a arghans ynwedh, hag oll kolovenyow an klos a'n jevo bondow a arghans.

¹⁸ Ha kroglenn porth an klos a veu brosweyth yn pann glas ha purpur ha kogh ha sendal plethys; an hys o ugens kevelin, ha'n ughelder o pymp kevelin y'n les, herwydh kroglennow an klos.

¹⁹ Ha'ga holovenyow o peswar; aga feswar kraw o a vrons, aga higennow a arghans, ha gorlownyans aga fenn-kolovenyow ha'ga bondow a arghans.

²⁰ Hag ebilyer oll an tabernakel ha rag an klos a-dro o a vrons.

Myns an Owr, Arghans ha Brons yn Gwrians an Tabernakel

²¹ Homm yw rol taklow an tabernakel, tabernakel an dustuni, dell vons reknys orth gorhemmynn Moyses, rag ober an Levysi yn-dann gevarwoedhyans Ithamar mab Aron an oferyas.

²² Besalel mab Uri, mab Hur, a loeth Yuda, a wrug pup-tra a worhemmynnis an Arloedh dhe Moyses;

²³ ha ganso yth esa Oholiab mab Ahisamak, a loeth Dan, kreftweyther ha desinor ha brosyer yn pann glas ha purpur ha kogh ha sendal.

²⁴ Hag oll an owr a veu devnydhys y'n ober, yn gwrians oll an sentri, owr an offrynn, o naw talent warn ugens ha seyth kans ha deg shekel warn ugens, war-lergh shekel an sentri.

²⁵ Hag arghans tus an kuntelles a veu niverys o kans talent ha mil seyth kans pymthek ha tri-ugens a shekalim, war-lergh shekel an sentri:

²⁶ beka pub penn (henn yw hanter shekel, war-lergh shekel an sentri), rag pubonan a veu reknys y'n niveryans, a ugens bloedh ha moy, rag hwegh kans ha tri a vilyow, pymp kans ha hanter-kans a dus.

²⁷ An kans talent arghans o rag teudhi krawyow an sentri ha krawyow an vayl; kans kraw rag kans talent, unn talent rag unn kraw.

²⁸ Hag a'n mil seyth kans pymthek ha tri-ugens a shekalim ev a wrug higennow rag an kolovenyow, ha gorlownya aga fenn-kolovenyow ha gul dhedha bondow.

²⁹ Ha'n brons a veu res o deg talent ha tri-ugens, ha dew vil ha peswar kans a shekalim;

³⁰ ganso y hwrug krawyow daras tylda an kuntelles, an alter vrons ha'n rastell vrons rygdhi ha toulow oll an alter,

³¹ krawyow an klos a-derdro, oll ebilyer an tabernakel, hag oll ebilyer an klos a-derdro.